係同屋室友?定係同居密友?: 24. 冇事發生

陽光經由窗簾間照入房間，照射到小祺雙眼嘅眼皮上。小祺慢慢打開雙眼，望見白色牆嘅房間，比起自己住嘅小套房好似大得多。「我一定係未瞓醒」小祺心中暗暗講左一句後，就再合上雙眼。當佢將被包住自己個頭時，再將個身一轉，頓時發現左問題
 
「點解…張床大左咁多嘅?而且陣味唔係我間房嘅味」
 
小祺手震震咁挑高張被望下自己，幸好自己有著衫，但係…點解套衫有D鬆身?佢再摸一摸自己上身，胸圍呢?
 
其時，小祺個32A胸圍放左係床邊一張椅上，椅上仲有佢尋晚著嘅衫褲同襪
 
「唔會呱?」梁小祺背部一涼，自己會唔會將處子之身俾左一個唔識嘅男仔?
 




佢拉開短褲及內褲，伸手向自己下體一摸之下，冇血、而且冇任何痛楚。當刻佢立即放下心頭大石，自己仍然係一個女孩子
 
當佢仲思考緊自己身處何方之時，係佢身邊有一個人郁一郁
 
由佢嘅髮型同背影黎睇，一眼就可以看出係Rachel，莫非佢去左Rachel屋企?
 
然後，Rachel都坐左係身，同樣地，佢著住套唔屬於佢嘅衫褲起身
 
「犀利呀Suki，估唔到妳咁飲得」
 




「我飲得?」
 
「妳飲到腳步浮浮咁，妳d同事打電話落黎lab通知我。不過我只係知妳住西灣河，送唔到妳返屋企，咁我就同妳個同事扶妳去佢屋企，我留低陪妳囉。仲有，妳d衫都係我幫妳換架」
 
聽到Rachel咁講，Suki立即輕鬆左好多，尋晚係Rachel幫佢換衫
 
帶住宿醉嘅小祺雙腳赤足落床。Rachel亦同一時間落床
 
「呢到係邊位同事屋企呢?」小祺心中自問
 




Rachel睇到小祺臉上嘅疑惑，就幫佢補充
 
「呢到係職員宿舍，係住宿舍果個同事送我地黎嘅」
 
「住宿舍同事?」
 
「渣Suzuki越野車果個男同事呀」
 
「阿翹?呢到係佢屋企?」
 
小祺打開房門望出去廳，見到梳化上有個冇人嘅睡袋，然後就見到學翹係洗手間行出黎。佢地兩個對望一下，學翹好快擰轉身，好尷尬咁背對住小祺
 
小祺下意識望下自己件衫，原來胸上兩點有少少突出左，即係飛釘
 
佢立即返入房，將胸圍戴上，換返自己嘅衣服再行出去。果時學翹都已經換好衫




 
梁小祺好尷尬咁開口「尋晚…唔該哂你…」
 
「妳應該同妳同學講，如果佢唔係到，我真係唔知點帶妳返黎幫妳換衫」
 
「我…我知道…」
 
經過梳洗後，學翹開車送Rachel返屋企先，因為佢屋企比較近學校。然後佢就車住仍然帶有宿醉嘅小祺返西灣河
 
「呀…你係地鐵站放低我得架啦，無謂又要你嘥錢送我過海啦」
 
「妳而家仲宿醉緊，點可以俾妳一個返屋企?而且我仲要帶妳去睇醫生」
 
「下?睇醫生?唔洗啦」呢句未講完，梁小祺又開始頭痛
學翹好快將車駛到西灣河，泊好車後就扶起小祺去睇醫生




 
「妳有冇睇慣嘅醫生呀?」學翹循例問一問
 
「有嘅，係太安樓入邊」
 
「咁我知啦，陳醫生係唔係?」
 
「你又點會知架?」
 
「我以前成日走過黎玩，有時唔舒服都會睇佢」
 
「你由學校果邊走過海黎玩?」
 
「細個中學果時呀!而家間唔中都會黎買下書睇」
 




學翹扶住小祺入診所，當兩個人隻手掂住時，小祺感覺到一陣暖意同安全感。自己隻手完全俾人捉到實，今次係佢第一次拖屋企人以外男性嘅手
 
「咪亂諗野!!人地有女朋友架啦，如果唔係，點解間屋會咁整齊?」
 
係梁小祺心中，如果一個男仔嘅屋企係好整齊，佢一定係有女朋友