係同屋室友?定係同居密友?: 52. 買新裝

星期六早上，學翹同小祺一齊做家務。換床單、吸塵拖地抹窗、廁所廚房呢D最麻煩嘅地方就交俾學翹，小祺就負責其他比較簡單嘅工作
 
「呼!」兩個人一齊坐低係廳到休息，小祺清點完屋企欠缺嘅野後，佢地兩個就出去市區買野，而家佢地兩個生活，十足十一對同居小情侶咁，不過佢地欠缺嘅，就係情侶嘅關係
 
兩個人推住手推車係超市中揀野。其實兩個要買嘅野都唔多，主要係買定蔬果肉類之類，其他乾貨佢地都會用HKTV MALL上網購
 
忽然間，小祺發現自己有樣野未買，於是佢伸手掹一掹學翹衫袖
 
「喂，我有D野要買」
 




「咁行去囉」
 
「你跟住我去揀?」小祺有少少尷尬
 
「有咩所謂，大家都係室友」
 
「室友呀…」小祺呢句即使細細聲，但係都傳左入學翹耳中
 
「佢唔會亂諗野掛…」學翹心中暗自講到
 




但係望清楚小祺，佢147cm左右高，同學翹170cm左右非常襯，而且仲有一副楚楚可憐嘅小妹妹樣，加上少女身材，同埋佢自身經歷，都不禁令人好想保護佢。而小祺呢一種女仔，對學翹黎講係最大殺傷力，不過可能佢自己都唔知
 
小祺同學翹去到女性衛生用品果行，佢抬高頭望住學翹
 
「妳買M巾之嘛，有咩好尷尬」
 
小祺鼓成泡腮反擊「點知你地D男仔者」
 
學翹亦不甘示弱講「又唔係買套」
 




「咩…咩套呀，你…你想點呀?」小祺又面紅紅咁講
 
學翹搣一下佢塊面「唔好亂諗野呀」
 
佢地俾完錢，放野去車後，再去donki到買最重要嘅零用同埋雪糕，大熱天時，最緊要有雪糕係屋企，佢地兩個真係拎住架車不停揀雪糕
 
「喂，妳就m到，仲食到咁多咩」
 
「咁會有m完嘅一日架嘛，最多咪一星期」
 
「哦，我jot低先，一星期」
 
「你記黎做咩呀?」
 
「咁記低果d日子，有咩妳唔食得之類都要架」




 
小祺聽到學翹咁講，咀角微微向上，心中暗暗一甜，幫佢加左分
 
將雪糕放埋入保冷袋，加少少乾冰，佢地今日購物之旅就完成，正當佢地準備返宿舍時，學翹先問起小祺
 
「妳係咪下個月有同學聚會?」
 
「係呀，做咩呀?」
 
「妳想點著去?」
 
「咪咁囉，我都冇咩衫」
 
學翹上下打量小祺後
 




「妳叫Rachel幫妳執下啦，妳返工去街都咁嘅look，怪唔之冇男仔睇得上妳啦」
 
小祺俾學翹咁講法，就立即叫Rachel出黎，估唔到Rachel都同意學翹嘅講法，於是佢地三個就一齊去揀下衫
 
「Suki妳不如試下著裙啦，妳日日返學都係果兩條褲，我懷疑妳係咪冇褲著」Rachel對住小祺講
 
「佢真係好似得幾條，仲要係同色同款」學翹加把咀落黎
 
「衫呢?」
 
「咁多件都係剩色，或者只有細公仔係上邊，通常係Uniqlo大減價時買，襪都係，鞋就得果幾對」
 
「咁呢d叫咩?」
 
「宅女」




 
學翹同Rachel好夾咁一唱一和，小祺就企係到聽
 
「好啦好啦，我嘅情況你地兩個又唔係唔知」
 
「而家咪買少少幫妳改變下囉」
 
Rachel都係帶小祺去Uniqlo，不過係再幫佢執過個look，買左幾條裙同褲，然後再買左幾對鞋、平底涼鞋同平底鞋
 
當小祺著上個新配搭之後，佢真係成個人都唔同左
 
「拿!咁咪幾好囉」
 
學翹亦都點頭讚同，於是，佢就叫人包哂所有野，同Rachel爭住簽咭儲分
 




返到宿舍，小祺同學翹合力執好哂由超市買返黎嘅野後，坐低食雪糕，一拎起雪糕，小祺就非常開心咁食
 
「妳唔洗減肥呀?」學翹見狀問道
 
「下?去同學聚會之嘛，邊洗專登減肥，我買左衫同鞋都已經好好啦」
 
「下個月幾時呀?」
 
「做咩呀?你想跟埋去呀?」
 
「我係準備車，我怕妳又飲醉酒，妳知妳架啦」
 
「咩喎，上次係意外」
 
「好彩妳冇嘔咋!!」