係同屋室友?定係同居密友?: 44. 離開劏房

小祺聽到門外嘅人係學翹後，唔理自己而家有幾狼狽，佢立即打開門攬實學翹大喊
 
「Su…Suki…妳做咩事呀?」學翹一面不知所措
 
「我…..我俾…..」小祺咁樣講法，只要有少少常識嘅人都會覺得，佢受到女性極大嘅傷害
 
「我地立即報警啦!!!」
 
「唔…唔係你諗果d呀…」
 




學翹帶小祺坐低，俾杯水佢等佢慢慢平伏左先。見到佢左手手腕上同臉上嘅血痕同掌印，學翹就膽粗粗咁估
 
「妳…俾屋企人打呀?」
 
小祺眼中再次流出淚水，連連點頭
 
「佢地仲拎哂我近來儲嘅錢….我下星期都唔知點交租同還學債啦….」
 
「妳呢到幾錢一個月?」
 




「7000….」
 
學翹望一望小祺間套房，如果佢要執，大約只需要半個鐘左右，於是佢問小祺拎左個喼，仲有兩個紅白藍袋
 
「你…你做咩呀?」小祺依然有少許嗚咽咁問
 
「妳呢到7000一個月，而且又俾屋企人發現左，即係佢地都住附近係唔係?」
 
小祺輕輕點頭
 




「所以……妳搬黎宿舍同我一齊住啦」
 
小祺一聲不發望住學翹
 
「妳想繼續住係到，繼續俾妳屋企人打?」
 
小祺擰擰頭
 
「咁妳考慮成點?」
 
小祺靜靜地企左陣後，然後輕輕點頭
 
當學翹見到小祺同意後，立即幫佢執好哂所有野，然後帶住小祺離開。走之前，佢打左俾業主，話而家退租
 
業主覺得奇怪，點解小祺會走得咁急，但當佢黎到見到學翹企係佢身邊後，就以為小祺搵到男朋友，所以佢都冇問太多問題，退回按金，小祺交低鎖匙後就跟學翹上車，返去宿舍，成個過程只係用左120分鐘左右




 
係車上，小祺一言不發，而學翹都唔打算煩佢，等佢自己靜下
 
30分鐘後，佢地去到宿舍附近買左少少野食，再返到宿舍
 
「阿翹呀….如果俾人知道左我同你一齊住嘅話…….」
 
「有咩所謂，大家咪室友關係囉」學翹安撫小祺嘅不安
 
學翹問樓下保安借左板車後就將小祺嘅行裝放上樓，還車後，小祺先去沖涼，換上學翹俾佢嘅家居服
 
小祺估唔到離開兩星期左右，自己又會返黎宿舍，而且今次應該係長住落黎。慢慢食完佢地買嘅野後，小祺心情已經完全平伏，至少而家自己有個地方居住，可以避開屋企人
 
學翹拎出紗布繃帶，幫小祺包好左手手腕，然後再幫佢左臉頰上搽上消炎藥膏
 




「以後唔好咁傻啦，割脈唔係好玩」
 
小祺點頭知道
 
「妳快d瞓先，有咩事聽日再算知唔知?」
 
「嗯」
 
然後學翹又口窒窒咁問
 
「咁….妳洗唔洗我…陪妳?」
 
係呢個時候嘅小祺，的確需要有人係身邊保護佢，所以小祺點一點頭
 
「咁妳攬住鯊田友瞓住先啦」




 
「鯊田友?」
 
學翹指一指小祺成日攬住果條IKEA鯊魚「佢叫鯊田友」
 
到果時小祺先知，原來學翹屋企每一條鯊魚，都有自己嘅名
 
於是小祺就攬住鯊田友，瞓上床休息
 
合上雙眼，好快佢就太攰瞓著左
 
佢地兩個嘅同居生活，正式開始