係同屋室友?定係同居密友?: (S2)08. 阿郎BOOT

星期日嘅陽光射進宿舍嘅睡房，在床上，一對同事關係嘅男女，小祺將個頭放進學翹胸腔中
 
大約到9點半，兩個人幾乎係同時間打開雙眼。小祺係學翹打開眼前將自己碌去床另一邊，然後兩個人照平日一樣，起身梳洗同食早餐
 
今日星期日，兩個人都冇咩野做，而且戲院一定好多人，甚至條街同商場都充滿休假嘅市民，所以佢地決定留係宿舍就算
 
而家正值夏天，天氣比較熱，小祺係宿舍內會著小背心加真理褲，有時會搞到學翹唔知望邊度
 
學翹再打開HKTV MALL網頁，準備訂貨為下星期做好準備。佢趁小祺唔為意果時，睇一睇condom果一頁
 




「洗唔洗買定呢…….不過買左就好似擺明車馬要同佢…」
 
學翹諗過之後，決定唔買
 
小祺之後亦坐低睇下有咩需要，當然佢自己都訂左女性用品之類
 
係佢瀏覽果時，發現左學翹嘅紀錄，佢趁學翹行開左就多手click入去望一望，發現學翹曾經睇過condom，仲要係杜蕾斯0.01
 
小祺面紅紅咁望住學翹背影
 




「你又唔追我，尋晚又偷偷地錫我，而家又睇condom…」
 
學翹一轉身果時，小祺立即close左個history
 
「點呀?妳揀齊野未呀?」
 
「揀齊啦」
 
「俾錢!!聽晚送貨!」
 




佢地而家嘅關係，仍然係一個謎
 
「尋晚…點解妳會飲咁多?仲要係烈酒喎」
 
「俾個女同學夾我飲囉，好彩有你咋」小祺雙手撓實學翹，個頭挨住人地膊頭
 
「妳隻腳仲痛唔痛呀?」學翹問下小祺情況
 
「休息左一晚，好左好多啦」
 
「咁我尋晚咁保護妳，有咩獎勵?」
 
「你想要咩獎勵?」
 
「妳渣主意啦」




 
「唔…」小祺諗一諗後，起身錫左學翹塊面一啖
 
「拿，當係架啦，我第一次錫男仔架咋」
 
學翹搣下小祺塊面「妳真係好鬼得意呀」
 
佢地呢一對室友，其實同情侶冇咩分別，可能互相之間嘅雙向暗戀，亦未知幾時會將兩個人拉埋一齊
 
現在學翹心中，小祺嘅地位愈來愈高，同樣地，係小祺心中，佢差唔多當左學翹係佢男朋友，而家可能只係爭在幾時，同埋邊個開口先。
 
係電腦中，學翹見到Timberland對阿郎boot罕有地、出奇地減價，於是佢立即拉起小祺出去
 
「唔係話星期日留係宿舍瞓一日咩?無啦啦出去做咩呀?」
 




「我見到阿郎boot減價呀，好少可會減，所以去睇睇下有冇我地個碼」
 
「我地?關我咩事呀?」
 
「唔通妳冬天果時仲著涼鞋去街咩?換對boot會好d」
 
好快佢地去到尖沙咀，一入到timberland專門店，學翹立即同sales講
 
「唔該要對阿郎boot，我平時著UK8.5…….咁要US10號唔該」
 
小祺唔太明白，於是問起學翹「點解你買大個碼呀?」
 
「一陣妳就知」
 
阿郎boot送到面前，學翹係背囊拎出一對鞋墊，再放入去




 
「阿郎boot個鞋頭比較窄身，同埋個底好硬，所以要加個彈彈鞋墊會舒服好多」
 
學翹一試上腳，果然冇俾佢估錯，著定厚五趾襪加彈彈鞋墊後，對阿郎boot變得非常舒適，而且佢買嘅仲係輕身闊身版而唔係最傳統果款
 
Sales見學翹試上腳後非常滿意，於是為左營業額，佢就向小祺埋手
 
「小姐，洗唔洗陪男朋友襯返一對?而家買兩對鞋仲再有折扣」
 
「好呀，佢著36號，應該著童裝定女裝?」學翹快小祺一步答左
 
對於Sales黎講，佢地肯買多對阿郎boot已經好開心，所以佢唔理童裝定女裝，拎哂兩款俾小祺試就最好
 
同時間學翹問Sales即場買左幾對小祺嘅五趾厚襪俾佢試鞋，再係袋中拎出彈彈鞋墊
 




最後小祺試好對女裝阿郎boot，加上所有野，小祺覺得非常舒適
 
「小姐妳男朋友真係好，幫妳準備哂所有野」
 
小祺面紅紅咁望住學翹
 
去埋單，兩對鞋盛惠$3500