OT臨收工先發現走唔出個office 仲要比野追殺點部署: #β423-0022
趕得切嗎？依家去pantry打開櫃桶睇一眼確認左先。
聽住門外既拍打撞擊同埋哀怨既嚎叫聲愈來愈大，我牙關一咬，爭取時間衝番出pantry確認雜訊聲既來源。
喺槍房門外既噪音干擾下，本身就微弱既雜訊聲受到既掩蓋更甚。
為左加快搜索效率，我將耳仔貼喺d 櫃度，順著櫃面逐格逐格搵。
「阿叔！」pantry 門外傳來靚妹驚恐既叫喊。
「同阿彩一齊匿埋去廁所先！」我厲聲吩咐。
咁樣就算外面既怪物爆左門入黎，都拖延到一陣時間。
出面無回應，但我都無暇理會，先抓緊時間。
pentry 呈u字型三排櫃，分頂櫃同座地櫃。
我順著右到左搜索。一邊搵，雜訊聲一邊變得愈來愈微弱。
心中變得愈發焦急。
答案近在咫尺，唔通就要喺眼前白白流走？
終於，喺雜訊消失既前一刻，我成功鎖定左聲音既位置。
係右邊座地櫃鋅盤正下方既嗰個櫃桶。
我心中難免升起一絲雀躍，即刻伸手就要拉開櫃桶。
我用力一拉！
櫃桶紋絲不動......
我既心臟猶如猝不及防受到一下重擊。
定睛一睇，個櫃上左鎖。
「砰！」我不甘咁樣出手敲左一下個櫃。
「咔！」無等我一絲喘息，槍房大門傳來一下碎裂既聲響。
我全身既血液瞬間凝結。
我好清楚呢下碎裂聲：練槍房即將失守。
依家無時間諗咁多。
我匆忙咁衝番入診療室，將連結喺簡易訊號調整設備上面既晶片掹左落黎。
睇住手上仲喺度一閃一閃既晶片，我只係思索左片刻就將距收左入褲袋。
唔可以比距地發現我搵到既野。
我抬頭穩定心神，正要走出診療室......
「轟！」震耳欲聾既聲音傳遍練槍房。
最擔心既事情都係發生左：練槍房既大門被徹底打碎。
我即刻三步併兩步趕番大廳，眼前卻係已經一片混亂。
好十幾隻黑炭一樣、骨瘦如柴、矮細、頭上長住好似野獸一樣乾燥既鬃毛，身上冒住黑煙，好似地獄小鬼既怪物正喺個廳度大肆破壞。
距地喺槍房一拐一拐，四處亂躥，就好似一堆喺下水道蜂擁而出四圍爬既臭蟲一樣，拎住各式既武器：鐵通、界刀，仲有......水桶、鉛筆？
好似發洩一樣，距地拎著手上既工具猛打猛砸，用嘗試拆毀眼前既事務：練槍枱被打爆、牆壁被划上密密麻麻既划痕、展示牆上面既槍枝都被掃左落黎唔少。
我左右望去找尋靚妹同阿彩既身影，想確認一下距地係咪已經匿埋，卻見到距地仲係大廳梳化前，被幾隻拎著鐵通既怪物小鬼圍住。
一棒、一棒，靚妹早就已經頭破血流，手上緊緊抱住阿彩。
注意到我既出現，距淚眼汪汪咁抬頭：
「大叔！彩姐姐唔醒啊！點算啊！」
鮮血同眼淚混和埋一齊，滴落地面。
睇到呢一幕，我莫名一個氣上心頭。
我稍稍低頭，一步一頓咁樣紮實咁走到黑色小鬼既身邊，一手揪住其中一隻小鬼既頸部，就將距往牆上fing。
「碰！」一聲巨響，撞到牆上既小鬼直接碎成渣。
「咚！」鐵通跌落在地，聲音清脆得引人注意。
我呆呆咁睇住地下嗰堆建築廢料一樣既碎渣，又望一望自己沾滿黑色粉末既手掌，有啲回不過神。
手感......好輕。
睇黎距地只係攻擊力比較強，體質好差。
經咁樣一fing，我瞬間信心大增。
一隻小鬼打算撲向我，我一下抓住距個頭，瞬間碾碎，碎片四處飛濺。
另一隻喺呢個時候已經爬左上我既手臂，用腳緊緊夾住我腰間。我一下抓住距箝制住我既左手，發力扭斷，然後奪過距手上既鐵通，狠狠咁樣敲爆距個頭。
