係同屋室友?定係同居密友?: (S2)11. 村姑

係一個星期六中午，一位老婆婆坐係酒樓內飲茶，佢身邊仲有佢兩個女同女婿以及新抱。佢正正係苗學翹嘅麻麻，苗老太。
 
苗老太隔離坐住一個女仔，可以話係村姑，唔好誤會係某間大學女仔嘅別稱，眼前呢個女仔，真係鄉下農村嘅村姑。係經由苗老太嘅細女苗慧嫻托人介紹
 
果位村姑就好似「國產凌凌漆」中叫凌凌漆找尋晚雞數果位演員一樣，鄉土味十足，係老人家同內地人眼中，呢D就叫純品，可能仲純過4號海洛英
 
「呀，阿娟妳真係乖女，我個孫一定鍾意妳」苗老太對呢個「孫新抱」非常滿意
 
「多謝麻麻」
 




「大家都係自己人，唔洗咁客氣啦，今晚唔好返上深圳，留低係到，我叫孫仔帶妳去玩幾日，增進下感情」
 
「知道麻麻」村姑今日非常開心，上兩星期佢知道村內有人係香港親戚想搵老婆時，佢立即興奮到叫屋企幫佢安排，結果又俾人揀中，佢以為今次爭光啦，如無意外好快可以嫁去香港做香港人，再申請公屋叫埋屋企落黎住
 
所以，佢好努力咁打扮同討好老人家。今日一早佢就由深圳過關。
 
 「阿娟妳邊樹人呀?」苗老太問
 
「福田」
 




「福田妹好丫，自家人」苗老太都非常滿意
 
村姑係下晝全程係苗老太身邊照顧佢，令苗老太非常開心，苗老太好快就自己認定呢個係佢孫新抱，差在未除埋隻玉鐲俾人
 
「呀..慧嫻，妳去問下酒席D野啦」
 
苗慧嫻聽到自己阿媽咁講，佢想say no，不過佢又唔敢。呢個情況下，苗學翹個姑丈出聲了
 
「阿媽呀，你等學翹同人相處下先啦，唔洗咁急，而家d酒席都排到好遲，呢d都急唔黎架啦」
 




「係囉阿媽，妳等學翹同人相處下先啦，如果唔夾嘅話，夾硬黎都冇用架啦」
 
「阿娟我同妳講，我個孫讀書好叻，讀到博士畢業，不過佢由細到大都係男校到讀書，所以個人會比較怕羞，妳同佢慢慢傾，一定可以培養到感情嘅」
 
苗老太同D女同女婿坐低係麻雀檯打牌時候，仍然不忘推銷苗學翹，令人覺得苗老太年輕時候一定係一個好好嘅推銷員
 
係西半山嘅苗學雯一家，準時坐上LAND ROVER DISCOVERY，向尖沙咀出發
 
「媽咪呀，舅父今日黎唔黎架?」卓凝同卓賢係好鍾意佢地個舅父，因為學翹經常會做D小實驗俾佢地睇
 
「中秋節食飯，舅父一定會黎架啦」
 
「我地可唔可以去舅父屋企住一晚呀?」
 
「你地唔好打搞舅父啦，佢可能要返學校做實驗架，舅父唔係成日都咁得閒架嘛」




 
「唔……舅父好耐冇帶我地去玩啦」卓凝鼓起泡腮講
 
「咁舅父又自己一個住，佢一個男仔點照顧妳呢?妳係女仔黎架嘛」
 
卓凝雙眼碌一碌「叫上次個姐姐黎陪我地咪得囉」
 
苗學雯聽到個女咁講，立即千叮萬囑佢地仔女「你地一陣唔好亂講野呀，上次個姐姐返唔到屋企，舅父先留人地係宿舍到住架。你地亂講野嘅話，姐姐會俾人誤會架」
 
「知道」X2
 
另一方面，苗學嬛亦係香港果邊行完街，等緊黎大狀黎車佢一齊去酒樓
 
「喂家姐，我而家係銅鑼灣啦」
 




「我地都就到啦」
 
五分鐘後，苗學嬛坐上黎大狀部車
 
「家姐，姐夫。喂，你地兩個好嗎?」
 
「細姨!!」
 
「係唔係應該叫我做姐姐先啱呢?」
 
佢地一行五人非常開心咁坐車去尖沙咀