係同屋室友?定係同居密友?: 35. 多留數天

當Rachel一見到Suki又去左人地宿舍到留宿果時，佢個腦立即hang左，唔知點俾反應好
 
「妳放心架啦?始終係一男一女」
 
小祺聽到Rachel咁樣講後就安慰返佢轉頭「妳放心啦，之後我都試過同佢一男一女共處一室，我覺得佢唔係壞人黎嘅」
 
「咁妳要小心d啦，妳點解問我識唔識驗重金屬?妳幫我手?」
 
「唔係呀，阿翹話會幫妳手呀，佢以前驗慣重金屬」
 




Rachel聽到呢個消息後非常開心
 
學翹同小祺兩個人一齊執碗碟後再清洗，然後小祺坐係梳化上睇電視，而學翹就拖地收衫
 
「Suki妳係咪得咁多衫咋?」學翹係騎樓大聲問出去
 
「係呀!做咩呀?」
 
「我準備開機啦」
 




小祺聽到開機就意識到，學翹係準備開洗衣機洗衫，所以佢好快咁行去騎樓，因為自己d貼身衣物應該自己洗比較好
 
「阿翹呀，我d胸圍底褲呢…」
 
「哦，入左網袋架啦，一齊洗囉」
 
「但….但係..」
 
「哦，我唔會同人講妳24歲仲著卡通人物底褲同胸圍」
 




小祺聽到學翹咁講，佢塊面立即紅過紅蘋果，畢竟俾個唔係自己男朋友嘅男同事知道自己上圍Size同著卡通底褲，的確係幾醜
 
「咁樣…會唔會煩到你呀?」
 
「傻啦，我試過幫我堂妹洗底褲架啦，我唔介意幫女仔做呢d野」學翹講完就關上洗衣機門，開水開機
 
「我好似成日都麻煩到你咁…我成日諗要點報答返你」小祺低頭細聲地講
 
學翹摸一摸小祺個頭「妳想報答我呢，就快手搞掂埋Professional diploma module 6個project佢啦」
 
 「呀…係喎，我仲有個project喎」
 
「有冇帶料黎?我可以同妳一齊做喎」
 
「當然有啦，不過都係聽日先啦」




 
「一日之內可以幫妳搞掂哂」
 
「又要麻煩到你啦」小祺再次雙手合十
 
返到客廳，佢地各自拎部Notebook/Macbook出黎上網，見到外邊一片凌亂，萬幸之中，學校有宿舍提供，而學翹又同意入住，如果唔係，佢地兩個可能同其他市民一樣，要係地鐵站內、去酒店甚至臨時庇護中心留宿
 
電視新聞中播出市面上嘅情況，道路嚴重水浸，交通癱瘓
 
「今次妳似乎要留係到住多幾日啦」
 
「真係?」
 
學翹開個天氣圖出黎俾小祺睇「妳睇睇，而家剛上三號，風力開始增強，而且個風結構完整緊密，環流雨帶愈來愈強。妳估下代表咩?」
 




地理學對於小祺黎講，完全係一個惡夢，佢係中學時代，地理都係剛剛好合桔
 
「代表…打大風?」
 
「冇錯，亦代表有大風雨，所以妳可以放心留係到做功課啦」
 
隨住洗衣機嘅音樂傳出，亦代表洗好衫，所以學翹就拎個大衣架出黎掛好兩個人嘅衫，佢地嘅內衣褲就貼係對方隔離
 
然後學翹拎個套出黎一下套實整個衣架連衫，再將暖風機插好電掣再開著
 
「搞掂!咁就唔怕d衫唔乾」
 
「有呢個野真係好好喎，不過我間套房放唔落啦」
 
「妳平時洗完衫都係就咁晾?」




 
「係呀，通常儲埋一次過洗同焗，胸圍底褲就手洗囉」
 
「妳咁樣好攰架喎」
 
「冇辦法啦，慳得就慳」
 
開完焗衫神器，再睇一睇風暴消息。而家仍然係3號，預計第二日會掛8號
 
「妳鍾意食咩做早餐呀?」學翹邊拎睡袋邊問小祺
 
「嗯…冇所謂，公仔麵都可以」
 
「收到，鎖匙係到，妳要唔要?」
 




「唔洗啦，我信得過你喎」
 
小祺打開房門，可以俾自己望到外邊，最大原因，係佢好怕行雷，所以如果有人係佢附近，佢會安心好多。係床上，佢攬住學翹係IKEA買嘅大鯊魚，好靜咁進入夢鄉。平時行雷閃電嘅夜晚，佢總係瞓唔著，但係而家係宿舍中，佢可以瞓得好舒服，好放心。