瀰漫既煙塵令我嗆到咳左幾聲，但都無暇理會，我即刻衝去靚妹身邊。
我喺度擔心阿彩係咪比怪物襲擊，打到昏迷左。
湊近阿彩，發現距並無咩明顯既傷口，睇落只係訓著未醒。距眉頭緊皺，個頭不時左右擺動，神情好不安痛苦，額前滲滿汗，睇落係夢到一d令距好唔好受既野。
「我啱啱不斷嘗試叫醒彩姐姐，但係距都係無反應啊！」靚妹噙住淚話我聽。
咁奇怪？
我正打算幫距檢查睇睇，身後卻係傳來一陣「沙沙」既動靜。
一陣煙塵聚集，幾隻黑色小鬼竟然慢慢重新成形。
我額角滑過一滴汗：果然無咁簡單。
我唯有先將阿彩放喺一邊，起番起身準備應戰。
「靚妹，唔好隨便動用能力！等我處理！」我怕陣間靚妹都冧埋，於是不容置否咁樣叮囑一聲。
可能真係慌亂，靚妹只係無神咁樣點左點頭。
重整姿態，我衝去槍枱嗰邊，將幾隻小鬼引曬過去。
同時槍枱嗰邊既小鬼都好似受到召喚咁，怒氣沖沖咁向我衝埋黎。
我一拳一隻，開始瘋狂咁樣暴打圍上黎既一堆小鬼。
清脆既打擊聲一下接一下，空氣中頓時粉塵四起，瀰漫住一股濃烈既燒焦味道。
但當然雙拳難敵四手，我好快就捱左唔少棍、唔少刀，全身疼痛。
只係慶幸距地智慧唔高，不懂得利用滿房間既槍械，唔係既話我地只有橫死既分上。
但係隨住粉塵一次又一次匯聚，整整十幾分鐘，怪物既數量絲毫不減。
我身上瘀傷、划傷既數量隨時間增加，甚至腰間都插左一把界刀喺度。
更甚既係，隨住搏擊既時間增加，小鬼既身形不知不覺間變得愈來愈巨大，耐打性都變得愈來愈高。
由矮我唔止一個頭，慢慢已經變到同我差唔多高。而打喺距地身上既手感，都愈來愈吃痛，已經同打喺鎧甲身上差唔多。
猝不及防，一個水桶被蓋左喺我頭頂。我瞬間失去視線，而小鬼們就趁呢個機會蜂擁而上，將我緊緊咁壓喺地下。
艱難咁摘除水桶，一個猙獰既面容瞬間映入眼簾。
兇狠哀怨既眼神，彷如剛出土文物乾枯既臉龐，皮膚緊貼骨骼，彷彿中間無任何肌肉支撐。最噁心即係，距既左面上面嵌滿左一排大頭釘。
我既胃一陣翻騰。
啱啱距地一路馬騮一樣上蹦下跳，都睇唔清距地既面容。依家幾乎零距離接觸就睇得一清二楚。
雖然距既身體係由黑炭一樣既物質組成、自帶黑煙、又頭頂鬃毛，但係面容卻唔係某d 抽象既扭曲怪物狀，又或者係粗放既野獸狀。正正相反，面前既係一張栩栩如生，比雞怪樣貌更具體既男性面孔。
並唔係縫合一樣將人臉穿鑿附會上身體，而係分明呢幅詭異既身體就係呢個人既一部份。
眼見每隻小鬼都生得各有特色，一隻個樣比較女性化，面上濃妝豔抹晃似豬扒，左臉頰插住一支唇膏，嘴角仲有d 莫名既紅黑色液體正在往下滴。另一隻個樣比較陰柔清秀，但係頭髮稀疏，鼻青臉腫，仲著住一條顯眼既粉紫色底褲。
相同既係，距地相約粗壯得失控既肢體就好似係度宣洩過量既、失控溢出身體既復仇慾。
令我感到不祥既係，我對呢幅面孔有莫名既熟悉感，但係一時講不出。
「點解要蝦我......點解要蝦我......點解要蝦我！」距不斷呢喃，慢慢轉為怒吼。隨即舉起粗壯既雙手緊緊咁鏈住我條頸。
側邊既怪物同樣喺度自顧自咁呢喃：
「我唔係gay啊！唔好打啦！」
「唔影啦！我唔影啦！我呢d 醜女唔配影相！」
但我邊得閒理會距地既狀況，理得你地有d 咩冤情，先保命再講。
我不斷揮拳，都只係能夠喺小鬼身上打甩一d 灰，而且我都好快比其他小鬼壓制。
意識彌留之際，我瞥見喺睡夢中愈加掙扎既阿彩，產生左一個猜想。