係同屋室友?定係同居密友?: 6. 貪婪

「仲要諗D咩呀?大家遲D都係一家人黎架啦，加埋佢個名好難咩?」苗學翹已經唔係第一次聽呢番說話，而不停向佢講嘅就係佢而家女友嘅媽媽
 
「呀…伯有，加名唔係難，只不過呢間係我父母留低俾我嘅野，而且暫時交俾律師處理，即係而家我都未話得事」
 
「咁佢地都唔係到啦!層樓咪就係你架囉」
 
苗學翹深知呢家人嘅目的，佢地無非想係層樓到加名，然後有錢分
 
由拍拖開始，苗學翹就已經知道呢班係咩人
 




最簡單嘅例子，係佢做公證行，冇咩錢嘅時候苗學翹同事會分一D快餐廳現金券俾佢，等佢財政上會輕鬆一D
 
每一次伯有拎黎睇之後，就望住佢，用眼神話俾苗學翹知，張現金券已經屬於佢
 
有時，苗學翹買左/準備左D野自己食，但伯有一見到就趁人地行開後，自己對自己講一句「唔食架啦?」之後就自己大吃大喝，曾經有數次令到苗學翹餓住咁幫佢地做事
 
又因學翹有部車，所以佢地一有地方想去，就立即打電話黎要求接送，仲慘過uber司機
 
如今，苗學翹父母因為意外而離開，肇事公司亦承擔責任，向親屬作出8位數字賠償，加上保險金、儲蓄、股票等等，令到苗學翹變成一個小富翁，當然，佢寧願唔要呢筆錢，佢寧願要一對健康嘅雙親
 




苗學翹父母亦清楚知道佢地個仔嘅女友屋企係咩人，所以佢地一早立好平安紙，委託苗學翹堂姊為遺產管理人，而佢地住緊嘅三房兩廳居屋單位，就早早加左苗學翹嘅堂姐，苗學雯嘅名，因為呢個堂姐，學翹父母都有份湊大，早就視為親生女一般。而苗學雯亦都好孝順，即使出嫁誕下一對仔女後，佢都同做大狀嘅先生好好咁照顧屋企所有人
 
學翹嘅女友肖翠君，係一名新移民，細個隨家人到香港生活，典至新來港人士，係深圳鄉下有地有屋，每個月返鄉下嘅次數比起出旺角更多，居住在深圳飛地-天水圍嘅佢，同學翹並唔係同學，只係以前公證行識落嘅舊同事
 
根據肖翠君一家人嘅標準，揀人嫁果時，唔需要理會對方係點嘅人，最緊要有錢。當佢地知道學翹將會有自己物業時，大部份人雙眼都閃閃生光
 
「咁你層樓幾時會轉到你名架!?」肖翠君有D不滿咁講
 
「層樓又冇腳嘅，幾時轉都冇所謂，而且俾姐夫呢個大狀睇住，有咩好怕」
 




肖翠君屋企聽到學翹講呢番說話果時，立即心急上黎，佢地諗盡方法都想加自己個女嘅名落去
 
「你真係…..我地人生經驗多過你呀!食鹽多過你食米，點可以將層樓俾外人架!當然係俾返自己人架啦」肖翠君媽媽再一次囉唆起上黎
 
「係呀，我知呀」
 
「咁咪係囉，我地搵個律師，搵日去轉名加名啦」肖翠君媽媽好興奮咁講，佢以為層樓即將會到佢手，所以佢好快就走去搵律師準備。苗學翹並冇俾佢地知道，自己一早就同家姐商量好，將層樓放租，而所得嘅錢會用黎支付佢地最細嘅堂妹，苗學嬛讀書所用
 
雖然苗學翹係苗家唯一男孫，但係苗家並冇重男輕女嘅觀念，相反，佢地屋企係重女輕男。因為苗老爺爺係非常錫女
 
苗學翹搖頭嘆氣，將屋門及閘關上
 
其時，肖翠君一家人已經計劃傢私以及如何分配房間。肖太太果然係貪得無厭，佢認為最大嘅房應該係佢住