OT臨收工先發現走唔出個office 仲要比野追殺點部署: #β423-0017【代號：蹺蹊】

圍在桌前，幾人默默爬飯。


不得不說，阿勇既手藝真係很不錯。


青菜炒肉絲比佢炒到鑊氣十足，連用黎吊味既韭菜都非常入味。


用黎打芡既醬汁同出面食到既唔同，更加鮮味。






睇黎有d 獨門技。


黃花魚比距煎到鮮嫩多汁、外脆內軟，重點係表皮完好無缺，足見功架。


然後竟然仲有梅菜扣肉。顯然係事先醃製好，但我點都無諗到入到黎呢度仲可以享受如此複雜既菜式。






「嗯！呢個好食！呢個都好食！」我就好似餓左三日既癲狗一樣，嘴入面一邊呢喃，手就無停止過將餸菜塞入自己個口度，成個嘴塞到好似倉鼠咁，又滿臉飯粒。


「咁樣食法，哽死呢度唔會有人識同你急救架！」阿勇嫌棄咁話。


「唔使擔心我識少少既。」阿彩尷尬咁陪笑住講。






咁我的確係已經差唔多超過十六個鐘無食過野，除左之前靚妹塞比我嗰塊「牛肉」啦下，到依家都唔知係咪。


呢度既時間流速雖然變慢，但都只係延緩我肚餓既速度，該食既都係要食。


同埋.....距煮既手法好有家的味道。


「阿唔阿唔！咳咳！」我肆無忌憚咁大動作咀嚼，終於唔小心哽親，大力咳左幾聲。


將幾粒飯粒噴左落阿勇個頭到。






全場空氣凝結。


我屏住氣息，睇住阿勇沉住面，一語不發咁樣將頭髮上面既飯粒撩返落黎。


距望住手上既飯粒，隨即破口大罵：


「邊有人好似你咁食野架！」


啱啱講完，又一粒飯粒噴左去距面上面。






我同阿彩都強忍住笑意。


阿勇忍住怒意回頭，見到阿智同樣係不顧儀態咁樣大快朵頤，簡直同我好似孖公仔咁。


阿勇既表情變得生硬，語氣都柔左落黎。


「智哥你慢慢食，呢度無人同你爭啊。」距苦口婆心咁樣好言相勸。


睇到呢一幕既我同阿彩忍笑忍到就黎內傷。






「咁係好食啊嘛！」阿智個嘴同樣塞滿食物，含含糊糊咁話。


「有無咁誇張啊，你平時喺屋企都有大廚整比你食啦。」阿勇哭笑不得咁話。


「唔同架唔同架！屋企大廚整嗰d 太......」阿智好苦惱搵唔到咩詞彙。


「公式化。」見狀我幫距補上。


「係係！公式化！祥哥你中文真係好啊！」






「總之阿勇你整既特別好食啦！」阿智陽光咁樣望向阿勇。


「嗯......嗯......」阿勇見狀靦腆咁回應。


我同阿彩都比呢一幕驚訝到張開左嘴。


「你睇下連祥哥都食到津津有味啦！」


「距點同，距連怪物d 蛋都想食。」


我聳聳肩，無辯駁既打算。


但係講起雞怪，我突然諗起d 咩。


「講起雞怪......你地啱啱有無咩覺得奇怪既地方？」我突然臉色一沉，話鋒一轉，引起左距地幾人既注意。


「奇怪？」阿彩有d 疑惑咁話。


「嗯！的確！距今次目標好似特別明確！」阿智即刻接話，但依然不忘將飯菜往嘴裏塞。


阿勇則係低頭沉思。距將飯碗舉喺面既前面，睇唔清距既表情。


「今次？」我敏銳咁捕捉到阿智言語間既重點。


「係啊！」阿智毫不猶豫咁回應。


「呢種怪物並唔罕見，我地都見過、對付過好幾隻，都躲避過好幾隻。」距接續住就解釋。


「揀食嗎？」


「唔揀食。」


「的確，啱啱明明我都喺距面前，距都堅持要將我拎開。」阿彩都比帶動左思考，摸摸下巴插話。


「無錯，距就連我地幾個既干擾距都完全唔理。」我稍稍認可阿彩既話，又加上更多重點。


「之前第一次見到距既時候，距殺完我既同事就追殺我，睇落都係無差別攻擊既感覺。」


聽到有人犧牲，幾人既內心都變得稍稍沉重。


「嗯......唔通......係呢個靚妹對怪物黎講有d 咩特別既吸引力？」阿智刻意跳過有人犧牲既部分。順住我地既話，阿智比出左距既猜想。


我地幾人既目光頓時落到仲係沉睡中既靚妹身上。


距既身分又多左一樣謎團。


「仲未完。你地有無發現，隻怪物係潛伏攻擊，即係匿埋等待時機。」


「你既意思係......」阿智同阿彩都唔太明白我想講既野。


「你唔覺得太似一個人類既行為模式啦咩？」


阿智同阿彩茅塞頓開。


同時阿智腦入面閃過雞怪就好似聽得明我地講咩咁，喺受到致命傷既前一秒扭頭避開子彈既噁心模樣。


「而且呢隻怪物今次都特別強悍......」阿勇喃喃道。


「唔通距地識進化？」阿勇提出假設。


「都有可能。」我頓左一頓。


「但係你試試將點連埋一齊。提前埋伏，目標係靚妹，極具人性化既攻防，就好似......」我循循善誘。


「早有預謀一樣！」阿智依舊係適時接話。


講到呢度，幾人驚訝咁望向雞怪條屍體。


「會唔會只係咁啱距搵到最適合既獵物咋？你呢個猜想好陰謀論。」阿勇皺住眉頭咁話。


「可能啦。」我不置可否，撇左阿勇一眼。


「但都不無道理，畢竟個靚妹係我地之中身分最神秘既人......」阿智依舊理性。


我無再講落去。


其實有一樣最重要既野未講。


有預謀就代表有藏鏡人。我唔信呢種智慧級數既怪物會係密謀者本人。


但係距地係點樣我地既位置？尤其我同阿智距地啱啱先相遇，呢個又係阿智既私竇，外面仲要隔住個課室。


撇除任何超自然元素，最合理既解釋就係......有內鬼。


而且仲係衝住靚妹黎，甚至將幾人既生死不顧都不惜。


之所以唔同距地講呢件事，係因為無確鑿既證據之下，呢個猜想既挑撥意味太濃。


而且太多疑點：例如點解咁短時間就可以通風報信？ 係咪預知到我哋嘅到來？


我始終只係個外人，一個唔小心距地甚至可能會懷疑係我自導自演。


「話說靚妹咁耐未醒，會唔會有d 咩問題？」阿勇可能見氣氛有d沉重，隨口轉移左話題。


我被打斷思緒，正打算回頭回話。回過頭，竟然發現靚妹唔知幾時已經醒左，睡眼惺忪一臉茫然咁坐喺梳化。


幾人都愕然咁望住靚妹。