係同屋室友?定係同居密友?: 9. 重男輕女

另一方面，梁小祺係星期六晚，仍然自己一個係劏房中不停睇部門嘅SOP，仲有COD等等，務求儘快上手
 
佢而家所住嘅劏房，環境比一般劏房要好，包wifi同水電，就算租金貴左少少，但好過係附近租一個單位，租金應該要一倍以上。雖然係一幢唐樓而且冇lift，但係地方總算清潔，同埋樓下有大閘，不過最大嘅問題，係附近有幾條街充滿住141之類，所以Suki有時經過，都會急急腳咁走，曾經佢都俾人問過價，所以如非必要，佢寧願兜遠少少路
 
佢望住自己張帳單嘆氣「幾時先可以還清債務…」不過舊債未清，差d又孭上新債。因為做而家個位，係需要讀一個專業文憑。Suki佢揀左個公營機構開辦嘅課程，因為學費最平，大學同埋持續進修基金加埋，剛好cover到學費
 
望望張單「又冇左兩萬幾蚊啦…」
 
小祺曾經諗過，聽長輩講，返去屬於自己嘅屋企，佢原先嘅屋企，距離而家住嘅套房其實唔遠，可惜因為屋企重男輕女關係，身為家姐嘅佢，永遠都要將所有野、所有資源甚至屋企人嘅愛都分哂俾細佬
 




最好例好，幾年前小祺考到入大學，一件令屋企好光榮嘅事，不過當佢父母同佢講，希望佢早D出黎工作，D錢留俾細佬讀書結婚用，反正女仔最後都會嫁人
 
當小祺聽到自己嘅至親咁講，對佢打擊非常大。從小開始，佢都知道父母重男輕女，由佢15歲開始就出黎幫人補習賺錢，而自己細佬要乜就有乜。每一次佢出聲表達不滿時，父母只會講「大家一家人，唔好計咁多」，「妳係家姐，妳應該讓下細佬」，但佢無諗過自己父母竟然要佢放棄自己讀書嘅願望，目的就係留低D錢俾個細佬。
 
係咁唔公平之下，小祺係大學一年級果年就搵學校同自己畢業嘅中學求助，令佢四年都可以住hall，當然係要有條件，小祺必須要Second upper 畢業，或者畢業後為學校服務
 
為左回饋學校，小祺係4年UG都非常努力，佢完全冇走過堂，同時又有做兼職，所有assignment都好高分，好準時交
 
不過佢總有一日會畢業，所以佢搬左出黎，租左間小套房
 




每次一諗起返到屋企，就會俾父母囉嗦，問點解走去讀書讀PG，點解唔早D出黎做野幫手交細佬學費
 
小祺細佬讀書一向成績中下，不用多講，DSE分數好低，於是畢業後，佢去左D外國大學社區學院在港分校讀，美其名張畢業證書係同外國大學一樣，實質上會寫住「社區學院」或者「持續進修學院」即係坊間所謂嘅學店，所有資歷都唔受承認。
 
小祺每一次諗到呢樣野，鬥志會立即上升，自從大學之後，佢就決心唔再靠佢屋企，要自己一個努力
 
至於感情方面，佢中學時代同全校大部份女仔一樣，暗戀讀書又叻嘅校隊成員、學生會會長，奈何自己左邊臉上咣淡淡胎記，加上對方名草有主，所以小祺只可以係遠處偷望
一直以黎，小祺都好少同人交流，所以到大學畢業，佢仍然係保持A0。小祺已經立心儲錢買間姑婆屋俾自己住，佢認為自己將會自己一個終老