喺啊勇既一聲令下，我地全部人衝去槍櫃拎槍。
突然醒起靚妹仲喺梳化，我硬生生煞停左腳步，諗住回頭帶上靚妹。
但係一個回頭，雞怪已經就黎衝到梳化。於是我一個激靈，鼓足全身既力氣，一下衝向雞怪，抬起肩硬生生咁撞落去。
可想而知，以雞怪既體型，我根本就同撞落一堵水泥牆無分別。我喺掂到雞怪既嗰下就已經被撞飛，一下反衝去附近既牆面，「砰」既一聲乾脆咁撞落去，然後跌左落地下。
我掙扎住坐起身，穩住來自五臟六腑既餘震同埋隨之而來撕裂般既劇痛，不住咁咳嗽。
同時雞怪喺呢下始料不及既衝擊下，保持俯衝姿勢既距一時維持唔到平衡，左右搖擺左兩下就向左翻側左，並且因為距笨重既身形一時難以企返身。
「咳咳咳！得未啊！出人命啦！」我一邊咳一邊大叫。
我語音剛落，幾發子彈就精準咁落左喺雞怪既肚皮上面。
我勉強咁抬起頭，見到阿智已經拎起左槍，彈無虛發。
「砰！」「砰砰！」阿勇都好快加入左戰團，槍聲此起彼落。
可惜雞怪倒下既方向咁啱用肚皮對住阿智距地。儘管子彈已經喺雞怪既身上開左好十幾個血孔，都係收效甚微。
喺粗壯既下肢支撐下，雞怪好快就企返起身。
「吱！吱！」好十幾粒既子彈好似對距黎講只有挑釁既作用。距怒氣沖天咁樣發出震耳欲聾既叫聲。但係奇怪既係，距無理到向距衝撞既我，都無理到向距掃射既阿勇阿智，都係照樣衝向訓喺梳化既靚妹。
「仆你個街！」我咒罵一句。
「唔好郁啊！」我強行支撐住想企起身上前支援，卻係比阿智阻止。
「你依家喺我地射程範圍內，企起身會比波及架！」
的確好尷尬咁我依家就喺雞怪同阿勇阿智既中間。
我唔甘心咁坐返低，同時望向靚妹既方向。竟然比我見到......
阿彩就跪左喺靚妹面前，用身護住靚妹！
阿勇阿智都同時發現左呢件事。
大概係啱啱注意力都集中喺雞怪身上，根本無發現阿彩無跟住我地一齊跑開！
「阿彩你喺度做咩啊！快d走開啊會死架！」阿智用近乎哭腔既腔調，焦急咁嘶叫住。
聽到阿智既叫喚，阿彩既身體愈發顫抖，但係都係堅定咁企喺靚妹既身前。
「你娘親啊！」阿勇大叫一聲，將手上嗰把清左彈夾既槍fing左落地下，然後衝去展示櫃嗰度拎左把散彈，舉起就準備掃射。
「你係咪傻左啊！」阿智厲聲喝止，我睇到呢個場面都呆左。
散彈？ 諗住打死我地全部人？
阿勇為難再三，紅住眼咁樣放低左散彈。
「啊！！！！！」阿彩一聲撕心裂肺既慘叫，令我地既注意力重新集中喺雞怪嗰邊。
只見雞怪已經一口咬落阿彩既膊頭，阿彩既校服逐漸染紅。
「啊哈！！啊哈！！」阿智見到呢幕已經不斷喘氣，理智喺崩線既邊緣。
呢件事我早有預料。
「阿智！射距個頭！依家得你先救到阿彩咋！」我大叫一聲，強行令阿智重新集中精神。
我啱啱已經注意到，阿智既槍法準繩度極高，如果邊個可以開到呢關鍵既一槍，就只有阿智。
反而阿勇就差少少。
就喺我咁樣諗既時候，一槍打左落我腳邊既地板度，彈痕冒出青煙。
