係同屋室友?定係同居密友?: (S2)23. 拜訪家人

小祺坐係梳化上，佢電話中有舊同學係wts搵佢，原來，小祺父母去過佢之前住嘅套房搵自己，亦不停打電話搵佢。幸而，小祺將屋企人所有聯絡方法都block哂，所以佢係屋企人眼中再一次消失左一般
 
不過，搵唔到小祺，佢父母同細佬就向小祺嘅同學/朋友落手，亦好好彩，小祺嘅知心好友知道小祺以前受到屋企嘅對待，所以佢係宿舍住嘅事冇俾屋企發現
 
「做咩事呀?好似好煩惱咁嘅?」
 
「我d同學話，我屋企人不停咁搵我」
 
「佢地搵妳都係為左錢咋?」「好大機會係」
 




小祺暗嘆「有時候，有屋企人都唔知算唔算係好事」
 
小祺依舊挨緊學翹
 
「呀….聽日上晝我要出一出去」「你有重要事?」
 
「唔…我想去探下我父母者」
 
小祺聽到學翹會去探自己父母後，抬頭一望
 




「我陪你去丫」「陪我?」
 
「咁…我都要拜候下你屋企架嘛」
 
學翹望望小祺，心中暗想「睇黎同佢正式拍拖嘅日子都唔遠了」
 
星期六早上，學翹車住小祺去佢父母同爺爺墓地到探佢地
 
「你成日都會黎探佢地?」「大約…兩個月一次啦」
 




今日學翹買左花，帶左d清潔用品去打掃一下，落車後，學翹帶住小祺去到父母嘅居所
 
學翹換花嘅時候，小祺好細心咁幫一對先人清潔
 
「世伯伯母，唔知，我會唔會成為你地嘅新抱呢?」小祺細細聲咁同學翹父母講
 
小祺估唔到自己係咁樣同學翹父母傾計，學翹返到黎果時，好奇問小祺
 
「妳同佢地講d咩呀?」「呵，講你壞話囉」
 
「我邊得黎有壞話俾妳講?」「係囉，瞓覺果時隻手成日抽我水囉，算唔算?」
 
「咁…同妳同一張床上邊瞓，掂到妳好正常者」
 
小祺扁起個咀心諗「你尋晚摸住我個胸瞓都叫正常呀?」




 
清潔過後，佢地再次返上車，駛離墓地
 
「唔…..而家去邊到好呀?」「而家先11點幾，不過去睇戲囉」
 
小祺聽到學翹提議去睇戲後，立即開電話搵有咩戲好睇。佢知道，學翹唔鍾意睇港產片
 
平日佢地兩個係宿舍，通常一齊睇嘅都係西片多，除非係大制作嘅電影，學翹甚少睇港產片，因為近年嘅港產片都係以合拍片居多，所以學翹就一d興趣都冇
 
兩個人食左lunch之後，就去買飛睇戲
 
今日佢地揀左d動作片黎睇，小祺之前好少去戲院睇戲，所以佢坐低時，完完全全雙手撓實學翹，而負責揀位嘅小祺，就揀左情侶坐位
 
入到戲院，佢地兩個完全冇任何尷尬咁坐低，小祺亦照舊將頭挨實學翹
 




雖然係星期六，但由於係中午時間，戲院內人數唔多。當熄哂燈後，學翹亦都大膽起黎
 
講嘅唔係佢伸手入小祺件衫入摸佢個胸，而係佢伸手攬住小祺
 
一時間，小祺覺得非常溫暖
 
完場後，佢地兩個慢慢行去停車場，當學翹拎戲飛出黎換免費泊車果時，小祺先發現，學翹個銀包非常殘舊，放相嘅位置都差唔多跌出黎，學翹係搵膠紙痴住
 
小祺係無意間，知道學翹嘅生日日期，所以，小祺就打算買個新銀包俾學翹
 
有邊個可以陪佢去揀?除左Rachel之外，應該冇第二個人啦