係同屋室友?定係同居密友?: 47. 有名嘅鯊魚

學翹部電話再響起有wts嘅訊息聲音，佢一睇，又好快放返低部電話，如是者，學翹部電話經常響起，連小祺都問佢咩事
 
「哦，個前女友者，成日煩住我」
 
「可能人地想搵你復合呢」
 
「冇可能啦，佢一定係有目的」
 
「你肯定?」
 




「佢一家人係貪我父母層樓，想我加佢名可以分錢」
 
「我記得上次你有提過」
 
「到今日佢地一家人仲係死心不息呢」
 
「其實你可以block左佢地架」
 
「佢地用太空卡，唔block得幾多」
 




差唔多時間，學翹去拎佢嘅睡舖出黎，而小祺好識趣咁問佢
 
「你洗唔洗要返鯊田友呀?」
 
「鯊田友俾妳攬啦，我攬『愛鯊尼亞』」學翹拎第二條大鯊魚出黎同小祺打招呼
 
「妳好，我係愛鯊尼亞」
 
「你每條鯊魚都幫佢地改名架?」
 




「係呀，呢條叫尖鯊咀、呢條鯊田、鯊角、鯊咀、長鯊環、鯊田圍、鯊中線、鯊頭角、鯊士比亞」
 
小祺當刻先覺得，房入邊張床唔係俾人瞓，係俾鯊魚瞓嘅
………………………………………
「點呀?佢仲未覆妳呀!?」肖太太係到炮轟個女
 
「佢都係冇覆」肖翠君一臉不悅咁講
 
「明明放到去咀邊，咁樣都俾隻肥羊走左去，妳睇妳丫，有咩用丫，千計萬計都可以計漏佢堂家姐，一開始妳就好氹佢應承妳加名先啦」
 
「冇人叫妳個樣咁貪架嘛，妳個貪樣出哂黎啦」
 
「妖!佢再唔加名就搵人告佢，上網唱衰佢，爆哂佢D野出黎」
 
「佢有咩俾我爆呀?」




 
「妳咪話佢，佔左妳便宜唔認數囉」
 
「妳估冇人信丫」
 
「咁唔係點呀!點都要佢加名俾我地!!」
 
「妳諗掂自己先啦!叫左妳低調D，唔好乜都講俾人聽啦，而家俾人檢查，扣哂15分要收屋啦!!」
 
「收咩屋呀!唔俾收!」
 
「而家人地出哂信下星期一前要搬走啦，否則會強制我地離開，妳D垃圾都俾人一次過扔哂呀」
 
肖翠君一家俾人報串話佢地內地有大量資產，又真係俾房署查出左，而且又發現多項違規， 一扣之下15分就俾人扣哂，即將要搬離公屋。佢地搵區議員都冇用，咁完善嘅制度下，社會上邊會有不公平嘅事實，搞事嘅一定係黃絲
 




「推妳家姐出黎咪得囉，佢有殘疾」
 
「喂，白咭呢?」
 
「洗乜白咭呀!?一睇佢個樣就知啦」
 
「果時人地上黎查果時，妳堅持話佢正常冇問題喎，而家點推佢出黎呀」
 
「咁唔係點呀!?一係叫佢俾我地去九龍間屋到住囉」
 
「妳上次都入唔到去啦!同埋都租左俾人啦」
 
「咁又點呀?趕佢地走囉!間屋我地架嘛」
 
「叫左妳唔好咁大貪架啦!慢慢黎一步步咁行，妳一開始就獅子開大口，係人都睇到咩事啦!」




 
距離佢地一家人搬出期限仲有幾日，佢地一家人仲諗緊點樣先可以將層樓整到自己手上
 
係限期到之前，肖氐一家死死地氣咁將有用嘅野帶走，臨走前仲要留低大量垃圾係單位。原先佢地計劃去住酒店再問學翹拎返錢，但佢地連呢少少錢都唔想拎出黎，所以佢地只有漏夜趕過關，返去深圳鄉下間屋到落腳，然後再諗返香港拎返佢地「層樓」
 
不過學翹一早就估計到佢地一家會再用盡方法搶樓，所以層樓放租時，業主係寫佢家姐以及自己名，總之冇兩個業主同受託人同意，肖氏一家根本係冇可能搶到層樓
 
而且佢地都冇咩機會搵到學翹