係同屋室友?定係同居密友?: 46. 原因

「佢地對妳做左好過份嘅事?」
 
小祺輕輕點一點頭
 
「但係佢地係妳親生父母喎」
 
「嗯，只不過佢地個名出現係我張出世紙上邊咁多，同埋俾最基本嘅野我」
 
小祺唔理自己著緊真理褲，佢一對白白嘅腳就咁縮起用雙手撓住。個頭微微向側，挨住學翹膊頭
 




「最基本嘅定義，係指供書教學?」
 
「唔…可以咁講嘅，例如…會安排我讀書，咁樣囉」
 
「但係妳生活呢?」
 
「我生活?我係保良局長大，由10歲開始」
 
「妳有親生父母，都要去保良局?」
 




「嗯，因為佢地將所有資源、心機同埋愛俾哂我細佬，佢細我4年。但係唔代表我人生最初果4年過得好開心」
 
「點解…佢地要咁做?」
 
「因為，我父母係客家人，仲係最傳統果隻，所以點講呢…唔…佢地認為女只要嫁到人就得，而仔就…」
 
學翹搶先小祺講「仔就最好讀多D書，出黎做官。D女就留係屋企湊仔幫手落田，男人係屋企就做決策，係唔係?」
 
小祺聽到學翹咁講就好快坐直個人「你點會知架?」
 




「禾洞系客家練哦」(客家話，我都係客家人)
 
小祺聽到學翹D客家話，忍唔住笑左出黎，呢個係佢兩日黎第一個笑容
 
「真係好唔掂呀?」
 
「比你D普通話好少少咁啦」
 
「扔你唉志白」
 
「喂!!我識聽架!!你真係只係識講呢D野架?」小祺笑到肚痛兼流眼水
 
「所以妳就唔受屋企重視?」
 
「嗯，再加上臉上嘅胎記，所以我屋企冇人鍾意我，不論阿爸果邊同阿媽果邊都係。而且佢地係好信D江湖道士，咩都要去問廟祝。係我細佬出世幾年後，有一個唔知咩廟祝話我地兩姊弟有不祥之相，會危害屋企。咁啱果排又有屋企人病危，於是就安排做場法事，個道士唔知整左D咩野，隻杯佢一甩手就係我面前跌爛左，從此我就俾所有人當係不祥人。係我4年級果時，我細佬屈我打佢同話我偷錢，當我放學一返到屋企我俾阿爸打到全身傷哂，我當時都唔知發生咩事，立即走出街，有途人見到我流哂血咁，就帶我去警署，從此我就離開左屋企。」




 
小祺靜一靜
 
「不論我細個點努力讀書，係學校拎幾多成就獎，我父母都係唔望我一眼。相反我細佬由細俾佢地寵到大，佢要乜有乜，佢永遠做事都唔會錯，錯嘅只有佢家姐」
 
「呼，我係兩個家庭中的第一個入到大學，但係佢地連望都唔望我一眼，只係哦左一聲就算。我係ug個畢業禮，係冇人黎睇我，個個同學有屋企人黎睇，只有我一個孤伶伶參加畢業典禮。」
 
「咁妳細佬呢?」
 
「佢DSE都唔合格，但係求其搵d學店，讀d咩美國學院嘅遙距課程。我父母以為佢係讀外國名大學，就要我唔讀PG出黎做野供細佬讀書。我一聽到咁之後，就立即搬走，希望唔洗再見到佢地，點知….之後你都知道哂」
 
學翹伸手摸一摸小祺個頭
 
「妳而家係我呢到，唔洗驚啦，冇人會再蝦妳」
 




「真係?」
 
「有我係到保護妳嘛」
 
小祺聽到學翹咁講，個心甜左一甜，而佢心中，亦泛起左小小嘅漣漪