係同屋室友?定係同居密友?: 60.又一次曝光

今日放工後，學翹同小祺仍然留係office，因為佢地唔想咁高調咁一齊走，所以每日都係揀6點左右先離開 
 
「佢地食飯果時，只係問妳電話?」
 
「係呀，估唔到一部電話佢地都可以聯想到咁多野者」
 
「妳地果邊女仔比較多，咁好正常者」
 
時鐘指住6點正，學翹同小祺兩個人就走去停車場攞車。當佢地行出去停車場果時，佢地身後出現左佢地上司嘅身影
 




「搞咩佢地兩個會一齊去停車場?」Roy係佢地身後跟住，當小祺上車後，佢仲以為學翹只係順路車小祺去地鐵站。誰不知學翹部車一出學校後，就直接返到職員宿舍。
 
佢地並冇為意到Roy部BMW X5就係佢地後邊，去到宿舍後，學翹泊好部車就同小祺一齊返入佢地住果座，而Roy亦目睹成個經過
 
不過佢對於有同事間發生辦公室戀情並唔奇怪，因為係總部都有兩pair夫婦係到，仲有同事同隔離部門同事結左婚
 
「青春真好….」Roy係佢部車中講，然後落車行去自己住果座
 
小祺裝好佢地兩個聽日嘅飯盒，放入雪櫃後就坐出去同學翹撐檯腳。佢地兩個嘻嘻哈哈咁食晚飯已經成為左習慣
 




晚餐後，依舊學翹去洗碗清潔，而小祺就負責開洗衣機。唔講嘅話，其他人可能覺得學翹係寵妻狂魔，基本上小祺唔洗太做家務
 
完成後佢地一齊坐係廳等待晾衫，有時小祺會將對腳放上學翹腳上晾腳
 
於是學翹就會捉實小祺隻腳，再用手指撳佢腳板，有時會痕到小祺叫救命
 
「叮噹」佢地一齊望住門口，邊個會咁夜黎撳鐘?除左保安，佢地都諗唔到有其他人
 
學翹走去防盜眼到望出去，門外企係到嘅係阿Roy
 




「喂，老細呀!!哩埋呀!!!」學翹好細聲咁同小祺講。小祺立即走去房中
 
學翹輕輕打開門，伸佢個頭出去「係…Roy，有咩事呀?」
 
「哦，我想問你借打士巴拿，我要換呔」
 
「哦，你等等下」
 
「我方便入黎嘛?」
 
「冇問題」點都唔可以拒絕自己上司要求掛
 
Roy一入到學翹宿舍，立即已經望到果幾對屬於小祺嘅鞋，同埋窗邊小祺晾緊嘅衫
 
當學翹拎士巴拿出黎俾Roy果時，佢個樣都好緊張下，呢個場面Roy真係哭笑不得，佢忍唔住踢爆學翹同小祺




 
「Suki妳出黎啦，你地個廳晾嘅衫同玄關d波鞋出賣左妳地啦」
 
睡房門徐徐打開，小祺一面尷尬咁行出黎
 
「你好呀Roy…..」
 
「呵呵，你地兩個都….收得埋喎」
 
「阿Roy，件事唔係你咁諗….小祺佢係…有原因先同我一齊住..」
 
「有咩問題?」
 
學翹望住小祺「妳自己講?」
 




「嗯」
 
「係因為…我俾屋企發現左我住嘅地方，佢地又黎問我拎錢，我今次俾左之後，所有積蓄都冇哂，所以…」
 
小祺望一望學翹..
 
「所以學翹即晚幫我執哂行李接我黎同佢做室友…」
 
Roy聽完小祺咁講後都默默唔出聲，可能佢冇諗過現今社會仲會有呢d事發生
 
「你地兩個做室友我冇問題同冇意見，不過你地明白….有人閒言閒語嘅話…就會…」
 
學翹望一望小祺「唔係呀Roy，佢話左嫁俾我架啦」
 
學翹咁講之下，Roy個腦又開始load唔到「等等先，你地唔係拍拖，但Suki妳又話嫁俾學翹?我有冇理解錯?」




 
小祺反一反白眼，終於明白「因為佢幫我還哂學債，幫我出新電話同埋Join家庭plan，所以佢係我最大債主，我之前講笑話嫁俾佢，免禮金」
 
 
「哦…你兩個嚇死我，總之，年青人嘅事我就冇咩問題。咁學翹你幫Suki申請張住戶證，我會同吳教授講」
 
「知道，唔該哂你」
 
「咁….好啦，唔阻你地啦，士巴拿聽日俾返你。」
 
「知道」
 
「聽日開始唔洗再前後腳走啦」
 
「係…」




 
Roy走左後，小祺鼓成泡腮望住學翹
 
「好啦，我係其他人眼中係你女朋友啦」
 
「你知我知咪得囉」
 
果一晚，佢地兩個依舊瞓埋同一張床，唔同嘅係，佢地兩個嘅距離近左好多
………………………………………………………………………………………………………………
從未拍過拖嘅小祺，仍未肯定自己鍾意學翹，縱使兩個人已經瞓埋同一張床
 
距離兩個人正式成為真正嘅情侶，可能只差一步
 
究竟佢地會點行落去?究竟會唔會有人發現佢地兩個之間嘅秘密?
 
係小祺嘅舊同學中，係唔係已經所有人認定佢已經名花有主?
 
學翹所面對嘅官司又會係點?肖氏一家又會唔會咁輕易就放手呢?
 
而小祺又會同屋企之間會唔會有衝突?
 
呢一pair「小情侶」將會係點?分開定走埋一齊?
 
請留意故事第二季發展
 
待續


新年快樂!!!!!!!