係同屋室友?定係同居密友?: 25. 回家

「咩話?佢送埋妳返去睇醫生呀?仲有冇呀?」星期日梁小祺返到去lab繼續陪Rachel做lab，以及自己都溫書，Professional Diploma第一同第二個sem過左，小祺亦都考完試，佢仍然發揮自己100%力量，考試成績依然係咁好
 
梁小祺望望四周，好彩係星期日，冇咩人會返lab
 
「妳唔洗咁大聲呀?」小祺伸手去拍打Rachel
 
「咁呢個消息真係令人好驚喜丫嘛，睇完醫生之後呢?點呀點呀?」Rachel邊做lab邊問
 
「尋日呀…」
………………………




「梁小祺，呢到咳藥水，止痛、止暈止嘔、化痰、收鼻水抗敏感，仲打左枝針。3日藥$350」姑娘好快手拎藥俾小祺
 
正當小祺係銀包拎錢出黎時，佢先發現唔夠，不過學翹已經早一步幫佢俾左錢，仲拎埋收據
 
「咦?你點解…」
 
「行啦，妳今日剩下兩餐都要食粥呀」
 
「咁，我自己買咪得囉」
 




「妳夠錢咩?」學翹一下就篤中小祺死穴，的確，梁小祺真係冇乜錢
 
佢地買完粥之後，學翹跟住小祺返去佢套房
 
小祺習慣左兜遠少少行返去，以免係最多141果幾幢大廈附近徘徊
 
「妳住呢d地方?」
 
小祺點一點頭「所以，可能你唔係太方便…」
 




「唔通要妳一個女仔返黎咩，行啦」
 
上到去梁小祺住嘅套房，係一幢唐樓，幸好呢一邊係冇141，所以冇咁尷尬
 
「屋企有d亂，唔好意思」小祺細細聲講
 
「點都唔夠妳而家Office個位亂呀?」學翹邊講邊笑
 
「個位…我遲早會執架啦」
 
因為雄哥留俾Suki個位，真係好多雜物，係堆積如山咁高
 
梁小祺打開套房嘅門，其實唔係好亂，因為小祺佢自己真係乜都冇買
 
「妳就自己一個住係到?」學翹關埋門，扶住小祺坐低




 
「係呀，仲有學債要還，剛剛又報左個Professional diploma，又用左兩萬蚊」
 
「唔係分期俾架咩?妳一野俾哂?」
 
「我就係怕冇錢交學費，所以先一次過俾。我已經孭住差唔多30萬學債，有d仲係大耳窿債」
 
「妳屋企呢?」學翹一邊係到幫小祺準備d粥，又開始打掃。其時小祺已經換上居家服
 
「我屋企呀….」一提到屋企，小祺又開始想喊
 
有見及此，學翹都阻止小祺再講
 
「唔緊要丫，又唔係咩醜事，只係我同屋企有D唔夾，所以自己搬出黎」
 




小祺瞓係床上靜靜地思考，然後藥力發作，慢慢就瞓著左
 
當佢起身時，學翹已經走左，佢走前留低memo，提佢食藥食粥再休息
 
一時間，梁小祺覺得呢位同事都好識照顧人，開始覺得，同事之間距離近少少，並唔係一件壞事
……………………………………………………
「照妳咁講，妳同佢好有機會發展喎」Rachel又流露出好奸嘅眼神
 
「哎呀~妳唔好咁煩啦，男同女唔係一定要一齊架嘛?」
 
「咁妳同事又好似係個筍盤黎丫嘛，妳唔要嘅，可以介紹俾我識架喎。咁妳知唔知佢鍾意咩類型嘅女仔?例如好似我咁」Rachel挺起佢對傲人嘅d cup雙乳
 
「我真係冇問呢，一係我過幾日約佢食飯介紹妳識?」
 
「係唔係先?」




 
「但係佢平時都係帶飯架喎」
 
「妳又知嘅?」
 
「下邊雪櫃永遠都係得佢一個嘅飯盒咋」