係同屋室友?定係同居密友?: (S2)13. 與村姑接觸

苗學翹係非常孝順苗老太，自從苗老爺多年前過身後，苗學翹就成為左苗老太唯一寄託，所以學翹選擇去讀Ph.D時，苗老太十分讚成，仲幫佢俾埋學費，而當年，學翹係唯一一個由苗老太湊大嘅孫，所以對佢特別寵愛有加。即使苗老爺比較錫孫女都好，苗老太依然咁寵學翹，所以學翹嘅終生大事，苗老太係非常緊張，特別係學翹父母因為意外過身後，苗老太就更為緊張
 
每一次家庭聚會，學翹都係同輩之中最早到果一個，因為佢知道苗老太最寵錫係佢。
 
學翹泊好部車後，立即快步去酒樓，先交水費，然後再去包房陪苗老太。當學翹一入到黎果時，苗老太非常高興，而村姑就兩眼發光
 
「麻麻，贏左幾多呀?」
 
「唏，你D姑丈姑媽邊夠我打呀」
 




一眾人士嘅面色已經話左俾大家知，佢地輸得有幾慘
 
學翹坐係麻麻身邊，苗老太叫學翹幫佢
 
「學翹，幫我摸一隻啦」
 
「好呀」
 
學翹一摸「自摸!清一色對對糊兩靚花，十番!多謝各位」
 




所以難怪苗老太咁錫學翹
 
呢個時候，苗學翹先發現有個村姑用色迷迷嘅眼光望住佢。當刻，學翹想兜拳窩過去
 
苗老太見到學翹已經留意到村姑，立時以為個孫仔好鍾意人地，所以順水推舟介紹俾人識
 
「學翹呀，呢個係阿娟，係姑姐係鄉下介紹俾你識嘅女仔，人家好乖架，你地後生仔坐埋一邊傾下計啦」
 
苗學翹聽到苗老太咁講之後，立時一個不滿眼神望住佢姑姐，用眼神對姑姐同姑丈講左三個英文字「WTF」
 




姑丈果然係男人，佢一見學翹嘅眼神，就立即攤開雙手話「關佢L事」
 
而學翹再用一個眼神多謝佢姑姐「多L謝哂喎」
 
不過苗學翹都唔係一盞慳油嘅燈，佢行開，拎出自己部notebook，插著插頭，connect wifi，坐埋一邊開始上網
 
村姑見狀，就坐埋學翹身邊，想同佢打開話題。佢覺得男仔上網都係睇劇之類，不過當佢一坐係學翹身邊時，就完全唔知佢做緊咩，一黎學翹係打繁體中文，二黎，佢睇緊嘅係幫Rachel手做research 嘅paper，全英文。咁嘅情況下，村姑想同學翹傾計都唔得，完全搭唔上線
 
係呢個時候，小祺就wts學翹
 
「喂喂，我今晚幫Rachel手做lab，你返黎果時通知我地，送埋Rachel走丫」
 
「冇問題呀，妳有咩食?我順便買埋返黎?」
 
「唔…糖水外賣!!」




 
「收到，我幫Rachel佢打左d discussion，sent左俾佢睇下佢啱唔啱用丫」
 
「收到!你食飯果到熱鬧嗎?」
 
「今晚同妳講啦，好麻煩」
 
「做咩呀?你屋企幫你安排相睇呀?」
 
「係呀，妳估中左」
 
電話另一邊嘅小祺見到學翹今晚被迫相睇時，不免緊張上黎
 
「對方靚女嘛?」
 




「冇我地嘅梁小祺咁可愛」
 
「你呀!!!口甜舌滑」
 
「妳呀!!做lab啦」
 
學翹同小祺係wts上你一言我一語，村姑就只有坐係學翹身邊得個望字，因為，佢唔太識英文，要佢講都有d難，更何況係journal
 
其實學翹並唔係用心睇，佢只係唔想村姑黎煩佢而已，所以佢而家就係等救星黎救佢
 
而佢嘅救星，已經落左車，準備行入酒樓