唔使諗一定係阿勇。我朝阿勇既方向怒目相向，只見距既手槍係朝著雞怪既方向，似乎根本無留意我。
係真係咁唔準定專登啊？
阿智對手都開始顫抖起黎，呼吸愈發急促，但係依然將槍對準既雞怪個頭。
猶豫再三，阿智都係無開槍。
「我怕傷到阿彩啊！」距哽咽住，用近乎求救既語氣吶喊。
雞怪咬住阿彩既膊頭左fing右fing，好似就係決心要fing走啊彩。
我看在眼裡。
真係目標咁明確係個靚妹？如果要覓食既話做咩一定咁執著係距？
阿彩冒曬冷汗，滿臉鐵青，但係都係盡力不移動半分。
阿智滿身躊躇，思考住要唔要dum低槍衝上去同隻怪物死過。
阿勇似乎睇穿左阿智既心思。距猝不及防一野將阿智向後推，然後一野衝向雞怪，手上唔知幾時多左把軍刀。
「阿勇！」阿智跌低既瞬間用力叫喚，好似想咁樣叫住阿勇咁。但係太遲，阿勇已經衝左上去。
只見阿勇一個俐落既動作，跨到雞怪身上，將軍刀從雞怪既右肩插入，然後狠辣咁樣不停扭轉刀柄。
鮮血源源不絕咁樣湧出，雞怪終於吃痛鬆口。
「吱！！！！」距抬起脖頸仰天長嘯。
雞怪一鬆口，阿彩即刻癱軟左喺梳化上面，摀住傷口不停震。
我連忙衝上前，將阿彩拉開到一邊。
「就係依家！」阿勇粗聲發令。
阿智雖然跌坐左喺地下，但係無發呆太耐。
聽到號令距反射反應一樣舉起槍，瞄住雞怪個頭就係一發。
「砰！」
呢個時候，令人毛骨悚然既一幕出現......
雞怪竟然個頭向下扭左一百八十度，避開左子彈.....
就好似聽得明我地既發射指令一樣.....
距擺動住倒轉扭曲既頭顱，兩隻只有眼白既眼珠蠕動般轉動，嘴巴露出一排黃牙，展現得逞一樣既笑容。距雞一樣既身體同距光頭男人一樣既頭顱令呢一幕更令人發寒。
距轉身舞動健壯既身體，一下將阿勇fing落地下。然後揮舞大腿，踩住阿勇心口一下將阿勇踩向地面。
阿勇緊緊抓住雞怪既腿腳，露出無法呼吸既痛苦表情。
「硌硌硌硌硌硌！」雞怪不停敲動住牙關，好似喺度奸笑一樣。
阿智仍然比雞怪意外既人性特徵驚訝到回不過神黎。
雞怪既腳部加大力度，同時頭顱開始伸向阿勇既頸部，就好似準備飽餐一頓咁。
「刷！」下一秒，毫無預警下，雞怪既頭顱與頸部分離。
「咚！」距既頭顱應聲倒地。唔知係咪錯覺，距既表情停留左喺一絲不可思議上面。
而我企左喺雞怪既身後，手上面喺啱啱阿勇拎黎捅雞怪既嗰把軍刀，把刀仲滴緊血。
阿勇望一望我手上把刀，意識到係我斬斷咗雞怪條頸。
雞怪既身體仍然屹立不倒。我一手將距撥倒，救出距腳下既阿勇。
「唔......唔該。」阿勇望落有d驚魂未定，稍稍不情願地對我講左一聲道謝。
呢個時候，大家先回過神來，雞怪已經倒下。阿勇勉強咁樣扶起自己去返旁邊既按摩椅休息。阿彩坐喺地下，雙手撐住身體，久久無法平息。
阿智慢慢緩過黎。諗起雞怪對阿彩做既一系列過分事情，氣上心頭。
距上前表情冷淡咁用槍對準雞怪既頭。
一發、兩發、三發、四發，直到雞怪既頭變得血肉模糊。
「夠啦！」我喝止住阿智。
「幫我搵急救品！」