係同屋室友?定係同居密友?: 33. 打邊爐

兩個人上車之前，去左超市再買多少少野，然後直接上車
 
係學校內，學翹都唔敢開太快，因為真係好大雨。雨水聲嘩啦嘩啦咁打到車頂上，連坐係車廂內嘅人都覺得嘈
 
學校門口都塞滿哂車，之前上左校巴嘅同事仍然塞左係到，緩慢以龜速向前行。返到宿舍，佢地立即打開遮，行到學翹居住果一座
 
外邊真係非常大雨，只係幾秒路程，大家條褲都濕哂，所以佢地一返到屋，就各自去換上家居服。小祺仍然係著返上次學翹俾佢果一套，另外學翹同拎多套俾佢
 
佢地打開電視睇住新聞，外邊真係亂到9彩
 




「東隧及紅隧有積水，即將關閉，西隧嚴重擠塞，龍尾去到南昌站。多個地鐵站水浸，地鐵維持有限度服務」
 
「好彩妳黎我呢到，如果唔係，妳可能要游水返屋企」
 
小祺坐係學翹隔離「我都唔識游水」
 
「就快6點啦喎，妳想食咩?」
 
「我冇咩所謂架，除左潤、肺、腸之外我都會食嘅」
 




「咁呀…打邊爐」
 
「咩…咩話?打邊爐?你講真?」
 
「係呀，妳得唔得架?妳咁細食」
 
「咩唔得呀!?」其實小祺佢自己真係好鍾意打邊爐，只不過冇人陪佢者，除左中學同學聚會，佢都好少同人去街
 
「拿，妳話架」
 




「我先唔驚」
 
「妳唔好飲酒喎」學翹又諗返起前一排小祺飲完酒嘅呆樣
 
「咩喎，我乖女黎架，唔飲咪唔飲囉」
 
兩個人去到廚房，打開雪櫃後，小祺就知學翹唔係講笑，佢個雪櫃真係好多肥牛
 
「肥牛、丸、魚皮鮫、芋絲、烏冬、菜…」
 
「點解你會放呢D野係雪櫃嘅?」小祺好奇咁問
 
「通常我諗唔到煮咩野食，或者第二日唔帶飯嘅話，我就自己打邊爐算數」
 
「估唔到你係咁架喎」




 
「咁懶得諗嘛，妳又係平時自己煮飯?」
 
一講起煮飯，小祺就有D尷尬
 
「我煮果D，比較求其，煎蛋炒蛋，滾水淥菜之類咋」
 
「妳唔識煮呀?」
 
「我搬左出黎之後，迫住自己煮先勉強煮得好左少少」小祺開始面紅紅
 
「我仲以為妳咁健康添，食得咁清淡」
 
「咩….咩喎，你煮野咁叻，你煮埋我果份囉」
 




「都唔係唔可以嘅」
 
兩個人開好張餐檯，拎左個煲出黎，開始黑雨中嘅邊爐
 
望住窗外落大雨，開住冷氣打邊爐，真係一流，而且佢地仲開住電視睇
 
「新聞報導，全港多個地區有水浸，香港島只剩低西隧連接，其他隧道臨時封閉。大量市民被困地鐵站。大量市民到酒店暫住，大澳、鯉魚門等低窪地區市民由消防及民安隊協助下撤離到臨時庇護中心暫住。醫管局開放宿舍予員工暫住。天文台將於今晚9時半前改發三號強風訊號。教育局宣佈今日所有學校停課」
 
「如果唔係遇到你，我可能要去租酒店住幾晚」
 
「咁妳應該點解報答我呢?」
 
「最多一陣我洗碗囉」
 
學翹淥好一塊牛肉，突然將佢伸向小祺個口，即係佢餵小祺食野。小祺見有野食送上門，就毫不客氣咁食左




 
「熟嘛?」
 
「冇問題呀」
 
「OK，食得」
 
望住新聞中好狼狽不堪嘅人，梁小祺忽然覺得識到苗學翹呢個同事真好，再再諗諗，咁好嘅男仔，點會冇女朋友?佢有學歷，有車，冇任何負擔，達到好多女仔心中嘅要求，唯一佢係冇咁高，大約170左右，學翹嘅高度，同佢自己嘅高度係最相襯
 
於是，小祺佢就鼓起勇氣咁問
 
「想問你一個問題」
 
「問啦」
 




「你…有冇女朋友?」