係同屋室友?定係同居密友?: 10. 原因

Alvin，係中央供應組嘅老臣子，由學校開校以黎就係學校返工，而ROY就 assign左佢教Suki做一d技術上嘅野，第一樣係點樣係網上留意有幾多化學廢料要收，點樣派新化學廢料桶、桶嘅分類，點解簽纖每一個桶，仲有點樣帶師傅們去收化學廢物
 
今日嘅下晝，Suki跟住Alvin遊走大學間的實驗室，教佢唔同種類嘅化學廢料嘅存放位置。對於呢個小部門嘅流言，小祺發現有好多都係虛構出黎。其他人眼中佢地只係做少少工作，但當自己親身投入落去後，就發現原來其他人眼見到嘅工作，背後係有好多工序
 
今日，梁小祺坐係一個倉之中，不停清點緊幾大箱由外國坐飛機黎嘅化學品，同平日一大Log嘅大枝裝化學品唔同
 
「原來係要申請咁多野先可以買到…」梁小祺對住清單時自言自語
 
「Suki呀?妳處理完飛機貨未?」Alvin走入黎睇下小祺嘅工作進度，果時佢望一望小祺，發現已經全部分好種類
 




「有個女仔係到真係會細心d喎，我地以前都諗唔到咁分法」
 
梁小祺聽到之後，自己心中暗暗地笑左一下，咁耐以來，都甚少有人稱讚自己
 
漸漸發現，呢個小部門其實好開心，但自己又對之前d流言有少少好奇，所以問舊員工一定係最好
 
「Alvin，我有少少關於我地部門嘅野想知」小祺細細聲咁講
 
「關於d咩?答到我一定會答妳」
 




「呀…其實係….」小祺都唔知點解開口問，因為真係幾尷尬下。不過Alvin見慣大場面，都知道Suki想問咩
 
「妳所聽到嘅流言呢，好多都係真嘅，我地部門以前嘅名聲係好差，咩閒人部門之類，我地都承認」
 
梁小祺聽到Alvin咁講，立即有d唔好意思而立即想道歉
 
「妳有冇發現我地四個Technical staff嘅位同d clerk有唔同?」
 
「其實係咩原因?」
 




「係關於某D同事，經常話俾人望到休息時間佢做咩，冇哂私隱」
 
梁小祺聽到呢個原因都呆一呆左
 
「仲有妳有冇睇過本Logbook?」
 
「係工作檯上邊果本?」
 
「冇錯，就係果本，我之前派job果時，經常要諗工作，有同事要求公平，所以每日都要計每個人嘅工作量」
 
「其實，輪住做或者分散做咪得囉?」
 
「妳果然好聰明，有d同事就係斤斤計較，所以先令我地之前名聲唔好。舊老細想息事寧人，所以就妥協」
 
「咁而家應該好左好多?」




 
「少少咁啦，不過因為早年又空降多一個TO落黎，而且D老闆好睇重佢，而佢又同樓上D學生同教授熟絡，所以顯得佢做野比舊同事好。」
 
「咁係一個問題?」小祺個腦Load得比較慢
 
「d老員工咪覺得老闆係會俾佢升職先，所以氣氛而家又同以前差唔多」
 
「但果位同事知唔知?」
 
「佢一向好少同人傾計，不過d師傅覺得佢好好人，因為佢會落手幫d師傅。基本上佢係有求必應」
 
「所以就引黎不滿?」
 
「可以咁講啦，妳自己慢慢了解下，不過小心踩到d老員工條尾。我地部門其實個個都好好人，只係某幾位同事比較麻煩，希望妳唔會中地雷啦」
 




梁小祺可能自己都估唔到，咁快會踩中地雷