係同屋室友?定係同居密友?: (S2)24. 買銀包

商場內，小祺同Rachel一齊行街揀銀包
 
「妳睇妳丫Suki，幾細心咁幫人揀銀包丫」
 
「咁…佢果個銀包又殘又舊，仲有d地方爛左同埋用膠紙痴實…」
 
「咩話?佢咁慳架?」
 
小祺點一點頭「不過我有好多野都係佢買俾我，幫我出錢」
 




「睇黎佢真係對妳好好咁喎」Rachel係小祺身邊講
 
「咁…可能佢對我都有少少意思嘅….」
 
「妳知唔知佢鍾意咩顏色呀?」
 
小祺諗一諗「唔…..佢d衫差唔多全部都係剩色，非常單調」
 
「卡多唔多先?」「嗯….提款卡有三張，信用卡有兩張」
 




「相呢?」「佢好似放屋企人嘅相」
 
「妳係咪好想佢放妳張相呢?」
 
「咩…咩喎」小祺面紅紅咁低頭
 
係佢地兩個揀緊果時，有Sales姐姐行近佢地
 
「兩位小姐，有咩幫到妳架?係唔係揀銀包呢?」
 




小祺未開口答人地果時，Rachel快佢一步搶口答
 
「係呀，佢買黎送俾男朋友架」
 
「小姐妳真係識揀，我地所有銀包都係由真皮製造，而且銀包非常耐用，請問下小姐男朋友之前用開咩款式嘅銀包?睇下我可唔可以介紹d俾妳?」
 
小祺拎部電話出黎，之前佢影低左學翹銀包款式「佢用呢一個款，應該…..都幾舊下」
 
「俾我睇睇」Sales姐姐睇好耐，都認唔出呢個款式，所以，佢叫左店長過黎
 
店長睇一睇張相，立即讚小祺「小姐，妳男朋友好長情，恭喜哂妳」
 
「長情?」
 
「係呀，呢個款式銀包，係10年前嘅款式，妳男朋友用左咁耐，佢一定好細心好珍惜所有野」




 
「呀…係呀…佢放相個位爛左，佢都係用膠紙痴返就算」
 
店長叫sales姐姐係櫃中拎出幾個款式嘅銀包，小祺第一眼，就揀中左一個純黑色，而且內籠格數好多嘅銀包
 
「小姐，呢個款式係我地牌子經典款式，妳男朋友應該鍾意呢一款」
 
小祺嘅直覺話佢知道，學翹一定會鍾意呢個銀包，所以好快佢就買左呢個銀包落黎，Sales姐姐幫佢包好
 
買完銀包後，Rachel同小祺坐地鐵返去
 
「妳呀，24孝女朋友呀」「咩喎，咁佢個銀包又咁舊…」
 
「妳地仲未一齊呀?」
 




「未呀…不過每晚我都挨住佢膊頭睇電視，出黎行買野會拖下手…每晚會一齊瞓囉」
 
Rachel反起白眼「咁妳地仲唔叫做一齊呀?」
 
小祺嘟起個咀「咁佢都未表白同我講…」
 
「妳地呢d叫自自然然咁行埋一齊，仲邊洗表白」
 
「係架咩?」
 
「當然啦，妳信唔信丫，今晚返去，一齊係床上邊果時，妳攬住佢黎錫丫，包妳今晚變大個女」
 
聽到Rachel咁講，小祺雙耳頓時充血
 
「喂喂喂，妳唔洗咁緊張喎」




 
「唔…唔緊張就假啦，妳咁講法」
 
「不過呢，妳仲係著住d卡通胸圍同底褲，可能挑唔起佢嘅慾望」「咁要點呀?」
 
「買d喱士呀，黑色，同埋有少少透明果款囉，仲有sexy d果款睡袍」
 
「嘩，我邊有錢呀」「黎啦，唔貴架，去68果到揀啦」
 
於是，小祺就俾Rachel捉左去68度揀返幾set bra同底褲