係同屋室友?定係同居密友?: 34. 試探

「你…有冇女朋友?」呢一句說話傳到學翹耳中，然後口中嘅牛肉立即落錯格
 
場面有少少尷尬，學翹望住小祺
 
「妳…做咩無啦啦問呀?」
 
「你唔好誤會呀!!!我只係覺得，你咁好人，條件又唔差，但係成日都留係宿舍，冇咩見你話會去街拍拖咁樣」
 
一提起女朋友，學翹就有D驚。始終上一次，佢付出左好多後先發現，對方搵佢做羊牯，難免有少少驚
 




「哦，我呢，而家係A2」
 
「幾耐先?」
 
「我同佢呀?唔?拍左幾年啦」
 
「PhD同學?」
 
「唔係呀，我以前舊公司同事」
 




小祺都係一個普通女仔，而八掛係女仔嘅通病，梁小祺都唔例外
 
「你地分開左幾耐?」
 
傾呢D男女間嘅問題，的確可以傾好耐，特別係打邊爐嘅時間
 
「大約…唔…我搬黎宿舍前…即係我放長病假果段時間咁上下」
 
「即係都三個月啦喎，因乜野事分開呀?性格不合?」
 




學翹個腦立即諗返起肖氏一家對佢所做嘅事，佢亦毫不保留咁講哂俾小祺知道
 
「佢地呀…當我工具人啦、提款機、司機，開口埋口都係錢。最過份係想將佢地個名加落我屋企層樓到」
 
「咁你有冇加到呀?你唔好同我講你咁大方喎」
 
「我就當然唔會啦，我層樓有我堂家姐個名係到，佢同姐夫會幫我守住我父母嘅心血」
 
「好奇怪你可以忍受到幾年」
 
「我都唔知呀，可能果時盲左掛」
 
小祺諗起，以前學翹係做實驗室，所以佢乘機問一問，應該係話幫Rachel問一問
 
「你識唔識驗重金屬架?」




 
「重金屬?識呀，妳想我用咩機?ICP-OES?ICP-MS?定係打AA機?」
 
聽到學翹識驗重金屬，小祺立即發出邀請
 
「我個同學，即係上次一齊黎果個女仔Rachel，佢讀PhD，個Topic關於海heavy metal，所以睇下你幫唔幫到佢」
 
「佢係chem人?」
 
「都可以話係嘅」
 
「佢唔識用機呀?」
 
「咁就肯定，佢anal chem都係take左一個sem就算」
 




「咁樣…佢想我教佢用機?」
 
「可能佢想你幫埋佢run機添啦」
 
「咁佢份paper我要排third喎」
 
「咁我幫你問下佢?」
 
「成交」
 
當學翹話冇問題果時，小祺立即用電話whatsapp Rachel
 
「喂喂，妳係咪煩緊點驗Heavy metal呀?」
 
好快Rachel就回覆「妳顧掂妳自己先啦，返唔返到屋企呀?」




 
「我?我返唔到呀，地鐵又上唔到，車又上唔到」
 
「咁妳仲咁心情問我?妳係Office瞓呀?有冇野食呀?」
 
小祺影一影佢食緊嘅野，再send俾Rachel
 
「妳打緊邊爐!?係Office打邊爐?」
 
「唔係呀」
 
「咁妳係邊呀?」
 
「我….係阿翹間宿舍到囉，佢俾我暫住幾日」