OT臨收工先發現走唔出個office 仲要比野追殺點部署: #β423-0016【代號：傷疤】
準備好用具，妥善消毒後戴上口罩與手套，我來到阿彩身邊。
「阿智你先幫阿彩盤起頭髮，然後...... 阿彩你的上衣至少褪到手肘處，左邊肩帶褪下。」
阿彩聞言不語，低頭抬手護住胸前，睇落有d 不情願。
我心領神會，伸手拍向距無受傷既嗰邊膊頭，安撫距話：
「內衣唔使除，同時將上衣褪到我能夠治療既位置就好。你既傷口偏後背，陣間治療既時候我背對住你，唔會見到d 咩。」
阿彩聽到之後鬆一口氣，開始緩緩將上衣褪下，然而動作到一半又僵住，抬頭有啲羞澀咁望向阿智。
四目相投，阿智後知後覺先終於知道阿彩眼神既意思，老臉一紅，摸住發燙既後頸尷尬咁話：
「咁......咁我出返去等，陣間有d 咩需要幫手再搵我。」
細聲如蚊。
距大步轉身正要走，卻係比阿彩抓住左距隻手。
「留......留低陪我......」
比剛剛阿智既話仲要細聲。
阿彩依舊低著頭，睇唔清距面上既表情，但係從同樣發燙既耳後跟唔難估到。
「啊.......嗯......」阿智僵喺原地，只能做出嗯嗯啊啊既反應。
唉，青春。
「好啦，都準備妥當既話就開始治療啦。」
我將升降椅推到阿彩身後，同時開聲為阿智解圍。
準備就緒，我睇向阿彩既傷口。
只見上衣已經褪下，露出雪白誘人既青春肌膚，係男仔睇到都多望幾眼，都難怪阿彩會如此提防。
正當我咁樣諗既時候，突然留意到阿彩另一邊既背部，不禁微微驚訝：
滿背大片凹凸不平既疙瘩，蔓延到後頸。
之前著住校服唔多覺。
我忍唔住伸手去探視下係咩狀況。
好明顯係燙傷既痕跡，係近幾年內留下既傷痕，某d 位置仲係有d 潰瘍既跡象。
我忍唔住皺左皺眉頭。
「祥哥，專心治療啊唔該曬。」阿彩冷淡咁講左一句。
我先意識到自己啱啱失態左。
「唔......唔好意思。」
「唔緊要。」
距既回應無帶多少情緒，就好似我啱啱見到既只係一個胎記咁。
我有d 疑惑咁樣抬頭望向阿智，興許係為左自己既好奇有些少既解答。但就係咁樣一望，竟然比我捕捉到距正罪疚而痛苦咁樣望住啊彩。
阿智感受到我既目光，亦都係即刻收斂表情。
……
「傷口已經處理好。傷口比較嚴重，呢幾日先好好休養。任何比較大既動作都有機會撕裂傷口。」
「係既唔該祥哥。」傷口處理好，阿彩既語氣都有啲緩和。
我又撇向阿智，同距遞左個銳利既眼神。
「呢幾日阿彩有d 咩需要既你就盡量幫幫距啦！」
「係係係！無問題無問題！」阿智唯唯諾諾，睇黎真係好緊張呢個女仔。
「唔緊要，距熟手既啦！都唔係第一次！」
阿彩冷不丁既一句話打斷左我既思緒。充滿暗諷意味既一句話，好明顯就係衝住要阿智難受。
我又望向阿智，只見距只係難堪咁低下頭。
舔狗？
但睇落阿智又唔係舔狗體質。
我記得阿彩話過阿智欠左距d 咩。
好難令人唔聯想到阿彩身上既傷痕，甚至槍房外面疑似激烈霸凌現場既課室？
睇黎呢裏面大有故事。
喺我思索期間阿彩已經準備拉上上衣，離開診療室。
「欸，等等。」我制止左距既動作，同時走向附近既藥櫃。
阿彩望向我，有d 遲疑咁坐返低。
我喺藥櫃拎左d 合適既燙傷膏，番黎朝距後背既潰瘍塗上。
「有呢d潰瘍既話，就算傷口處理好左，你都唔容易好好休息。」
然後又向距遞左一支除疤膏。
「女仔都貪靚。」
「唔......唔該。」距有d呆滯咁接過藥膏，然後向我遞左一個無比溫暖既笑容。
呢個時候我先睇清左距既樣。
雪白肌膚下一對寶石般既小眼睛，同尖削顯瘦既面型相得益彰。可惜比齊陰既髮型同小量既痘疤遮擋住左眉毛。假以時日學會化妝，必然大放異彩。
同阿智清秀既面龐倒係幾般配。
更何況阿彩既身高就啱啱到阿智肩膀，互相依靠起黎cp感更甚。
只係距地之間睇落有d 過去......
「扣扣扣！」
呢個時候門外傳來敲門聲，吸引左我地所有人既目光。
「搞咁耐得未啊！啱啱個傷口點睇都唔似致命傷啦！」阿勇喺出面不耐煩咁叫喚。
同時門外傳來陣陣香氣。
我地幾人面面相覷。
「煮左野食！十分鐘唔出黎食既我自己食曬距！」
我地幾人你眼望我眼左幾秒，終於「噗滋！」一聲咁笑咗出聲。
「出去食飯啦！」阿智開朗咁率先發話，然後小心翼翼咁扶起阿彩一齊去開門。
我緊隨其後。
「嘿！」出去之前，我叫住左阿智。
「間房......係咪定左型㗎啦？」
我突然間發覺呢間房有既都係頗為珍貴既醫療資源，我唔希望距地消失。
「一早定左型啦！都過左咁耐！」阿智豪爽既回應打消左我既疑慮。
出到客廳，望住檯面既三餸一湯，我驚訝咁望向阿勇。
「做咩啊？我唔可以識煮飯架？」阿勇不屑咁話。
「阿勇距家境唔係幾好，屋企人都要在外駁命賺錢，從小食嗰方面都要自己搞定，三餸一湯當然難唔到距啦！」
阿智一邊解釋，一邊同阿彩置座喺梳化，同時招手叫我過黎。
我一邊走過去，表面上無咩反應，內裏卻係泛起一陣佩服。
老實說就算到左呢個年紀，除左食外賣我都係靠屋企人。
於是我地幾人就直接開飯。經歷呢一切，再加上大家早前可能都經歷左更加多，都早已飢腸轆轆，就算雞怪既屍體喺隔離都沒有理會，只係埋頭珍惜此刻既寧靜。