係同屋室友?定係同居密友?: (S2)12. 讀心術

苗學翹係宿舍換好衫後，準備好出門口
 
出發前佢再問梁小祺，保證佢冇問題
 
「妳真係冇問題嘛?」
 
「話哂我都自己一個人住過一段日子喎，你唔好咁睇我啦」
 
「咁我出門口架啦」
 




「你出啦，我冇問題架啦」
 
學翹信得過小祺，所以佢都好放心咁出門口
 
苗學翹部Jimny仔徐徐駛離宿舍，向尖沙咀出發
 
趁住學翹出左去，佢自己一個人係宿舍時，佢坐係堆鯊魚面前嘆氣
 
「鯊田友…愛鯊尼亞…尖鯊咀…長鯊環…鯊頭角…鯊中線….鯊角邨…鯊田圍….鯊田拗…鯊士比亞…..我好似鍾意左你地主人呀….你地想唔想我做你地女主人呀?」
 




「你地都想呀?唔…不過唔知佢想唔想呢….都已經偷偷地錫過，瞓埋同一張床上邊，我d同學又當佢係我男朋友啦…」
 
梁小祺從細開始，佢都要用好長嘅時間先會鍾意一個人。但係今次用嘅時間比之前短得多，最大可能，係因為佢地兩個朝夕相處，而且學翹係佢最需要人保護嘅時候出黎保護佢，大風大雨時收留佢陪佢瞓，幫佢還清學債，煮飯佢食，幫佢洗衫，係佢飲醉時解救自己，又一齊出埋家庭plan等等
 
係自己都1516果時，佢拎起電話wts Rachel
 
「喂，有咩搞?」
 
「仲做緊lab呀，做咩事呀?」
 




「係屋企一個人冇野做」
 
「哦~當果度係妳屋企啦，做埋女主人啦」
 
「咩呀，又潤我」
 
「咁妳返黎幫手做lab囉，妳行返黎好快者」
 
「得啦，等我」
 
小祺立即換衫，拎起自己背囊返去實驗室
 
著上實驗白袍，再坐係Rachel隔離幫佢手
 
係Biosafety cabinet前，佢地兩個又係到做tissue culture




 
「搞咩特登返黎呀?」
 
「宿舍得我一個人，冇野做咪返黎幫下妳囉」
 
Rachel彷彿睇穿小祺心意，奸笑咁望住佢
 
「真係咁簡單?冇其他特別野?」
 
「乜我好容易俾人睇穿咩?」
 
「妳呀，情竇初開啦妳」
 
小祺俾Rachel一下就踢穿左
 




「嘩….郭曉昕….妳識讀心術架?」
 
Rachel笑笑口「唔係我識讀心術，係妳做到好明顯者」
 
「真係咁咩?」小祺而家驚俾學翹知道自己對佢有意思
 
「咁都正常嘅，佢咁保護妳照顧妳，又一齊住做室友，而且仲瞓埋同一張床….佢有冇…偷偷咁錫過妳呀?」
 
小祺點一點頭，而果時佢塊面係非常之紅
 
「下?我講下咋!!!佢真係錫左妳呀?」
 
小祺再點一點頭
 
「woo!!!!幾時嘅事黎架?」




 
「幾時呀….唔….上次我中學同學聚會，我飲多左後佢黎會場接我，返到宿舍後，我嘔完輕鬆哂，瞓瞓下時，佢錫左我咀一下」
 
「之後呢?」
 
「冇啦!!!妳仲想有咩情節呀?」
 
「咁妳鍾唔鍾意人地先得架」
 
「少少囉，一定有好感架」
 
「咦?但係妳今晚唔係同佢撐檯腳咩?做咩咁得閒幫我手呀?」
 
「今晚佢屋企中秋節做節，唔通帶埋我去咩，我又唔係佢邊個」
 




「未婚妻??反正妳地都住埋一齊囉」
 
「拖都未拍呀，點未婚妻呀?」
 
「哎呀~~Suki妳想嫁人啦，唔想一個人終老啦」
 
「咁…都要佢鍾意我先得架」
 
「佢應該對妳有意思啦，如果唔係佢點解會錫妳呢?」
 
「係掛…」小祺都唔肯定，自己對學翹係感激定係真係鍾意人