OT臨收工先發現走唔出個office 仲要比野追殺點部署: #β423-0020【代號：用槍】

飯後，幾人正喺度收拾緊張枱，阿智將我拉到左一邊。


「做咩啱啱要袒護靚妹啊？睇中人地？睇唔出好呢味wor，仲以為你心有所屬。」我斜視住阿智，乘機揶揄。


「你亂講咩啊！你明明就知道我既目的！仲有阿！人地依家叫小豆啊！」阿智漲紅住面，有d氣急敗壞咁話。


睇黎就真係好怕被誤會。






有啲可愛。


不過我當然知道距既意圖。


以離開既目標黎講，同靚妹打好關係係百利而無一害。






如果撇除靚妹幾乞人憎既話，我倒唔介意同距打好關係。


「係呢？搵我過黎做咩？」我打斷左距既惱羞小劇場。


阿智主動搵我，一定係有d 重要野交代。






阿智收斂表情，神神祕祕將我拉到槍櫃前面。


「我......教你用槍。」距笑眯眯咁話，眼神清澈。


我有d 驚訝。


「你......唔怕我起你地尾注？」我試探住話。


「你會嗎？」阿智乾脆咁反問，眼神堅定咁注視住我。






我一時語塞。






阿勇撇左呢邊一眼，大概都知道我地呢邊發生緊咩事，但係無多講d 咩。


大概距知道，如果我想挾持距地既話，大可以啱啱阿彩受傷既時候以自己既醫術作籌碼。


畢竟阿彩既傷雖不算致命傷，但亦不輕。不妥善處理既話手尾都可以好長。






唔知阿智係咪都睇透呢點。


「唉。」睇住阿智毫無動搖既眼神，我既嘴角划起弧度。


「咁呢份大禮我就卻之不恭啦！」我豪爽咁話。


……


槍枱前，阿智正熱衷咁向我介紹槍枝。






「S&W SD9VE、SIG SAUER P365 XL，都係新手入門常用既槍枝。」阿智喺槍櫃入面拎左幾款槍放喺我面前。


「我自己幾推薦呢款。」距將一款槍塞左去我手上。


「Glock 19 Gen 5 半自動手槍， 美國便衣警同民眾都常用。槍管稍短，隱蔽性強。後座力稍強於 17，但亦唔算好強。外體為聚合塑膠，槍體較輕。握把較長，比較唔容易脫手。槍管上方帶有螢光準星，可以應付稍暗環境。槍體帶有三重保險，就算係新手比較笨手笨腳都唔容易走火。有效射程50米，標準彈匣為15發子彈，最大一次填充量為33發。」距一邊指向槍身既不同位置，一邊耐心咁向我解釋。


我假裝認真咁聽住，有聽沒有明。


「總之一句話，就係我比較容易上手既款式啦？」我苦笑住話。






意識到我作為一個門外漢無辦法一下子吸收啱啱咁大量既資訊，阿智只好尷尬咁賠笑點頭。


「哈哈無錯。」


雖然阿智話呢款槍既槍身較輕，但係都有一定重量。


同我放喺出面嗰支鐵通有得揮。


不過距咁講，即係有d 更加更加重量級既手槍，咁呢支槍算係咁。


「咁你用邊款？」我一邊把玩住手上既槍，一邊抬頭望向阿智。


佢顯然係無諗到我咁問。距有d 猶豫，喺腰間取下一把手槍。


「FN 57半自動手槍，材質、重量、有效射程同最大填充量都同Glock 17 差唔多。 最大既分別就係距既子彈，係適配於FN P90 衝鋒槍既子彈，穿透力強，甚至可以穿透部分防彈裝備。同時後坐力低，彈道穩定。只係......因為距既威力，各國都係只有軍方同部分警力可以使用，我辛辛苦苦都只能搞黎四把......一把......喺出面探險既過程已經唔見左，就剩低三把......」距顯得好為難。


我睇住阿智手上槍管稍長既手槍，明白左距既言外之意。阿智、阿勇、阿彩，三個人一人一把槍，就係槍不好讓出既意思。


我諗呢個傻仔怕我以為距想搞差別待遇。但我又點會，距地主人家佔用比較好既裝備本來就係天經地義，更何況我呢d 門外漢都未必駕馭到咁好既槍械。


但係有一個比較關鍵既問題。


「喺想像空間唔可以多產幾把？」我皺皺眉問道。


「其實應該係可以既，因為入到黎之後某d槍械既數目都同我原本既槍房不一樣。不過我當初嘗試具現化既時候無諗咁多......」阿智既神情有啲愧疚，好似覺得因為自己既一時大意令大家錯失資源。


