係同屋室友?定係同居密友?: 11. 踩地雷

由於有一名文員同事差唔多退休，所以經理就打算趁呢個機會改一改工作方法，務求提升效率
 
而供應部一向有固定嘅做法，當下晝兩點後所收嘅order，一律等第二日先做，所以通常好多同事都係三點左右就返到自己個位到，睇書、睇戲、睇馬經、睇股票等等
 
呢一種返工等放工嘅生活方式，令到供應部係學校中非常出名，早年嘅工作態度係非常差，特別係舊嘅TO，永遠一個月總有幾日病假。叫佢地幫手做多少少野，就會有投訴。
 
今日梁小祺繼續自己係到了解部門嘅時候，有一個電話打入黎，眼見其他同事都忙緊，所以佢就好有責任咁接左個電話
 
「你好，供應部」對方聽到係一個女仔聽電話都一陣驚訝，點解呢個「少林寺」入邊會有尼姑聽電話呢?
 




「呀師太….呀唔係，小姐，我想而家立即訂一枝CO2送去Rm 6123」
 
小祺佢用紙筆抄低資料同繼續問「房間6123，好嘅」
 
「可唔可以而家立即送呀?佢係CO2 incubator黎，有一枝CO2已經冇氣，我怕另一枝捱唔到太耐」
 
當小祺聽到係CO2 incubator有機會斷氣時，佢背脊都涼左一下。佢之前係M.phil學生，好清楚知道CO2 incubator斷氣會有咩嚴重後果，所以佢冇問過教緊佢野嘅同事，就答應左對方會今日內送枝二氧化碳上去，當時只係3點15分
 
一收左線後，小祺立即印好張單，蓋上日期後就準備拎出去俾係Office入邊嘅TO。正當佢想離開個位時，教緊佢野嘅雄哥就返到埋位。佢見到小祺拎住張單，就心知不妙
 




「呢個小妹妹肯定俾用家拋窒左啦」雄哥第一時間係諗到呢樣野，果然，疆是老的辣，原本想阻止小祺出單嘅佢突然間覺得要俾眼前呢個小妹妹知道職場上嘅現實，所以佢冇阻止小祺
 
梁小祺拎住張單，走去一眾TO嘅座位，每一個TO嘅座位都好似一幅高牆，每個人都有自己嘅領地一般
 
小祺拎住張單走去一個TO嘅位，而果位TO，係出哂名惡、懶、推三推四
 
「R….Ronold，你好呀，唔好意思…..」小祺細細聲咁行到佢個位
 
一向脾氣都差嘅Ronold哥，唔知係咪因為Suki妹阻到佢量今晚嘅夜馬，顯得非常不滿
 




「咩事呀!」佢用好不滿加粗魯嘅口吻回覆
 
「呀…呢到有枝CO2….用家話好趕，所以想麻煩你…」小祺細細聲咁講
 
「3點3啦喎!唔做啦喎，妳唔知規矩咩!」
 
「因為用家話係incubator，所以…」小祺果一刻應該知道自己搵錯左人
 
「咁又點呀?係佢地自己嘅事，總之做完job我就唔會做架啦，要做妳自己去!成日都用家話用家話，就係妳地寵壞哂d人」佢擰轉自己個位繼續量馬，所以小祺就去另一個TO個位到
 
小祺未行到埋去，果位同事已經耍手擰頭表明態度。又一次食閉門羹嘅Suki想向Alvin求救，不過睇返塊白板，今日下晝Alvin去左Training，所以幫佢唔到
 
萬念俱灰嘅情況下，梁小祺拎起左氣樽倉鎖匙，打算自己親身上陣。坐係位嘅雄哥見到咁樣，就係走廊叫停左小祺
 
小祺用水汪汪嘅雙眼對住張單，眼淚就快滴出黎之際，雄哥就解釋俾佢知




 
「妳而家知道，咁嘅情況之下，有咩同事唔可以搵啦」
 
小祺點一點頭
 
「而家呢個情況，妳冇做錯到，但唯一一個可以幫到妳嘅就係學翹」
 
「係?但係佢仲未做完野喎…」
 
「妳試下用walkie call佢，睇下佢幫唔幫到妳?」
 
「係…」
 
經過前兩次之後，小祺有少少驚，佢手震震咁拎起walkie，深呼吸一下，撳住個通話掣
 




「學翹學翹，Suki call…..」小祺向住對講機講
 
10秒後，對方仍然未有回應，於是佢再重覆一次
 
「學翹學翹，Suki call…..」
 
今次過左30秒，苗學翹仍然冇回覆，正當小祺想放低對講機，打電話向用家解釋送唔到氣上去時，對講機傳出聲音
 
「學翹收到，阿妹請講」