係同屋室友?定係同居密友?: 32. 被迫留低

星期五早上，天色已經烏雲密佈，氣溫上升，空氣污染指數好高，加上亦好焗，而風吹到身上，係熱的，即係表示即將會打風
 
係學校，幾個師傅連同學翹Alvin等人，不停幫實驗室換壓縮氣同斟液氮。好多人都預期會打風，所以先order定需要用嘅野
 
小祺同Rachel係canteen食完午餐，Rachel都覺得就快打風，所以佢地教授亦提早俾佢地放工，但係由於小祺係學校嘅職員，所以學校未宣佈放工，佢都要留到17:33分
 
13:15開始，有一小滴雨滴係地上，然後第二滴、第三滴，之後雨愈落愈大，最後「沙」一大聲，滂沱大雨夾雜住雷聲不停灑向地上
 
當小祺行出office去洗手間時，佢已經感受到有幾大雨。因為走廊嘅燈顯得異常地光
 




學翹同幾個師傅剛好將壓縮氣同化學品送到實驗室後，就帶住濕透嘅身軀返到office。然後學翹立即斟左杯熱水俾自己保暖同埋換衫，以免著涼。其時天文台剛發出黃色暴雨警告
 
大家下晝所有工作已經完成，全部人都坐低上網等待放工
 
各人都密切留意天氣同交通情況，大家都怕會塞車、地鐵有問題等等。Office中除左小祺一個住係港島之外，其他人都住係九龍或者新界
 
學翹今日亦係午餐時間，去左學校嘅超級市場買定呢幾日嘅蔬菜水果等等，同埋最重要嘅零食，不過佢一買，就係買兩個人嘅份量
 
大約到15:15，天文台發出紅色暴雨警告
 




就算係紅雨，大家都唔走住，因為好多同事都係等校巴
 
去到16:00，天文台發出黑色暴雨警告，對於全香港市民黎講，即將面臨一場非常狼狽不堪嘅鬥快返屋企遊戲
 
但係16::45分果時，梁小祺收到一個好壞好壞嘅消息
 
「三條過海隧道嚴重擠塞，路面情況惡劣。警方將採取流量管制。醫管局呼籲員工儘早回到所屬醫院。保安局宣佈，所有紀律部隊人員請立即到所屬單位報到，包括輔警、民安隊以及醫療輔助隊人員」
 
「多個地鐵站人頭湧湧。黎先生表示佢嘅訴求就係上班，沒有其他，希望市民可以配合」
 




「五百年一遇大雨，多個地鐵站水浸需要關閉。九龍與港島連接只剩下天星小輪。觀塘碼頭有快艇坐地起價、uber宣佈提供水上渡海服務」
 
梁小祺睇到新聞，佢手腳大亂，然後學校宣佈即時放工，員工請小心回家
 
一發出宣佈後，好多員工都立即收拾細軟趕去等校巴。Office之中只剩下學翹一個
 
小祺跟住其他同事去到等校巴嘅地方，發現已經人山人海，自己根本冇可能上到校巴。去到小巴同巴士站，亦係人頭湧湧。小祺見到打哂蛇餅嘅人龍，絕望地行返office，打算係office渡過呢一晚
 
「咦?妳仲唔走嘅?」學翹係佢個位到伸個頭出黎
 
小祺好頹咁坐係自己個位「校巴排長龍，巴士小巴都係，地鐵又有D站水浸，我諗唔到辦法返屋企啦，咪返黎囉」
 
「個風有排打喎，今晚先三號，妳係office留幾日呀?」
 
「學校有野食，有得沖涼，瞓就拍埋幾張椅瞓囉」




 
「洗衫換衫呢?」學翹一咁問，小祺就拍一拍個頭
 
「哎呀!冇諗到添….」
 
學翹見小祺咁苦惱，佢就提出左個方法
 
「妳黎我到住幾日啦，上次妳d貼身衣物仲係到冇拎走，仲有對拖鞋都係」
 
「咦!係喎!」小祺忽然間好似遇上救世主一般，咁講都啱，起碼有地方休息，唔洗瞓office先
 
「咁執好野行啦，返去煮野食，而家周圍都係車，塞死哂，係外邊好難搵位食野架啦」
 
「今次又要打搞哂你啦」小祺雙手合十