係同屋室友?定係同居密友?: 40. 同床

「你…今晚可唔可以同我孖舖呀?」
 
學翹個腦不停咁重覆咁Loop幾句說話，就好似解剖外星人咁一連五晚重覆重覆又重覆咁同大家睇真d
 
「妳…做咩事呀…妳唔似咁….」學翹口窒窒咁講
 
雖然小祺只係得32A，但係佢都有少少野睇嘅，因為小祺細粒又唔肥，所以32A都顯得佢有胸一般，同埋佢下半身D肉多上半身，所以小祺正確黎講唔係瘦嘅燒骨，佢係一舊半肥瘦叉燒
 
學翹一時間唔知俾咩反應小祺好，佢地兩個人就咁目目呆咁企係到，而小祺就頭耷耷面紅紅咁
 




「Suki…妳有咩事呀?」
 
「我….我好怕呢d風聲….唔敢自己一個人瞓」
 
「但係妳平時…」
 
「我係套房果到，窗唔多又矮，所以冇呢d聲。以前因為我同細佬同房，我知道佢係到，我先冇咁驚，但而家….」
 
學翹靜一靜，佢個心都掙扎緊，保護個女仔好唔好?但係一男一女瞓係同一張床上，有點兒那個…係突然間，學翹諗到一個解決方法
 




「我可以陪妳係呢間房到瞓冇問題，但係我唔會同妳孖鋪同一張床上嘅」
 
「唔通你瞓地下咩?」
 
「冇錯!就係瞓地下」
 
學翹係衣櫃中拎左一張氣床褥出黎再舖係地上
 
「我係床邊瞓，咁妳咪唔洗驚囉」
 




「唔該哂你呀」
 
「咁樣…應該唔會搞到咁尷尬掛…」
 
「唔好意思…我真係好驚…」
 
學翹打開睡袋，而小祺就爬入被窩，攬住大鯊魚
 
但係學翹係瞓之前，通常習慣會睇一陣書先，而小祺係度住左幾日，佢開始摸清學翹嘅習慣，所以佢幫學翹開左床頭嘅書燈
 
學翹去完刷牙返到入房，見到床頭燈著左，佢望一望小祺
 
「我知你瞓前一定會睇陣書，所以幫你開定燈」
 
「估唔到妳又幾好觀察力喎」




 
「咁係到住左幾日，都應該要知道你嘅生活習慣架嘛」
 
學翹愈來愈覺得呢個女仔好細心，雖然有時又幾大頭蝦，但係佢做野好盡責任
 
「妳真係唔介意?我瞓地下?」
 
「其實應該我瞓地下先啱，如果唔係你收留我嘅話，我而家應該係office用三張椅拍埋當床咁瞓。然後每日都去gym room浴室沖涼洗衫，同埋日日坐係自己個位到趕功課。邊得黎而家咁樣，有得打邊爐、食雪糕、打遊戲機同埋瞓大床涼冷氣」
 
「妳係客人，我當然唔可以要妳瞓地下啦，而且仲係d氣床褥，真係瞓得唔舒服架」
 
小祺聽到學翹咁講，知道佢而家地下果張氣床褥係露營用黎瞓一兩晚後，佢就立即落床，將學翹嘅枕頭放上床然後將大鯊魚放係中間
 
「Suki妳搞咩呀?」
 




「你上黎瞓啦，我唔講你唔講，冇人知我地孖舖。而且….俾人知道我黎你到過夜，個個正常都會亂諗，我地知道我地清白就得啦，邊洗理人點睇」
 
聽到小祺咁講之後，學翹就瞓上床
 
「而且我地中間隔左條鯊魚，你點都過唔到黎掛。最重要…我信你唔會同我有不法企圖」
 
學翹見到小祺咁樣，佢就聽話，第一次同唔係自己女朋友嘅女仔同床孖舖
 
「妳冇鼻鼾架?」學翹再問小祺
 
小祺亦都不甘示弱「你唔好係被入邊放屁呀」
 
「妳係到我一定唔會」
 
「如果我唔係到呢?」




 
「會」
 
其實，應該冇人唔會係自己張被入邊放屁掛