係同屋室友?定係同居密友?: 50. 還學債

晚上，小祺係沖涼後敷住mask係洗手間行出黎，學翹好奇怪咁望住佢
 
「做…做咩呀?」
 
「冇呀，見妳敷mask，有d奇怪」
 
「咁…下個月我d中學同學有聚會，我…補下皮膚，想靚少少出席者」
 
學翹聽到小祺咁講，佢頭上嘅天線好似接收到一d訊息
 




「妳要扮靚?有心上人係到?」
 
小祺聽一聽後，塊面紅得好犀利。的確，學翹講中左，小祺個心上人會係下次舊同學聚會中出席
 
但係純粹係因為出席舊同學聚會的話，小祺都唔太會打扮出席，但係上次學翹叫佢保養下皮膚後，佢先決定用護膚品之類
 
「妳係海邊d舊同學知道妳係呢度住未呀?」
 
「Rachel?佢知道啦」
 




「係咪好驚訝呢?」
 
「少少啦，不過佢相信你唔會對我做d咩，而且佢擔心我傷勢多d」
 
小祺敷完mask後，入洗手間搽護膚品之類，真係敷個mask後，塊面舒服左好多。以前嘅自己真係太懶啦
 
學翹拎住佢本TIME係到睇果時，小祺走出黎坐係佢身邊
 
「阿翹呀….我想呢…」
 




「咩事?」
 
「我D學債，我想快D還左佢，所以我想…」
 
「俾學生資助處個戶口我，我幫妳還哂去」
 
「還哂?我打算問你借一至兩期先咋，而且一次過還要寫信解釋….」
 
「寫信咋?我叫姐夫幫妳寫咪得囉」
 
「你傻架?叫個大狀幫我寫信」
 
「咁我幫妳打啦，話妳未婚夫幫妳一次過償還哂所有債務，咁樣得未?」
 
「未婚夫呀…..」小祺望住學翹




 
「定係我打golden beetle husband?」
 
「照….照你意思打啦…我會慢慢還俾你……你唔計息架?」
 
「我又點會計妳息」
 
「係就最好啦」
 
佢地兩個坐係梳化上，小祺已經係到住左一星期，佢一早就習慣係呢到生活，如果佢同學翹都唔結婚唔拍拖的話，佢地兩個好大機會同居到退休果日
 
小祺每日食午飯嘅時候，佢總係會返上總部度食，而學翹就會留係自己個位果到。有時小祺可能下晝又會返上總部果到做野，總之佢地兩個好少可係工作時間上有接觸，就算係傾計，都只係傾公事，所以根本冇人估到佢地兩個係同居關係，暫時佢地兩個都算收得密
 
今日小祺係總部一打開個飯盒，就有幾個同事走埋黎睇
 




「Suki妳最近個飯位嘅風格轉左呀?」
 
「係囉，之前妳d飯好簡單咋喎」
 
「唔係呱…我之前煮野真係咁差咩?而家個飯位真係同之前相差好遠呀…」小祺聽到同事咁講之後就自己咁諗
 
「呀…最近學左點煮野者…唔洗咁驚訝」
 
好在小祺係office係屬於靜嘅人，所以d同事圍一圍佢就行開左
 
「好彩唔係響阿翹果邊食者，俾人見到兩個飯盒係一樣嘅野，真係唔知點樣解釋好」
 
不過小祺似乎將一個人遺忘左，果個就係Roy，佢同小祺同樣兩邊走，有時都會打開樓下雪櫃去雪野飲，而佢最近發現小祺個飯盒d飯餸係多款左。之前小祺通常都係蛋、菜，菜同蛋、豆腐呢d易整嘅野
 
不過由於係人地嘅飯盒，所以佢都冇再細加鑽研