係同屋室友?定係同居密友?: (S2)26. 神秘女孩

係學校mail room，負責派信嘅職員分別將兩封信放到去學翹同小祺嘅office信箱中
 
佢地兩個係同時間，唔同office內一齊打開封信
 
「畢業典禮」兩個人異口同聲講
 
小祺係M.phil畢業典禮，而學翹嘅係P.hD畢業典禮，不過佢地兩個都係屬於理學院，所以佢地會係同一日行禮，信封內仲有兩張入場券
 
信上仲俾佢地揀買袍定租袍
 




「如無意外，小祺一定係租」學翹自己預計
 
正當佢係到諗緊搵邊個出席畢業典禮果時，佢office嘅門好快打開。大家抬頭一望，係一個18歲左右嘅女仔
 
「同學有咩幫到妳?」其他同事一睇就知佢係學生
 
「我搵苗學翹架」「請問妳貴姓搵佢?」「我叫苗學嬛」
 
冇錯，呢位來者不善嘅人，就係學翹最錫嘅堂妹，苗學嬛
 




「呀，學翹個位係果邊」同事指一指學翹個位
 
「唔該哂」
 
苗學嬛輕快咁行去學翹個位到，而學翹見到個妹黎搵佢，心諗一定冇好事發生
 
「阿哥~」「想要幾多錢講啦」
 
「你咁睇我架!!黎搵你一定係問你拎零用錢咩?」「通常都係架啦，阿叔冇俾零用妳咩?」
 




「爸爸佢俾唔多呀，每星期500咋」「$500仲唔夠呀?」
 
「黎啦阿哥呀，俾零用錢我啦」學嬛係到揈學翹隻手
 
「俾左錢妳，我仲邊有錢用?」「你假日都唔出街，係屋企攤係到架啦，有咩所謂」
 
學翹見講個妹唔過，係銀包中拎出$500
 
「多謝阿哥」「仲有冇要求呀?」
 
「有呀!」「講啦」
 
「我今晚去你到食飯」
 
聽到個妹要黎，學翹第一時間嘅想法就係「今次仆街了」




 
苗學嬛並唔知道佢阿哥金屋藏嬌嘅事
 
學翹吞吞吐吐咁講「我屋企呀….咁即係呢….個問題在於呢…..」
 
苗學嬛見學翹好似有d心虛咁，就反問佢「阿哥你金屋藏嬌呀?，咁驚嘅」
 
不過學翹預個妹一早就知道，所以都應承左佢嘅要求
 
「咁妳放幾點呀?」「今日放5點」
 
「五點半係Starbucks門口等有冇問題?之後跟我去攞車」
 
「冇問題，成交!不過今晚你係咪會車我返Hall架?」
 




「唔通要妳行返落去咩」
 
「喂，同我去飲杯野啦」學嬛捉起學翹
 
「喂喂喂，俾其他人見到唔好呀」「怕咩丫，你都係一條毒L黎架啦」
 
學嬛捉住學翹走去Starbucks到，撓實佢自己阿哥去買野飲
 
係Starbucks內，Connie同小祺正坐係到，最近小祺食完午餐都鍾意出黎行下做下運動，以免自己俾學翹寵肥
 
「Suki!Suki!妳望下果邊!!!」Connie細細聲好緊張咁講
 
「咩事呀?」小祺擰個頭去cashier果到，發現左學翹好Enjoy咁俾個後生女仔撓實隻手
 
係小祺隔離張檯，亦有兩個女學生係到




 
「果個係唔係Marni呀?」「係喎，佢有男朋友架咩?」
 
「冇聽佢講過喎，呵呵，班男仔可以死心啦，女神名花有主」
 
呢個時候，學嬛將成個人挨去學翹身到，坐係窗邊嘅小祺，立即渣實拳頭，想衝過去打人咁滯
 
睇黎今晚，學翹宿舍難免有一場腥風血雨