係同屋室友?定係同居密友?: 36. 功課

可能係因為天色陰暗，又或者係前一日工作太攰，小祺同學翹兩個人瞓到9點先自然醒，對於平日早起身嘅佢地黎講，9點已經係叫遲起身
 
因為小祺有一把長長，差唔多及腰嘅頭髮，所以佢起身時，髮型總係有D亂，亂髮之中夾住少量白頭髮
 
佢攬住條鯊魚行出客廳，其時學翹都剛起身煮好公仔麵
 
「早晨呀…」
 
「瞓唔瞓到呀?」
 




「你張床又幾好瞓」
 
活像一對小情侶嘅倆人一齊坐低係飯檯，打開電視再睇新聞報導。
 
「天文台將於下午一時左右改發8號烈風訊號，同時北區水浸警告、山泥傾瀉警告、紅色暴雨警告、低窪地區水浸警告同時生效。醫管局宣佈所有員工儘快回到所屬單位候命。保安局宣佈所有紀律部隊人員取消休假」
 
「嘩…呢個叫唔叫風災呀?」
 
「差唔多啦」
 




當新聞播出地盤天秤被強風吹倒嘅場面時，小祺望實電視目定口呆
 
「地盤D 安全佬今次有排執手尾囉」
 
「估唔到個秤會吹冚喎」
 
「平頭秤，容易食風，鵝頭秤會安全少少，真係少少咋」
 
係佢地睇新聞期間，學校派左架「豬籠車」黎宿舍。小祺見狀就問咩事
 




「哦，理學院咪有教授用老鼠兔仔黎做實驗嘅，妳記唔記得?」
 
「我知呀，果個AREA好臭架嘛」
 
「D小動物都要食野飲水，所以保安部咪渣呢架安全車黎接D人返去餵小動物，之後再車佢地返黎囉」
 
「下?一定要學校車呀?」
 
「係呀，保險規定架嘛」
 
食好早餐後，小祺將將所有資料拎出黎，準備做佢份project功課
 
佢地兩個人一齊坐係書房，小祺係到打份功課嘅introduction，而學翹就幫佢手設計份問卷。
 
小祺嘅topic正正係參考學翹舊年果一份，所以學翹都拎哂自己當時嘅資料出黎俾小祺做參考




 
「呢到…」學翹好細心咁幫小祺設計問卷，而小祺就拎住學校實驗室嘅SOP，仲有以前上lab safety堂嘅notes係到搵有用資料
 
「估唔到妳仲有留低UG時代嘅野喎」
 
「我將佢地SCAN好哂再收好，方便使用」
 
「有冇計過我早妳幾多年畢業?」
 
「冇喎，你幾時PhD畢業架?」
 
「今年囉」
 
「PhD讀4年，你應該大我…4年左右?」
 




「下?我PhD同M.phil 同時間take架喎」
 
「同時間?可以架咩!?」
 
「老細批准咪得囉」
 
「咁你用左幾多年?」
 
學翹數一數「大約…五年」
 
小祺再數一數「咦?你咪會同我同一日行畢業典禮囉」
 
「係喎，洗唔洗一齊影張相咁呀」
 
「咁一定要啦!!」




 
說時話那時快，學翹已經幫小祺設計好份問卷，而且仲sent埋出去俾其他實驗室朋友同埋舊同事
 
大約半小時後，學翹陸續收到回覆，呢樣野，小祺係意想不到
 
「點解你可以咁快收返到問卷嘅?」
 
「哦，我係學校咁多年，識落唔少人，而且我之前仲係做公證行又識落唔少人，所以先可以咁快做到問卷調查。如果由設計，到派，到收返嘅話，肯定有排，用嘅時間太長，唔化算」
 
「估唔到你識落咁多人，社交圈子好廣闊」小祺立時有d羨慕
 
「妳生活圈子好窄?」
 
「嗯…除左中學同學，仲有少數PG同學之外，我好少同人有聯絡」
 




「咁我係咪好幸運?」
 
「都算係嘅」
 
係學翹嘅幫手之下，成份3000字嘅功課，係6小時內完成左。小祺見到自己咁快就完成嘅功課後都鬆左一口氣
 
「我仲以為有排做，真係唔該哂你呀。冇你幫手我一定冇可能咁快完成份功課」
 
「咪開心住呀，仲有PowerPoint同presentation呢?」
 
「呢樣野我想今日搞掂埋佢」
 
「咁有信心?」
 
「咁就要睇下你幫唔幫我啦」