係同屋室友?定係同居密友?: 29. 信任

「去…宿舍?即係你屋企?」
 
「係呀，妳上次都上過黎啦」
 
「上次…有Rachel陪住我…但係今日…佢又唔得閒，而且我同你一男一女，俾人見到嘅話就…..」小祺嘅顧慮都屬於正確
 
「但係而家就快11點，妳住果邊真係幾危險下，d酒鬼就出黎」
 
小祺聽到學翹咁講，佢都心中認同，佢之前都試過俾酒鬼騷擾過
 




「妳可以鎖埋房門，我俾條鎖匙妳，咁我就入唔到黎」
 
「傻啦，你要入黎，我都阻唔到你，不過…」
 
「不過咩?」
 
「我信得過你嘅，你唔會對我有越軌行為」
 
小祺執好野後，跟住學翹上車，用左5分鐘左右，就由停車場返到職員宿舍樓下。學翹泊好部車，同小祺兩個人返到去單位
 




一打開門，小祺又認得果間非常整齊嘅屋。相比起自己果間就…
 
小祺坐低除左鞋襪，換上自己剛買嘅拖鞋，但係果時發現，佢自己冇居家服
 
「妳一陣沖完涼著返呢套呀?」
 
「係呀，我都冇居家服」
 
「等等啦」
 




學翹返到房，搵出左佢比較細嘅t shirt同窄嘅短褲俾小祺
 
「妳將就下啦」學翹遞俾小祺時講
 
「唔該哂你」小祺入到去洗手間，發現得一枝牙刷，即係話，學翹都係自己一個人住?
 
熱水徐徐沖向小祺身上，所有疲勞都一掃而空。15分鐘後，佢著好哂衫，用毛巾包住自己一把長長嘅頭髮行到客廳，正當佢想開口問學翹借風筒吹乾頭髮時，就發現學翹已經拎左風筒出黎
 
到學翹梳洗完後，小祺都吹乾左頭髮，但係佢沖完涼之後，所有疲倦都消失左，所以佢就打開Macbook上陣網，不過佢唔知wifi password
 
「我呢度個wifi係”樓上關水喉”，pw係wkk3812」
 
「唔該哂你」
 
佢地兩個人係到上網，小祺望住間宿舍，好奇怪學翹點解會一個人住，佢想開口問，但係又怕尷尬，所以問題係佢喉嚨中講唔出黎




 
學翹見到小祺幾次欲言又止嘅樣，都知道佢想問d咩
 
「我係一個人住架」
 
「但係，你d屋企人呢?」
 
「幾年前有單意外，佢地過左身」
 
小祺聽到之後，立即道歉，因為真係唔太禮貌。相反，學翹完全冇介意，因為已經係發生左嘅事實，佢自己冇必要收埋
 
「所以你就住入黎宿舍?」
 
「係呀，反正我星期日好多時都留係屋企冇野做，最多間唔中渣車去影下相、釣下魚」
 




「而且你平時都留係屋企睇書呢?」
 
「咦?妳點知架?」
 
「平時你檯面總有一本小說係到，而且你仲會訂TIME同National geographic睇」
 
「估唔到妳又真係幾細心喎」
 
「咁你訂d野都係送返office，好難唔知」
 
學翹見小祺又係到將佢膊頭伸高伸低，就知道佢頸同膊頭，仲有腰都攰，所以學翹叫小祺坐上張按摩椅上
 
「坐上去?但係張椅係你架喎」
 
「坐啦，我冇咩所謂」




 
「唔該哂你」
 
小祺坐上張椅、除左拖鞋，兩隻腳放係腳部按摩器到，然後學翹一撳掣，張椅自動幫小祺按摩
 
係椅中嘅小祺，舒服到就快要叫出黎
 
「嘩嘩嘩….」
 
「做咩呀?太大力?」
 
「唔係呀….腳板底同腳趾….好痕」
 
「按摩係咁架啦，放鬆少少」
 




其實小祺知道按摩係好舒服好放鬆，而佢差d嗌出黎並唔係痛，而係佢知道，佢白白嘅腳板同十隻細細嘅腳趾，係佢自己嘅敏感帶，但係好奇怪，佢可以係學翹面前放心除左鞋襪祼足，呢樣野，佢自己都唔明白….可能呢D就係人與人之間嘅信任。