係同屋室友?定係同居密友?: (S2)21. 同事鼓勵

散席後，各位渣車人士先去攞車，小祺跟埋其他同事一齊等，期間Connie係小祺身邊再問
 
「妳地一齊幾耐呀?」
 
「下…幾耐?即係咁….其實….都….呀….打10號風球果次囉」
 
「下?妳地打10號行街拍拖呀?妳大風少少都會俾風吹走喎」
 
「係果次放工，校巴同巴士小巴都排哂長龍，本來我來想留係供應部Office留一晚」
 




「下邊有床咩?」
 
「沖涼可以去體育館、canteen仲會開門，我本來打算拍埋幾張椅當床瞓，不過學翹問我點換衫洗衫，我先發現計漏左呢點」
 
「然後呢?」
 
「然後佢咪叫我去宿舍暫住囉」
 
「10號風球果次，好犀利喎，妳住左幾耐呀?」
 




「差唔多一星期左右」
 
「之後就拍拖啦?」
 
「又…唔係嘅，我同佢都未一齊」
 
「下?未一齊?但妳地又住埋一齊喎」
 
「其實…」小祺將佢d事講俾Connie同穎雯知道，佢地聽完都唔可以相信現今社會仲有呢d問題
 




「即係妳父母毆打妳就係為左幫妳個細佬呀?」
 
小祺點一點頭
 
佢地拎起小祺隻左手睇，小小嘅傷痕仍然存在
 
「佢地真係痴線架，好彩Cleverly黎搵妳」
 
「嗯，佢仲好好人，幫我還哂學債，見我電話又殘又舊，就同我一齊出新電話上台家庭Plan，有好多野都係佢幫我出哂，而家宿舍咩都係佢出錢…」
 
「所以妳就鍾意左人呢?」
 
小祺面紅紅咁答「之前我講笑咁講，話免禮金嫁俾佢嘅…不過佢唔當一回事」
 
「呵，妳恨嫁啦」




 
「咁…大家又住埋一齊……」
 
「妳要俾少少心機喎，學翹係一個直男、書Kai子」穎雯加把口
 
「我當然知啦，佢個書房全部都係書」
 
「係喎…咁妳瞓邊呀?」
 
「我瞓房…佢瞓廳」
 
小祺怕講人知，佢地兩個同房，瞓埋同一張床，仲試過攬住瞓的話，真係水洗都唔清，不過而家又何嘗唔係呢
 
「Suki妳對佢有冇意思先?」
 




「唔…少少都有嘅」
 
Connie搭住小祺膊頭「咁妳要好好把握」
 
學翹部車駛到路邊，其他同事目送小祺上車，大家開心咁拜拜，唯獨Leo有點失落
 
「喂，女死女還在呀，人地咁恩愛，你都唔好意思去拆散人地掛」
 
「認命啦認命啦，不過佢地都收得好密」
 
「人地兩個鍾意地下情低調d，唔好咩?」
 
「Suki話佢已經搬走左，Cleverly又住宿舍，咁佢地兩個應該都係…..」
 
「拿，你自己估下好啦，我地冇問過呀」




 
其實唔洗問，基本上一睇都知道，學翹同小祺而家係同居
 
學翹開住車返宿舍，小祺係車上鼓起泡腮
 
「做咩事呀?有人激親妳呀?」
 
「冇….不過我地嘅事應該好多人都知，我地兩個係同事眼中已經係一對，仲要係同居果隻」
 
「咪由得人地點講囉，妳唔洗理架」
 
「嗯」
 
「定係妳怕冇哂男仔接近妳呀?」
 




「咁我又唔驚，你唔係話要娶我咩?」小祺笑笑口問學翹
 
「得嘅，遲D囉」
 
「我地未拍拖就結婚呀?」
 
「正如我阿麻話齋，結左婚後先拍拖都得者，感情可以慢慢培養出黎」
 
「你屋企真係好想你快D結婚喎」
 
「係阿麻者，其他人都冇催」
 
學翹心諗「同妳結婚都唔錯呀」