係同屋室友?定係同居密友?: (S2)28. 案件開審

今日學翹起身後，搵左件恤衫同西褲出黎，小祺亦都換上比較斯文嘅長裙，但係佢諗緊著咩鞋
 
「妳當然著平底鞋啦，冇人會著涼鞋去果到」
 
小祺同學翹今日以非常斯文嘅造型出發
 
學翹係目的地附近泊好部車，同小祺行去佢地要去嘅地方
 
「記住入到去唔可以影相呀」   「知道啦」
 




入到去，學翹同小祺坐係旁聽席
 
今日，佢地兩個去到法庭，今日對學翹進行襲擊嘅舊同事提堂，之前被告係過堂時已表明不認罪，所以排期到今日由控方開案，學翹係受害人，所以佢嘅證供好重要，而小祺就係事件發生前嘅重要證人之一
 
因為涉及多位部門同事，令到供應部減少人手。當然法庭亦明白供應部對大學嘅重要性，所以預計用一日時間去審訊
 
去到法庭，律政署嘅檢控官以及助手已經早一步到場，係法庭提供嘅辦公室整理文件，而學翹嘅姐夫黎大狀以及游律師都已經黎到進行旁聽
 
小祺第一次黎法庭，所以佢覺得好新奇
 




學翹陪佢坐埋一邊等待法庭開門
 
黎大狀同游律師都黎到佢地身邊
 
「第一次上庭，緊唔緊張?」黎大狀問學翹
 
「唔會緊張」
 
「GOOD!」
 




係佢地係到傾計果時，被告人同代表大狀都黎到，佢同以前一樣，都係怒氣沖沖一般
 
仇人見面，份外眼紅。Ronold怒視學翹，如果呢到唔係法庭，可能會有新一輪爭執發生
 
「睇黎佢對你恨意好大」「呢樣野我都唔知點解，唔知幾時得罪左佢」
 
9點正，法庭門打開，大家魚貫進入庭內
 
庭內傳出廣播後15分鐘，聽到庭內有三下聲音「咯!咯!咯!」
 
「Court!」眾人企起身
 
由於係裁判署，所以一次審理嘅案件亦唔少，通常裁判官先處理新案件，進行過堂程序
 
大約半小時後，學翹嘅案件準備開審




 
「下一宗案件，KCC/1234，被告容淦仁」法庭書記開始讀出案情
 
Ronold行入被告欄
 
「容淦仁先生，你被控於20XX年X月X日早上大約10時正，於香港維多利亞大學房間1045室，以一個膠紙座向同事苗學翹先生作出襲擊，引致苗先生頭部受傷出血後失去平衡，導致苗先生頭部撞向檯邊引起腦震蕩並當場失去知覺。請問你認罪或不認罪?」
 
「不認罪」
 
「控方可以開始傳召證人」
 
慢慢，多名同事輪流在庭上作供，各人都講出當時情況，而且所有人口供亦一致
 
於是，裁判官聽取完控方證人供詞，後再拎起醫療報告細閱
 




「被告表證成立，需要答辯」
 
辯方大狀亦開始盤問證人，
 
「陳先生，請問你同我當事人同事幾耐?」
 
「超過10年」
 
「咁十幾年黎，你有冇曾經同被告有任何爭執?」
 
「經常有」
 
辯方大狀不停反覆問呢條問題，黎大狀同檢控官亦一早知道對家會問呢條問題。因為呢樣野係唯一一樣可以擊破控方證人證據，就係結怨
 
「麻煩哂，法官閣下，基於所有證人都同我當事人有著長時間積怨，所以我申請將控方證人證據為不可靠」




 
「太新啦，個租客跟完師傅冇耐，冇咩經驗」黎大狀係旁聽席同游律師講
 
「Adrian佢會點拆?」
 
「舅仔身邊果個小妹妹見唔見到?」
 
「哦，佢女友呀?」游律師望一望小祺講
 
「佢地唔係情侶關係，暫時，所以，你明啦」
 
「我明」
 
「控方，有冇任何補充?」裁判官問檢控官
 




「閣下，我希望申請傳召特別證人，望閣下批准，較早前已將特別證人資料及供詞交予辯方大狀」
 
「辯方會否反對?」
 
「辯方冇反對，亦申請證人作供後覆問證人」
 
「申請批准」
 
「現傳召控方特別證人，梁小祺小姐」