係同屋室友?定係同居密友?: 28. 第二次留宿

隨住雄哥退休，小祺慢慢一步步咁接收雄哥嘅工作，雖然只係second過黎，但佢而家發現，呢個小部門並唔係好似其他同事口中咁樣，只係一個養懶人嘅部門。有人話過，OT多唔代表係勤力，有時多OT反而係代表無能，係工作時間內做唔哂所有野，不過，呢度D野冇咩可以係工作時間內做得完
 
今晚，小祺唔需要返學，此時此刻，下午五點十五分，佢望住檯面嘅order同單，仲有confirmation嘅單，睇黎冇11點都唔洗走
 
話老一輩嘅員工係非常盡責任，咁講一D都係冇錯嘅，時間去到五點半，已經唔見哂人，office剩低小祺一個人係到同文件仲有User嘅account搏鬥緊。睇住放係tray上嘅送貨單，佢真係想喊出黎，好在office冷氣係24小時運作，如果唔係嘅話，佢可能會熱死
 
「今晚我唔洗係到過夜掛…」小祺望住d單自言自語。係second落黎之前，總部有同事提過，返工果時，一定要放一對襪，仲有一set內衣褲同後備衫褲係自己locker，一黎如果天氣唔好時可以更換，二黎，隨時隨地要有留係學校過夜嘅準備，雖然呢個機會唔大，就算學校有間酒店係俾外賓或者員工使用，都要經過head of department批准同安排先得
 
小祺左右郁下膊頭同條頸，睇黎今晚留係學校過夜嘅機會好大，時間去到6點半，佢個肚傳出一下好響嘅聲
 




「咕~~~~~~~~~~~~」小祺已經叫肚餓，所以佢執好少少野，拎起鎖匙同銀包，走去canteen食飯
 
望住窗外學校晚上嘅景色，佢發現自己好耐冇留係學校食飯，正當小祺自己食緊野嘅時候，有個餐放左係佢面前。梁小祺覺得好奇怪，明明周圍咁多位，點解佢要坐自己對面呢?於是出於好奇，佢抬頭一望，原來係學翹
 
「咦?你唔係放左工啦咩?點解你仲係到?」
 
「我幫我舊老闆處理lab d野，仲有幫人頂一堂tutorial，妳做咩仲係到嘅?」
 
「呀……仲有好多野未做完，我又唔鍾意拖到第二日」
 




「聽日星期六，妳都要返去休息下啦」
 
「唔呀，我唔鍾意未完成工作就走架」
 
「咁妳以前又係一日內完成d assignment?」
 
「咁又唔係嘅….」
 
傾談之間，佢地兩個都完成左晚餐，當小祺正想行出超級市場到睇定d乾糧俾自己之時，學翹叫佢去學生合作社
 




「黎合作社做咩呀?都冇野食買啦」小祺抬頭問
 
學翹指住對人字拖「妳買對拖鞋著啦，唔好焗住隻腳咁辛苦」
 
小祺覺得學翹都講得冇錯，佢今日到而家都未除過對鞋同襪
 
小祺一睇，係d舊款Havaianas slim人字拖，係外邊賣成$300蚊對，不過因為係舊款、斷碼同大學合作社關係，所以賣$100。小祺個子唔高，所以佢著36號鞋已經足夠，返到去office，佢除低鞋襪換上新買嘅拖鞋，十隻腳趾立即感覺到好舒服
 
「好啦，妳差邊d未完成呀?」學翹返去佢自己個位，再打開電腦
 
「下?你幫我?你唔洗返屋企咩?」
 
「我住宿舍架，幾時返都冇問題，今個星期唔係我當值」
 
學翹拎起d單，拎去scan完後就開始幫小祺處理d野。雖然佢係Technical staff，呢d administrative野佢平時係唔洗負責，但唔代表佢自己唔識。一坐埋位，佢就飛快咁幫小祺處理文件




 
就算而家有兩個人，但係工作量仍然好多，所以佢地兩個忙到10點半，終於完成哂所有工作
 
「呀!搞掂啦」小祺上下郁佢嘅膊頭
 
「嘩…10點半啦喎」
 
「咁夜啦?我返到去仲要洗衫….算啦，快d走啦」
 
「妳而家返去?妳住果到咁多….而家又…」
 
小祺一聽就知學翹講咩
 
「冇辦法啦，自己小心d囉」佢自己邊苦笑邊講
 




學翹望住呢個咁攰嘅同事，然後佢張開口講
 
「Suki，妳覺得我信唔信得過?」
 
「你當然信得過啦，做咩咁問?」
 
「而家咁夜，我怕妳一個女仔返去有危險」
 
「所以你想送我返去?唔好要你嘥錢同嘥油啦」小祺一貫慳妹性格
 
「我係想叫妳今晚跟我返宿舍瞓一晚者」
 
小祺聽到之後，個腦一片空白