係同屋室友?定係同居密友?: (S2)22. 忍得住

今晚佢地兩個人返到宿舍，各自梳洗開左洗衣機後，又係坐係到等。小祺係露台望出去，今晚個月光特別圓，睇返月曆，今日係人月兩團圓嘅中秋節。對於小祺黎講，中秋節，應該係話任何節日，對佢黎講都係一樣，今年係佢第一次有人陪佢過中秋節
 
「個月光好靚呀」「今晚係超級月亮，比正常大」「真係好靚」
 
住郊外嘅好處，就係可以見到天上嘅夜星，學翹見小祺睇得咁開心，佢就係房中拎枝天文望遠鏡出黎，set係宿舍露台
 
「喂喂，妳過黎睇下啦」
 
小祺將隻眼伸去望遠鏡中，佢見到一個好靚嘅月光
 




「估唔到你會鍾意睇星星」
 
「哦，細個果時我爸爸成日帶我去睇星，所以我好細個就鍾意觀星」
 
小祺聽到學翹再提起佢自己屋企後，起身望一望佢。「佢一定好掛住佢屋企人」
 
學翹發現小祺望住自己，覺得好奇怪
 
「做咩事呀?」「其實…你會唔會好掛住屋企人?」
 




學翹聽到小祺咁問佢，就坐直個人
 
「咁掛住一定有，始終係自己父母，就算大伯阿叔佢地對我點好，點照顧我都好，都代替唔到親生父母。不過都已經成為事實，都要接受」
 
不知道哪裡來的勇氣，小祺雙手撓實學翹，將自己個頭挨過去，個心跳得好快
 
「如果你唔介意我又蠢又笨嘅話，我可以一直陪住你」
 
果一刻，佢地兩個深情對望，係呢個嘅浪漫嘅氣氛下，小祺合上雙眼，準備迎接自己獻出初吻嘅一刻
 




等左一陣，小祺仍然未feel到學翹有所行動，於是佢打開雙眼後，發現學翹自己睇緊望遠鏡
 
小祺鼓成泡腮有少少嬲「喂」
 
「唔?做咩呀?」「你….冇打算呀?」
 
「打算咩呀?」「我都合埋雙眼….」
 
「妳有沙入眼?而家有冇問題呀?」
 
小祺諗返起穎雯講過，學翹係一個絕對直男，佢係有D地方係非常遲鈍
 
「冇事啦!」
 
小祺再透過望遠鏡望「有咩好睇?」




 
「我望緊果粒星星….」「果粒咁大粒?」
 
「天蠍座心宿二，紅巨星…」
 
學翹係露台解釋星象俾小祺聽，交不出初吻嘅小祺，有少少失望，不過佢地兩個已經習慣雙手撓實對方
 
收返望遠鏡，學翹去晾衫，小祺望住佢背影默想
 
「我似乎…真係鍾意左佢…但係住埋一齊一個月就鍾意左人地….」
 
同樣地，專心晾衫嘅學翹，當佢拎起小祺嘅衫同貼身衣服時都回想剛才嘅事
 
「定力少D都錫左落去…咁樣乘人之危唔太好…」佢自己頭先知道小祺想同佢黎個親密少少嘅接觸
 




「其實平時佢都撓住我坐，個頭都挨落黎，係屋企又短衫短褲唔戴胸圍…而且又瞓埋同一張床….基本上我同佢都一齊左……不過….」
 
學翹怕嘅唔係小祺會謀住佢份財產，始終上一次佢俾人傷得太深，而最緊要就係，佢回復單身冇耐就再拍拖的話，佢怕小祺會俾人誤會係第三者。近幾個月，學翹做咩都好，都係以小祺行先
 
兩個人一齊攤係床上，中間冇鯊魚相隔。小祺轉身背對住學翹靜靜睡著。床嘅另一邊，學翹轉去小祺方向，伸手抱住小祺後瞓著
 
半夜，小祺將身轉向另一邊，見到自己被鍾意嘅男仔攬住，咀角微微一笑，輕輕一個偷吻後，將個頭放進對方懷內
 
咁樣，佢地兩個都覺得好幸福