係同屋室友?定係同居密友?: (S2)09. 老人家嘅計劃

係一間屋內，有個老婆婆為自己孫仔擔心
 
今日佢個細女黎到探佢，正好同佢商量呢件事
 
「慧嫻，妳幫阿媽搵個女仔介紹俾個姪仔識啦」
 
「下!?阿媽妳做咩無啦啦要咁做呀?」慧嫻聽到自己阿媽咁講都顯得一不知所措
 
「我想快D睇住學翹結婚，再抱曾孫。妳係鄉下識人多，幫學翹搵個大陸妹，快D結婚啦。我地苗家得佢一粒孫仔咋」
 




「妳點知學翹鍾唔鍾意者」
 
「佢係我湊大嘅，我搵佢實鍾意。就中秋食飯幫佢搵個女仔返黎啦，最好純品D嘅，我唔要D唔三唔四嘅女仔做我地苗家新抱」
 
就係咁樣，苗慧嫻就被迫接受左呢一單任務，同時佢都向二家姐，苗慧蘭求救
 
「家姐呀，妳要幫下我啦，一陣搵唔到人介紹俾學翹識，阿媽鬧死我都似呀」
 
「哎呀~阿媽又係嘅，學翹30歲都未夠，咁快就要幫佢搵老婆」
 




「而家學翹幾多歲呀?」
 
「而家26，年尾11月27歲嘛，佢同阿媽同舊曆生日，同阿嬛同月同日架嘛」
 
「咁學翹鍾意D咩女仔先得架?」
 
「我點知呀?」
 
「妳個仔知唔知?」
 




「妳叫我問佢呀?不如妳問阿嬛仲好啦」
 
於是，苗慧嫻就打電話俾佢侄女，苗學嬛。一個學翹最寵最錫嘅堂妹
 
「喂，邊個?」苗學嬛係屋企敷緊mask，過多兩個月就成為大學生嘅苗學嬛，正係到睇緊佢即將入讀大學嘅資料
 
「嬛嬛，係姑姐呀」
 
「嘩，咩事妳打黎搵我呀?」
 
「姑姐有野想搵妳幫下我架」
 
「咁妳唔係應該搵大姑媽或者爸爸咩?搵我邊有用呀?」
 
「係關於妳阿哥架」




 
「有咩關於佢呀?」
 
「妳知唔知妳阿哥鍾意咩類型嘅女仔架?」
 
苗學嬛聽到姑姐咁問佢，佢立即坐唔穩，係床上碌落地
 
「姑姐妳想點呀?」
 
「妳阿麻囉，要我介紹女仔俾妳阿哥識，想佢快D結婚喎」
 
苗學嬛聽到阿麻有咁嘅要求，佢唔知點幫好
 
「呢層呀….阿哥似係鍾意D純情小花之類，不過佢上一任又唔係，佢第一個就係」
 




「咁呀……即係點呀?」
 
「即係乖乖女果D掛」
 
「咁得啦」
 
收線後，苗家嬛自己係到諗「我算唔算跣左阿哥一鑊呢?」
 
好明顯，呢舖苗學嬛跣到苗學翹一鑊999千足純金
 
苗學翹望住月曆，差唔多又到開學日子
 
今年嘅中秋節係9月中，剛剛係開學日子無耐。前幾日已經收到大伯通知，果晚要出去酒樓一家人食飯
 
每年最後果幾個月，可以話係苗家聚會日子。中秋、苗老太生日、團年、冬至，所以佢地屋企都打算只做一個，團年後過一陣又見返大家，又食差唔多嘅野，怕大家會厭。另一方面，苗老太怕D後生短時間內輸咁多麻雀數同埋俾咁多錢食飯，後生一輩會有財政壓力




 
「喂，我過兩個星期要同屋企食飯，妳有咩著落呀?」學翹同小祺講
 
「我咪留係到囉，唔通你想帶埋我一齊去呀?」
 
「妳自己識唔識煮野食架?」
 
「唔識架，你帶D飯餸返黎俾我?」
 
「我返到黎妳可能都瞓左」
 
「你地去邊到食飯呀?」
 
「唔…尖東」
 




「咁我自己搞掂佢啦」
 
「妳得唔得呀?」
 
「信我啦」