OT臨收工先發現走唔出個office 仲要比野追殺點部署: #β423-0019【代號：收容/夢想】

阿彩不亦樂乎咁樣喂住小豆食野，又不斷主動嘗試主動帶起話題。有趣既係小豆比想像中快被攻略，好快就同阿彩變得頗為熱絡。


而阿智同阿勇，就以扒飯為掩飾，實則係有意無意咁樣望向小豆。


就連我都忍唔住望多兩眼，氣氛頗為詭異。


阿智有距自己既心思。一時望向小豆，又迅速咁樣瞥向阿彩幾眼，假裝不經意。






可惜傾慕難藏。


估計只係阿彩專心咁同小豆溝通，先留意唔到呢個明顯既小細節。


至於阿勇，就顯得更全神貫注喺小豆既身上。






都唔難理解，以離開呢度既條件黎講，小豆興許就係我地幾人中最大既關鍵，甚至可以解開背後更多謎團。


到底基金會係咩？距同今次事件有幾大關係？


點解雅威講距地同我地不一樣？






雅威講既離開方法究竟可唔可信？


小豆都可能有答案。


咁樣我都大概理解左阿智要同小豆大好關係既理由。


「小豆啊？你係咪會幫我地手離開架？」阿智率先打開話匣子。


呢個都係阿勇關注既問題，所以距忽而變得格外專注，雙眸都變得銳利。






畢竟阿智距地手握強大既武器資源。小豆既取態應該會好影響距地處理事情既方式。


但我卻顯得不大在意，我對呢個刁蠻既小鬼不抱太大好感，亦不抱太大期待。


「唔知wor，睇下本小姐既心情啦～」小豆大口咀嚼住飯粒，不以為意咁話。滿臉都係沾沾自喜既自滿。


不出所料，一個模棱兩可既答案。


但你既心情睇落倒是不錯。






「咁你同基金會係咩關係啊？基金會又係咩啊？」阿智假裝不經意咁問落去。


但係......


意圖目的性太強了吧？


令到我都不禁望多兩眼靚妹既表情，好奇距既反應。


「我啊？係距既收容物。基金會就係......一個收容好似我咁既怪物既地方。」小豆倒睇落無點在意，坦然咁將阿智想要答案講出。






或者距比我想像中單純？又或者只係距依家心情真係好好。


咁樣聽落基金會既初衷係頗為光明磊落，但係背後有無d 咩污糟勾當就唔知。


例如......為左收容進行既一d 極端手段，或者利用收容既怪物做一d 滿足自己野心既事。


畢竟有小豆呢種級別既怪物喺度，好難想像唔去利用距地。


「收容係指困住？」阿智好奇咁追問。






「你可以咁理解啦，唔比我地出黎害人lor。」小豆聳聳肩，濃濃既自嘲意味。


「哎呀一定好辛苦啦！」阿彩忍唔住即刻為小豆抱不平。


距作勢要抱抱小豆，卻比距嫌棄咁一把推開。


「你既意思係你覺得自己係怪物？」阿勇無理會阿彩自發既溫情小時刻，自顧自咁冷笑地望住小豆追問。


「唔通你唔係咁覺得咩？」小豆無比阿勇既說話拋窒到，反而深深凝視住阿勇既雙眼，對距邪異一笑。


阿勇微微驚訝於小豆嗰份超越年紀既通透，但又盡力不表露。


依家睇真d：小豆深邃既雙眸，修長既睫毛，光滑既肌膚，修長既臉龐，配上左眼眼角的一滴淚痣，頗有漫畫入面面美魔女既模樣。


加上距言辭間與年紀不相符既老成，嗰份不自然感更顯距神秘既氣質。


「切！巫女！」阿勇假裝不屑咁譏諷，掩飾底下對小豆猜不透既不安。


「咩年代啊！」阿彩反手一個反唇相譏，露出一個唾棄既表情。


小豆見有人撐腰，順勢對阿勇露出鬼臉。


阿智見到呢個焦灼既畫面，顯得不知所措；而我就有d 啼笑皆非。


果然都仲係細路。


「咁呢件事係唔係基金會搞出黎？唔係既話你地又點知離開既方法？」我知道唔可以放過呢個機會，於是無理會距地既小打小鬧，徑直追問小豆。


「欸欸欸！我知你地套緊我料！但係適可而止就好啦！」口風一轉，小豆又突然變得守口如瓶，嘴角露出狡黠。


我不禁面露苦笑：都係唔得。


都唔知係咪專登吊我地癮，以此為樂。


「阿伯有交代過：內籠既野唔好比你地知太多，都係為左你地好咋！」小豆得得戚戚，裝作長輩既語氣語重心長，場面有d 滑稽。


我心中卻係泛起一陣無奈。


睇黎套唔出任何野了。


但係見距講到基金會同事件既關係既時候就閘住，都間接可以推測事件大機率同基金會有關。


「基金會既全名係咩？」我盡最後一番努力。


¸「秘密！」


隨住小豆故作神祕既表情，呢個話題徹底宣告結束。


不過來日方長，都唔使怕既。如果我地活得到嗰個時候既話。


飯枱既氣氛一時變得沈寂。大家再次變得各有各食，而阿彩就繼續樂此不疲咁樣逗弄小豆。


我倒是無咩所謂。但唔知係阿智受不了呢陣尷尬，定係距不甘浪費剛剛大家熱絡既氣氛，距又站左出黎開話題。


「不......不如，我地傾下夢想啊！」阿智靦腆咁話，耳根子有d 紅。


「夢想？」我有d 無言。


呢個轉場太硬了吧？


「阿叔我無夢想。」我好直白咁講。


呢個係事實。確定左份牛工，打死一世，保三餐，別無所求。


偶爾內心有悸動問自己係咪想咁就一世，但係都無咩行動力，所以都係僅此而已。


但我倒是有興趣聽聽呢班後生仔既夢想。


「我睇得出，落魄醫生！」阿勇當然無放過呢個機會，直接開啟冷嘲熱諷模式，完全就係見縫插針。
好顯然啱啱阿彩受傷既時候，阿勇表面不裝載，實然係有仔細留我地既每個對話同動向。


