係同屋室友?定係同居密友?: 27. 外語高手

係大學之中，有來自世界各地嘅學生同教授，除左英文同廣東話，使用國語嘅人都唔少，但係總有其他教授同學生係講其他語言
 
今日小祺繼續坐係個位到，幫手處理系統上嘅工作，同時又幫手其他行政工作。然後有一張化學品單放左係佢檯面，係一張好特別嘅單。因為有D化學品，係毒品前身化學品，例如丙酮(acetone)、乙酰氯(acetyl chloride)可以製成海洛英，即係白粉。哌啶(Piperidine)可以製成天使塵，所以根據香港法例Cap.295及Cap.595，如果有人要用黎做實驗，係需要用家以及教授級嘅大學職員簽名核實，以及提供所有資料
 
就係今日，小祺遇上一個大難題，個user英文一般，而佢地個教授就係日本人，所以小祺唔太識同佢地溝通。雖然話係讀到大學，但係日本人d英文都真係咁「好」。當小祺收到個chemical request order果時，佢都唔知應該點，所以佢就請教其他文員
 
「咦?呢一隻呀?受海關管制架喎」權哥向小祺解釋
 
「唔係平時d化學品嘅做法?」
 




「呢個嚴謹好多，要佢解釋用黎做咩實驗，個實驗過程、reaction，出咩product同by-product都要寫低，同埋要簽名自己係end user，當實驗完畢就通知我地搵人銷毀」
 
「咦?咁麻煩嘅?」
 
「呢隻化學品可以加工做天使塵，所以一定，係一定要老闆親自上去倉到拎，然後要個教授親自簽名作實
 
「咁我睇睇先，係化學系嘅中村教授」
 
「咁妳可能要打俾佢同佢傾啦」
 




當小祺一打通個電話，對方係一個日本人。好彩係電話錄音，所以小祺打算一陣再打電話，而且小祺知道日本人好重視階級觀念，所以佢想諗下點同人地解釋嘅時候
 
對方打電話黎了
 
小祺俾個電話嚇左一下，並冇接呢個電話，剛剛返到嘅苗學翹見到呢個情況
 
「妳冇野嘛?」
 
「呀….呢個電話應該係中村教授打黎….」
 




好快電話又收左線，小祺好快鬆一口氣
 
「係關於D咩架?」
 
「中村教授有學生要用Piperidine，所以就…」
 
「得啦，我明，交俾我同佢講啦」
 
「你又知佢好快打黎?」
 
不出五分鐘，小祺電話再次響起，來電顯示係中村教授Office
 
小祺望住學翹，然後學翹打開Speaker
 
「はい! お電話ありがとうございます! いつもお世話になっております!」學翹用一口流利日文同教授傾談




 
學翹用紙筆寫低哂所有野，再叫另一個文員，叫佢準備化學品，中村教授15分鐘後到
 
電話收線後，小祺立即準備收化學品單同其他文件，果然準時15分鐘後，中村教授帶同黎到簽名及領取化學品，期間佢同學翹用日文有講有笑
 
「真係唔該哂你呀!如果你唔係到，我都唔知點同中村教授講野」
 
「小意思黎者」
 
「但係…你日文好流利喎」
 
「呵，我得N3程度咋，其實唔係太叻」
 
「咁你仲識講咩話?」
 




「我呀?唔…德文，西班牙文，俄文都識D」
 
梁小祺個腦中只有一個問題，點解苗學翹會屈就係大學嘅小部門之中呢?