係同屋室友?定係同居密友?: 39. 請求

學翹係書房拎左部Switch ring fit出黎，然後遞俾小祺。小祺只不過24歲左右，就算平時幾摺都好，佢一定會見過呢部遊戲機
 
「我仲以為你唔會打機添，估唔到你都會有SWITCH喎」
 
學翹有少少尷尬咁講「其實我間唔中都會打下遊戲機嘅，不過係少打，同埋之前讀書趕功課，所以少玩」
 
「其實我都唔太識打機，你要教教我喎」
 
學翹開左隻運動冒險出黎俾小祺試玩，呢隻Game好呀，可以玩之餘又可以做運動，一舉兩得
 




「玩咩運動好呢……」小祺係到揀，因為佢自己唔係太叻運動，所以唔知點揀
 
於是學翹就幫佢揀左羽毛球，遊戲一開始，小祺就展示出佢運動白痴嘅一面
 
「妳唔係呀?連最易Level嘅電腦妳都輸呀?」學翹簡直不能相信呢個事實
 
「咁…我運動真係唔叻丫嘛!!!你笑我嘅!!!」
 
其實呢個已經唔係運動叻唔叻嘅問題，呢個應該係智商上嘅問題
 




「妳…妳睇定d先，咁樣…」學翹嘗試用聲控黎教小祺玩，可惜，只係俾之前好少少。而家應該係理解上嘅問題
 
「你快d教我玩啦!!」小祺邊笑邊講
 
於是學翹走到小祺身後，捉住佢雙手，教佢點玩
 
呢個moment，佢地兩個玩到好開心，因為小祺終於拎到第一分
 
「點呀?仲玩唔玩呀?有d仲刺激喎」學翹再開第二個game俾小祺
 




呢個犀利囉，又要全身郁，又做無數動作，今晚小祺用係打機上嘅運動量，差唔多係佢平時一個月所做嘅運動加埋嘅總和
 
佢辛苦左一個鐘後，全身大汗，不停深呼吸
 
「爽嘛?」
 
「我夠啦，再玩會冇命架啦」
 
「我沖左涼架啦，妳去沖涼先啦」學翹接過部機，開左機械人大戰黎玩
 
小祺係浴室好舒服咁沖涼
 
「救命，差d死咁滯……對上一次咁開心…都好似係中學果時啦…」
 
沖完涼後，小祺用毛巾包實個頭出去再吹頭，其時佢見到學翹打機好緊張個樣，於是佢都坐係學翹身邊一齊睇，估唔到佢都會緊張埋一份




 
「劈佢!!!劈佢!!!」小祺攬住條IKEA大鯊魚好肉緊咁講
 
佢地呢個遊戲持續左90分鐘，兩個人終於叫攰。轉台睇睇新聞，個風距離香港仲好遠，但係風力已經達到8號烈風程度，烈風不斷吹，即使開左冷氣，風聲依然從不同地方發出
 
小祺由細個開始，已經最怕呢種風聲。細個果時，因為佢同細佬同房上下格床，佢自己知道有人陪佢瞓所以冇咁驚。讀U住hall時，一眾大學生都不知打風為何物，學生宿舍內無時無刻都非常熱鬧。然後小祺自己搬去套房後，因為房中只有小窗一個作為通風，所以打風時風力唔太強勁
 
但係今次，學翹宿舍處於郊外，所以顯得特別大風
 
小祺聽到風聲，開始擔心會自己一個人瞓唔著
 
學翹轉台睇風暴消息，當時風力持續增強，天文台提早懸掛9號風球，照目前情況，星期日早上發出10號風球嘅機會都唔細，可能去到星期一下晝先會落哂波，照市面情況，可能星期二同三都怕要停工
 
到11點半，學翹拎出睡袋時，小祺對住佢講左句好有震撼性嘅說話
 




「阿翹呀…..你呢….可唔可以…..」小祺低頭面紅紅好細聲咁講
 
「咩事呀?」
 
小祺深呼吸一啖氣，鼓起勇氣咁講
 
「你今晚可唔可以同我孖舖瞓呀?」