OT臨收工先發現走唔出個office 仲要比野追殺點部署: #β423-0021
目送阿智同阿勇離開，回頭我目光沉左落黎。
無錯，我都有自己既正事要做。
啱啱無特意同阿智交代距地之中可能出內鬼既事。
呢個內鬼可能同呢個空間既內幕有關。能夠操縱怪物，甚至係同怪物勾結。
我相信阿智自己唔係內鬼。
呢班人係睇阿智頭。如果阿智要害距地、或者我地既話，唔係分分鐘既事？使咩耍小手段？搵個冠冕堂皇既理由就得。
需要從中作梗只係阿勇或者阿彩其中一個。
而未查清之前，貿貿然同阿智講出呢個猜測，只會為距徒添煩絮。
距地出左呢個門口就係喺生與死既界線之間，任何一個分心都可能會係喪命既原因。
更何況喺咩都未明朗之前，呢個猜測只會徒添猜忌。
我要自己查清先。
提前埋伏，又只衝住靚妹而去，我總係覺得係有密謀。
而密謀有兩種可能性，就係內鬼自己覺得靚妹有威脅想除掉靚妹、或者係背後有勢力想要靚妹消失。
呢個...... 我更傾向於後者。
入到黎得到控制怪物既能力，然後仲需要測試能力，不被朝夕相對既隊友發現，隱藏至今。如果真係隱藏得咁深，只能話呢個人非常恐怖。
同埋就算係距係本身就有控制怪物既能力都好，距隱藏自己能力既目的係咩？有咩重要得過一齊逃生？除非距就係事件既背後操盤人，潛伏喺另外兩人身邊另有目的。
但從距地幾個已經認識一段時間黎睇，內鬼都應該只係一個普通學生。
咁比較合理既解釋，係擁有控制怪物能力既係另有其人，內鬼只係提供情報，甚至被要脅。
唔係既話，內鬼作為一個普通學生，獨自牽扯整個空間事件，擁有控制怪物既能力，仲要不知何故潛伏喺另外兩人身邊，呢個解釋太多疑點，比較令人難以相信。
不過要驗證呢件事都有個比較簡單既方法，但係唔知work 唔work。
「小豆？」我走埋去阿彩同靚妹身邊。
行埋去先發現......距地竟然喺度玩自拍濾鏡？
我一行埋去，靚妹就懟左個鏡頭黎我面前，我塊面即刻變左做雪餅。
我有d 不耐想要推開部手機，奈何我有求於靚妹，只好勉強咁對住鏡頭笑左一個。
「咔嚓！」靚妹手起刀落，瞬間為我留下「倩影」。
「大叔你聽我講！依家d科技好誇張！簡直係魔法既程度！竟然可以用依個盒仔就輕鬆改變人既容貌！」距拎著阿彩部手機好雀躍咁同我講，而阿彩就寵溺咁喺度摸靚妹個頭。
「啊哈，係咩？」我乾笑兩聲，裝作耐心咁樣聽靚妹講。
「大叔你幾上鏡啊！我陣間就將張相放上咩咩gram上面！」距嘴角泛起狡猾既弧度。
死靚妹......好彩阿叔一早唔在意形象。
「係呢？小豆問你一樣野。」敷衍完距之後我單刀直入。
「咩啊！」可能感受到我有求於距，距即刻變返做一副愛理不理既態度。
阿彩喺旁邊失笑幾聲。
「你......有無感知其他能力者既能力？」我唔理會距既態度轉變，繼續問落去。
呢個時候阿彩都好奇咁坐起身，眼仔碌碌咁樣望左黎我呢邊。
啱既啦，你都聽聽，睇下你得知我調查既意圖。睇下會唔會焦急起黎露出狐狸尾巴。
下你話阿彩喺啱啱既事件都有受傷，點解都係有嫌疑？
距有既係致命傷咩？唔比距自導自演？
「無！」靚妹乾脆咁回答，顯然係想即刻打發走我。