但都不能怪距既，如果重要仔細設想到每款槍既數目既話都太燒cpu。


不過能夠操控資源數目呢一點日後睇怕係可以好好利用。


「你盡左力，無人會怪你，依家教教我點用把槍啦。」我拍拍阿智膊頭。


「嗯！」距眼神感激咁回應。


……


練槍枱前，阿智示意我戴上防護眼罩同耳罩。


「唔使戴了吧？反正實戰我地都無機會戴，當係提早習慣？」我有d 疑慮。


「該做既東西就要做，唔好懶！」阿智罕有地強硬。


我都無謂爭辯，乖乖照做。


「一陣實戰前已經有視力同埋聽力損毀點算？」我戴上裝備之後，阿智笑住話。


不無道理。


準備就緒，阿智開始教授握槍基本知識。


「右手虎口位置卡到握存位置，食指緊貼扳機上方槍體，另外幾隻手指包覆槍柄。左手包覆右手，唔好留空隙。食指同樣貼緊槍體，咁樣可以盡量避免彈道向左右偏移。唔好托底，唔係開槍既話會加劇手槍向上彈射。lock 實手腕，將槍既後坐力轉移至膊頭。上膛之後握扳機，扳機上面有一個保險制，要同時按下，將前準星同後準星向目標對齊。」


我按住阿智既說話手忙腳亂咁樣行動，勉強跟上距既說話，好快將動作調整到發射前既一刻。


「初次發射就試下15米啦！」阿智笑住乾脆咁話，同時撳掣調整靶既距離。


「準備......一，二，go！」


「Go？」我暗暗發笑奇怪既發語詞，同時緊緊握向扳機。


數秒後，無任何事情發生。


「咦，唔得wor？」我舉起槍查看。


「等等先，唔好拎槍指住我！」阿智有d 驚慌，勉強咁笑住講。


「啊哈哈，係wor。」我尷尬咁樣移開槍。


喺阿智既解釋之下，先知原來係握扳機既力氣未夠。


我重新調整姿勢，吃力咁樣拉下扳機，暗嘆開槍都唔容易。


「砰！」喺我仲未意識到既時候，子彈已經激射而出，瞬間射穿箭靶。同時我既手腕劇烈搖動，衝擊力有種要將我下巴震甩臼既感覺。


子彈既聲音亦係令我有些許耳鳴感，無法想像啱啱對付雞怪既時候兩個接近身貼身射擊既距地，亦都好慶幸我有聽勸戴耳罩。


見我一副深受震撼久久無法回神既樣子，阿智會心一笑。


「等我地睇睇結果啦！」距撳掣將靶移近。


不意外，靶外。


「啱啦！呢段時間你就喺度好好練習啦！」距一副忍俊不禁既樣子，開聲鼓勵。


「嗯......」我一副被折磨慘既樣子，無神咁回應。


就開左一槍。


阿智輕笑一聲，將我留喺原地慢慢緩過黎。同時，距走向展示牆，開始......拎裝備。


阿勇見狀，都開始向阿智走近。


距地拎左幾把手槍、軍刀，幾粒類似手榴彈既玩意，通通塞到腰間既裝備包，然後每人掛起一台衝鋒槍。


我微微呆住，連忙走上前。


「去邊？」我嚴肅咁詢問，語氣中有一絲為距地藏不住既焦急。


「祥哥唔好問。除左離開呢個目標之外，我地仲有必須要做既事，完成自會番黎。」
距淡淡咁話，但仍不忘補上一個微笑。


「我同你地一齊去！」我堅定咁話。


「你知我地要去做咩咩？你熟悉槍械咩？啱啱見你開一槍都拎你半條命咁，唔好去拖我地後腿！」阿勇望過黎，下重語氣質問。


「勇！」阿智連忙喝止。


但我無言以對。作為一個成年人，我呢種自覺都仲有既。


「咁帶埋小豆......」呢個時候小豆仲同阿彩喺度耍樂，聽到我既叫喊一下望左過黎，一副「關我咩事」既表情。


「祥哥，好好練習，下次過黎幫我地，依家同我地好好照顧小豆同阿彩先。」阿智搭住我膊頭，鄭重咁向我交托。


「雪櫃仲有唔少餸菜，肚餓可以煮黎食，唔識煮既話鋅盤上櫃仲有好多杯面，可以頂好耐。阿彩鍾意睇時尚雜誌，pantry 櫃頂我放左唔少喺度，距悶既可以拎比距睇。同埋距鍾意熬夜，到時到候可以提提距訓較。槍櫃d槍你隨便玩，呢度wifi 唔錯，可以睇片學更詳細既技巧，呢個時候學多d對大家都無壞。」距神情認真咁交代。


「條屍.....」距望望雞怪條屍，猶豫緊要吾要幫忙處理完先走。


「我黎處理。」我直爽咁回答距，但係目光凝視住距。


距交代得太詳細，就好似.....距擔心自己返唔到黎咁。


阿智好似睇出左我神情既擔心，遂開口：


「祥哥唔好亂諗！我地會番黎架！一定！我地幾個仲有個旅行要去！」


睇住距堅決剛毅既神情，我都無再講d 咩。


「番黎啊！唔係個旅行我代你帶阿彩去！」我故意激距，眼裏卻係笑意。


「得啦！」距乾笑幾聲，一副心意盡在不言中既表情。


「我都去.....」阿彩欲起身，卻被阿智搖搖頭阻止。


距上前交代左幾聲，阿彩失落咁坐番低，但都無再堅持。


……


準備完畢，同我交換左聯絡方式保持聯繫，二人浩浩蕩蕩出發，有一種風蕭蕭兮易水寒既感覺。


睇住距地既背影，我眼眶有d 紅。


先幾多歲。


也罷，我都有自己既事情需要做。