OT臨收工先發現走唔出個office 仲要比野追殺點部署: #β423-0015【代號：緊急治療】
阿智比我既一聲叫喊叫回神，即刻dum低槍，衝入一列練槍位既末端尋找急救品。
「阿勇，去搵塊乾淨既毛巾比我。」我抬頭望住按摩椅上面既阿勇。
聽到我既說話，阿勇冷哼左一聲，施施然打開左按摩椅既開關，然後後仰閉目養神。
我後頸不禁冒起青筋：咩態度？
本身以為距地只係不對付，竟然到左見死不救既地步？
見阿勇並不打算動彈，我出手除低左自己件恤衫，鏈成一舊，然後遞比阿彩。
「按壓住傷口，可以減緩出血。」
出血量睇落唔低。 就啱啱嗰折騰一陣既功夫，鮮血已經浸滿左阿彩半身既恤衫。
阿彩後知後覺咁樣接過恤衫。距嘴唇蒼白，額角開始重新冒出冷汗，呼吸再次變得急促。
睇黎腎上腺素減退之後，痛感已經慢慢回歸。
要儘快處理。
我一邊抓住阿彩隻手將距摁向肩上既傷口，一邊大叫：
「急救用品喺邊啊！血都要流乾啦！」
「喺度！喺度！」
阿智連爬帶滾衝左番黎，喺我身邊一下跪落地下，然後將急救箱入面既野倒曬出黎。
繃帶、較剪、幾張膠布、剩低半支既消毒藥水。
我稍稍皺左皺眉頭。
「做咩啊？唔夠？」
阿智睇落好著急。
阿彩背對住我同阿智。我叫距褪下襯衫最頂既兩粒鈕，稍稍拉下上衣比我觀察下傷口狀況。
阿彩望落有d 猶豫。我稍稍疑惑之後明白左阿彩既意思。著阿智另轉頭，阿彩先肯乖乖照做。
望望阿勇。個衰仔仍然係合埋眼無任何動靜，我都懶得理距。
睇住阿彩雪白肌膚上面血肉模糊既傷口，我稍稍嘆左淡氣。
「距需要更加專業既處理，唔係傷口發炎係遲早既事。」
移除爛肉、縫針，呢啲係最基本。
「附近有無可能有手術室，或者話......未定型既房間？」
我睇向阿智。從距露出既半邊面見到距緊緊咬住下唇，一副非常心痛既樣子。
「有！」距無一絲猶豫。
之後距企起身，走左入pantry。
我有d 疑惑，小心翼翼咁扶起左阿彩之後一齊跟著入去。
只見距吃力咁樣移開門旁既雪櫃，但係一個人有啲吃力。
點解要移開雪櫃，唔通.....
「喂！勇仔黎幫手啊！」阿智移動幾下之後發出左求救。
阿勇就依然紋絲不動，好似咩都聽唔到咁樣。
阿智面上閃過一絲無奈，默默咁繼續搬雪櫃。
終究係獨自一人完成，阿智氣喘吁吁。
雪櫃後面赫然係另一道暗門。
我有啲呆滯咁樣睇向阿智。好野，玩啲咁既野。
「唔好咁樣望住我啦！個暗門係原本既槍房就有，嗰時我貪好玩裝落去，當係秘密基地咁既概念。不過呢個空間既呢道門未開過，應該可以用黎解鎖你需要既野！」阿智靦腆又尷尬咁解釋。
「你確定要咁用？唔會浪費？」我凝視住距。
「唔會！」阿智無比堅定咁話。
「明白啦。」我瞭然於心，走到門前。
「召喚需要既房間有無啲咩特別既儀式？」
「無無無！只要盡力想像然後打開門就好，愈具體既具現化得愈好。」
我將阿彩交比阿智，然後走到門前深呼吸。
我合埋眼，猶豫咁樣摸向門把，躊躇左好耐，手心、背脊都滲滿汗。
穩定心神，我鼓足勇氣扭動門把，然後打開眼：
的確係一件手術室，但係環境陰暗無比。手術燈罩碎左一邊，故障既燈喺度不斷閃爍。房間四週既牆上佈滿抓痕，爪痕入面源源不絕滲出血液。然後開始有幾隻乾枯蒼白既手喺地面伸出，慢慢摸向門口。
中央既手術台上坐住左我熟悉無比既老妖公。但係此刻既距面容猙獰如噬人既洪水猛獸，不斷抬頭尖笑，然後突然定睛望住我，就作勢要撲過黎。
「哇哈哈哈哈哈！」「砰！」
喺距飛出黎既前一秒，我一下關埋左道門。
「......」
「祥哥，啱啱既......係咩黎架.....」阿智有啲驚慌咁講。
「無野，唔使在意。」我苦笑住講。
見我咁講，阿智硬生生將到嘴邊既滿腔疑惑吞返落肚。
「嘻嘻嘻......」老妖公呢個時候出現喺我腳邊，蹲坐住惡作劇般嘻笑。
我無理到距。
果然唔得。
唔通真係無辦法？定係搵阿智幫手具現化算？
但係距睇落唔似有醫療背景，距具現化出黎既器具一定無咁具體齊全......
咦等等先，有計。
我嘴角泛起一抹狡猾既笑容。我再次摸向門把，今次無猶豫幾耐直接打開。
明亮整潔既環境，係一間診所既簡易診療室。
取而求其次，基本設備都還算齊全。
我一副得逞既眼光望向腳邊既老妖公，但距早已消失。
Whatever。
「阿智，快d扶距入黎！」我揚手叫距地快d跟上。
「但係......呢啲傷口處理應該交比專業醫生護士做會好啲吧？」阿智稍稍遲疑，好似擔心我一個唔小心就傷左阿彩咁。
「我就係醫生。」我淡然咁話。
喺阿智驚訝既目光下，我緩步踏入左診療室。
然後稍稍停步。
「曾經係。」
診療室外，阿勇聽到我地既動靜。距只係微微開眼撇左一眼，見到我地關上左診療室既門，無多大反應，再次合埋雙眼。