「係啊？」我表面佯裝垂頭喪氣。
「我都估到架啦！畢竟你喺能力者入面實力都未必係上乘......當我無問.....」我轉身假裝準備離開。
「喂企喺度！」比靚妹喝止左。
到我泛起得逞既笑容。
「咁即係.....」我又回過身黎，碌碌狡猾既眼珠，佯裝無辜咁問。
「竟然話呢種小事本小姐做唔到？我地幾個入面根本就無其他能力者！」距氣急敗壞咁話，成條頸都紅曬。
Bingo！得到答案！
其他唔知，但靚妹強大既自尊心倒係可以利用一下。
我又觀察左一下阿彩既反應咩，距就只有對我同靚妹既互動感到生趣。
得到答案後，我無再理會靚妹，轉頭向阿彩。
「阿彩，啱啱小豆昏迷既時候點解要護住距？」我猝不及防咁問左呢個問題。
阿彩睇起黎仲喺度心不在焉咁樣陪靚妹玩，突然比我問一條咁既問題，距表現得好愕然。
就係要呢種無防備既反應，咁樣先容易透露真話。
距沉澱一下，眼瞼徐徐降下。
「也許無他，只係咁啱距需要幫助。」距釋然咁講。
忽爾間，距就好似一個滿腹故事正要訴說既老人。
我有d 呆住。
靚妹望望雞怪既屍體，望望阿彩肩上新鮮既傷口，又諗諗我講既野，好快就明白我講既野既意思。
「原來係阿彩姐姐救左我！阿彩姐姐最好啦！」靚妹轉身一下攬落阿彩身上，緊緊咁抱住。
阿彩拍拍靚妹個頭，宛然搖頭表示不算什麼。
睇落好真誠。
我無再講d 咩，轉身離開。
但係諗到控制怪物既能力......如果包括洗腦？
我頓時覺得有d 毛骨悚然。又回頭睇住熟絡得詭異既靚妹二人，深深咁樣望左阿彩一眼。
……
夜晚九點幾十點，我企喺簡易手術台前，忙碌著什麼。
手術台上面既肉塊已經骨肉難分，同時滿地血水，旁邊係形形色色被拆分出黎既小肉塊。
我將雞怪既屍體搬左入黎診療室研究，覺得會係個突破口。
阿彩同靚妹都只係望左一眼。阿彩比較好奇，但係都無講d 咩。
我睇住雞怪既身體嘖嘖稱奇。
距擁有人類既肺部、心臟，甚至腦袋大小都同人類無異，但係內臟既其他結構卻同雞隻驚人相似？
係基因合成既產物嗎......定係人體實驗？
最噁心係距既胃部：竟然藏住好幾隻未成形既蛋。
之前都見過距嘔蛋既過程，呢隻野既生殖過程到底係咩原理......
點都好，我終於搵到雞怪係受操控既證據：我喺距既脊椎上面發現左一張尺寸細微，常人難以發現既晶片。
晶片無損毀。我搵到一d 冷門既網上教學，利用少量簡易物資放大晶片發放既訊號，同時用特殊手機應用程式捕捉訊號既波長。
「特......特遣隊......殺......殺曬......」幾經辛苦調教，手機入面終於發出斷斷續續、勉強能夠辨認既聲音。
特遣隊？
同時可能係訊號被放大，出面pantry既一台設備都作出左反應，發出清晰可聽見既「沙沙」雜訊聲。
呢個簡直係一個大驚喜。
我緊張咁吞左一淡口水，胸口發出雀躍既鳴動。
要揭曉了，只要知道嗰台設備係屬於邊個.......
正喺我要出去打開櫃桶既時候，練槍房大門外一陣騷動。一陣陣哀嚎聲、撞擊聲、抓擊聲衝撞大門，騷動喺整個練槍房迴盪。
我愣喺原地，四肢瞬間變冷。
咁啱？偏偏係呢個時候？
係幕後藏鏡人既後援到了嗎？