但阿叔我聽呢d說話仲聽得少？當年放棄投資多年得到既醫生職位既時候，都唔知被唾罵恥笑幾次。


我無點在意。


倒係阿智顯得好急於為我解圍，好似生怕我被怠慢。


「咁......咁不如祥哥估下我地幾個人既夢想？」距即轉移話題。


「阿智既夢想就好顯而易見吧？作為啟智集團既太子爺，最大既志願就梗係當上CEO，迎娶白富美啦！」正合我意，我即刻饒有興致咁猜想。


但係睇到阿智既表情，我好快就知道我估錯左。


距既面上寫滿難言之隱既窘迫。


「umm，係我唔好，故意挖個氹比智哥踩。係我無講清楚，其實智哥係副主席個仔，所以當上CEO 既部分......」阿勇即刻企出黎為阿智解圍，沉著咁為距解釋。


「入面有故事架！阿智有提過，當年距老竇同距大伯都係集團既副主席，主席就係距爺爺。當年距爺爺明明更加睇好距爸爸，但係最後被距大伯用計奪權。呢幾年阿智爸爸一直積累力量，重奪距爺爺既心血。而個傻仔就打算用盡距所擁有既力量同能幫距爸爸！」阿彩亦都出黎幫口道。


喺阿彩既臉上見到少許既憐惜同欣賞。


可惜阿智呢個時候將眼神移開左，無睇到。


「大伯明明知道阿智老竇係個心腹大患，都唔剷除距？」我有d 疑惑。


「啱啱咪講大伯係奪權既。所以大部分高層既心其實係傾向阿智爸爸。距大伯心知一下子換血必然重創公司，所以既唔夠膽動管理層，亦唔夠膽動阿智爸爸。但事實上大伯呢幾年一路都喺度培養心腹，慢慢削弱阿智爸爸係公司既力量，同時阿智爸爸都一路暗地積累力量扳倒大伯。」阿彩耐心咁解釋。


聽起黎就係好兇險既商戰，all or nothing 嗰隻。


睇黎富二代都唔易做。


「所以阿智爸爸就培養阿智作為反擊力量？」我覺得我呢個猜測幾合理。


阿彩同阿勇對望，好似唔知點開口。最後都係由阿彩猶豫住開口。


「啱啱好相反，三兄弟入面阿智爸爸最睇唔起既就係阿智......」


聽到呢番話，阿智顯得好沮喪。


「但係阿智都好努力架啦！幫上忙係遲早既事！我信距！」阿彩連忙話鋒一轉，希望可以起一d 撫慰作用。


但感覺到話中既信任同埋欣賞並不假。


阿智投以感激既目光。


「做兄弟我點都陪到你成功既一日！」阿勇都一手拍落阿智既膊頭，堅定咁話。


阿智既表情先稍微緩和。


「係啊？咁阿勇你既夢想呢？」我有少少漫不經心咁繼續問落去。


阿智既處境我的確幾同情，但只能講家家有本難讀的經，所以我都無點放喺心上。


距地既熱血戲碼我亦都早已免疫。


「我既夢想就係陪智哥做到距想做既野。」見到我對阿智既事情並不表現出多大重視，阿勇既面色沉左落去。


而距既答案明顯係對我既態度某程度上既抗議。


「咁阿彩呢？」距既答案依舊無引起我幾大興趣，我依然選擇忽略，然後問下一個。


「我......無咩遠大既夢想。夢想好遙遠而且唔一定實現。我只係有個不太奢侈既願望，就係出到去我地四個人可以成功去到一次旅行。」阿彩猶豫半分，然後低頭輕笑，雙眸虛掩，好似已經喺度幻想旅行既畫面咁。


「以阿智既家底，要請曬你地去旅行唔成問題吧？」


「我地約定過旅費要自己賺番黎架！要係一個全憑自己能力得以享受既旅行！」阿彩焦急咁反駁，好似喺度維護d 咩信條咁？


係其餘幾人家底唔太好？


睇睇其餘兩人反應：阿智含蓄點頭表示支持，而阿勇就有d 嗤之以鼻。


「喔......」我正喺度消化呢個微妙既願望，


「等等！四個人？」


阿智、阿彩、阿勇，邊度黎第四個人？


都唔會將我地兩個count 入去la。


阿智距地幾人相互睇左幾眼，然後有默契咁低頭扒飯不語。


阿彩似乎意識到自己講錯話，係最快低下頭。


氣氛真正陷入左死寂。


我皺皺眉頭望住距地幾個。


「我仲未講我既夢想啊！」呢個時候小豆不適時咁插話。


「我既與其話係夢想，不如話係最近既願望啦！就係殺曬你地！」


小豆興奮咁闡述。但係話語一出，又係比我一下巴落個頭道。


小豆猛然回頭，正要發作，卻見我又要作勢怪叫，只好摸摸頭收斂，忍左落黎。


大家見到呢滑稽既一幕，都唔多唔少忍唔住偷笑。


咁樣氣氛先稍微緩和。