係同屋室友?定係同居密友?: 45. 正式入住

「唏呀~唏呀~」小祺係到將佢自己嘅衫掛上衣櫃。學翹間房，應該話佢同小祺間房有個大衣櫃，小祺係喼同紅白藍袋拎哂D衫出黎放入衣櫃。另外學翹將幾個櫃桶分左俾小祺，佢自己嘅貼身衣物就放係果度。
 
係玄關嘅鞋櫃，小祺嘅鞋放左係高嘅兩格，而學翹就放係下兩格
 
洗手間鏡箱中，因為小祺唔太識保養自己，所以佢好少護膚品。佢地亦將鏡箱一分為二
 
係書房，就清左一個位置，足夠放書檯同書櫃，兩個人嘅電腦/Macbook都放左係呢度。原本打算放張床褥係書房地下，學翹瞓地下就算，不過望見張可以變床嘅梳化放左係廳到，所以決定唔好嘥，學翹瞓廳就算
 
計劃好後，佢地就一齊出市中心IKEA買所需嘅野，順便食個歡迎室友飯。佢地揀左間好普通嘅拉麵就算
 




學翹將同小祺嘅野搬上車後，佢地就一齊返宿舍。當然去得IKEA，學翹就會買條鯊返屋企
 
學翹係書房拆哂所有包裝，清理好後就開始裝磡小祺書房嘅野。而所有錢，都係學翹一個人出哂
 
「出糧後…我會俾返錢你，仲有屋租…」
 
「係我叫妳黎陪我一齊住架喎，妳估我會收妳錢咩?」
 
「但係要你用咁多錢…」
 




「我每個月舊屋收租都$18000，宿舍呢到算得係咩?」
 
「但係…如果俾同事知道嘅話….就算係話室友，都不免閒言閒語…」
 
小祺仍然好擔心，於是學翹就講「我會同老細講架啦，所有野都有我頂住，妳放心啦」
 
學翹將小祺所用嘅家具安裝好後，就去準備當晚嘅晚餐
 
佢地食完晚飯後，學翹去洗碗、小祺去整理自己嘅野。當兩人沖完涼，開左洗衣機後，大家一齊坐係梳化上等待晾衫，期間學翹幫小祺洗傷口同搽消炎藥膏
 




「唔該哂你…咁夜都拎D野黎俾我…又肯收留我…」
 
「妳呀，無啦啦走去割脈，會死人架知唔知呀」
 
小祺就好似一個做錯事嘅小朋友咁俾人教訓「知道啦…」
 
「妳欠落幾多學債呀?」
 
小祺計一計「大約30萬左右啦」
 
「咁好快還清者，妳還清之前都可以同我做室友」
 
「咁…你結婚點算呀?」
 
「我結婚?」




 
小祺點一點頭
 
「女朋友都冇呀，同左手結婚呀?」
 
「咁將來會有架嘛」
 
「可能妳嫁先呢」
 
「呢個絕對唔會，我肯定」小祺指一指自己左邊臉上權骨位嘅淡淡胎記
 
「唔好咁睇自己」
 
「就係因為呢個胎記，我先由細到大俾屋企輕視」
 




學翹望住小祺臉上嘅胎記，再伸手摸一摸，呢一下，小祺心中突然出左少少變化，可能佢自己都唔知。
 
一直以來，小祺心中最鍾意果個男仔，係佢由F.4-F.6嘅同班同學。果位男同學同學翹差唔多高，係學校嘅籃球隊隊員，成績一直係小祺之上，當年小祺被稱為「萬年第二」，就係因為佢永遠都輸俾果個男同學。可惜，人家一早就名草有主，對方係同班同女學，同佢襯到絕。所以小祺多年黎只係將呢份感情永遠埋藏係心中。