係同屋室友?定係同居密友?: 31. 颱風前夕

「咩話!!!妳自己一個人去佢屋企過夜!?」星期二Rachel驚惶失措咁講
 
「喂…妳咪咁大聲啦」
 
「妳冇蝕底俾佢呀?」
 
「妳唔好立即咁樣諗我地啦好唔好呀?同上次一樣，我瞓房，佢瞓廳，只不過我今次係醒住咁去之只嘛」
 
Rachel雙手一邊打緊佢準備俾教授嘅proposal，一邊同小祺傾計。
 




「但係妳有衫褲換咩?底褲同bra呢?」
 
「底褲同胸圍同埋襪我一向放一套係locker，仲有一套出街嘅衫，係家居服我冇者」
 
「咁妳點瞓呀?唔著衫瞓呀?」Rachel又開始期待有三級劇情
 
「佢借左套衫褲俾我囉，我都叫著得落」
 
「去男仔屋企過夜，妳曳啦Suki」
 




「都話係佢好心收留我囉，佢都係怕我太夜返屋企會有危險者」
 
「妳咁信得過佢呀?」
 
「佢又唔係壞人黎嘅」
 
「咁倒不如妳搬去同佢一齊住囉，兩個人有個照應都好呀，可能會發展出一段romantic嘅感情呢」
 
梁小祺反一反白眼「妳個腦只會諗呢d野架咩?不如妳諗下妳份Proposal點打仲好啦」
 




一提起proposal，都會令所有PhD學生喊出黎咁滯，因為真係好難定topic
 
「唔好提啦，proposal已經交左，老闆批左，但係我開始後悔啦…呢4-5年要點過」
 
「妳係做海洋污染?」
 
「係呀，做重金屬」
 
「咁妳要努力啦」
 
「妳好似係到幸災樂禍咁喎」
 
「最多幫下妳手做lab啦」
 
「係至好講呀，我要果d chemical麻煩一落單妳就好送黎俾我啦」




 
「咁呀，要睇下有冇師傅渣車先喎，呵呵」

............................................................................................................
 
梁小祺今日請左日假，去左套房附近嘅公共圖書館溫書，因為今日準備考module 3 嘅試，呢一個module，主要係講安全管理嘅方法，聽好聽係非常之玄妙，難聽d，就係鳩UP
 
Module 5行地盤時，果時梁小祺係一舊雲咁，不過佢仍然觀察到重點，可以寫返出改善方法。但係今次到安全系統及管理的話，真係考起佢。而且過完今個考試，就要開始module 6嘅project同埋module 4嘅occupational hygiene之類
 
已經溫左成個上晝，佢打開電話睇一睇
 
「一號風球?而家個風仲係好遠喎星期日先打到黎，而家星期四，咁快掛定?」
 
梁小祺收埋電話，冇理呢個一號戒備訊號，繼續埋首溫書
 




同一時間，係大學內嘅學翹同埋其他同事正在開會，安排緊防風措施同埋水浸措施
 
「Roy，今次個風唔係講笑，佢而家不停係海上吸水吸熱，睇佢個路徑圖預測，佢會經巴士海峽後正面吹襲香港，如無意外會係西登，我地學校有大部份面向東南，好食風」
 
「ok…你有咩建議?防風我地一向做開」
 
「我建議聽日入滿所有氣，同埋叫氧氣公司送10個缸黎，我地星期五下晝將吉缸還哂俾佢地」
 
「咁係plant入邊果d滿缸呢?」
 
「呢一兩日用板封住plant嘅通風位，只留少少透氣，入邊d缸搵帶扎實，以防佢地跌。而我地有足夠嘅氣同液氮係復工後俾人，呢個問題唔大」
 
「ok，咁聽日我地全力做防風，仲有咩可以會發生嘅問題?」
 
「呢個風係超強颱風，而家隻眼都開左，個環流雨帶應該聽日會影響香港，有機會紅雨甚至黑雨，個天而家燒緊」有其他同事講緊問題




 
「ok，我會聯絡保安中心，同埋叫校園管理處同各學生宿舍安排好食物，d宿生好大機會canteen都去唔到。各學生宿舍安排一部緊急車，方便有唔舒服就送佢地去學校診所，各宿舍安排一間休息室俾staff休息用」
 
所有防風、緊急措施都進行得如火如荼，而梁小祺都係佢份試卷上如火如荼