OT臨收工先發現走唔出個office 仲要比野追殺點部署: #β423-0013【代號：武器庫】

跨入左下一道門口，眼前既景色煥然一新。

好似會所娛樂室咁富麗堂皇既房間映入眼簾，明亮既燈光同之前一路見到既陰暗壓抑房間形成左鮮明既對比。 

係一間練槍房，而且從別樹一格既掛畫、擺設，只有少量既練槍位，同埋專設既茶几、按摩椅，都可以睇得出呢個係一個私人既俱樂部房間。 

我睇到有啲呆滯。

除左機場既vip lounge， 我係從來無入過啲咁名貴既地方。 





牆上面琳琅滿目既槍械，各種款式眼花撩亂，令人看得失神。 

阿智走去牆邊隨手拎左一把手槍，走去練槍位附近櫃前拎左一組護具戴上，就走到最就近既練槍位開始練槍。 

而我就好似黎左世外桃源一樣，仲係恍惚咁睇住呢一切。 

經歷左咁多凶險，黎到呢個咁舒適地方，係不習慣，更加不真實。 

尤其前兩個房間講緊既都係生死之間既事。 





見到我成個鄉下仔咁，阿勇經過我身邊既時候故意擦撞左一下我既膊頭，順便嗤笑左一聲。 

距行到去茶几嗰度，隨意搵左張按摩椅坐低享受。 

「智哥係啟智集團既太子爺，玩槍係距既興趣，有間咁既槍房自然合情合理。」 

啟智集團？

有聽過，係本地數一數二既上市公司，由超市、飲食，到家品品牌都有所涉獵，而且每一範都撈得唔錯。

距旗下既品牌普通人點都聽過幾個。 

連咁既人都捲左入黎？

你話如果我啲死老百姓比捲幾多個入黎都合理，我就唔信萬中選一既太子爺都會咁啱比捲左入黎。 

唔通唔係意外咁簡單？ 

算啦其實所有既關聯都係從少量既信息勉強聯繫出黎，先咪亂諗。 

阿彩都絲絲縮縮咁跟左入黎，都係走左黎茶几呢邊，坐左落按摩椅隔離既梳化度，但係同阿勇隔得有d遠。 

唔係同伴黎架咩？做咩好似睇落唔係好熟咁。 

靚妹仲未醒。

我抱住距，將距橫訓喺梳化上面，阿彩同阿勇中間，緩解一下距地團隊入面距離既尷尬。 

「有無熱水？」我企起身問。 

阿勇扮無聽到，埋頭打機。

阿彩有啲遲疑咁指左指對面。 

我尋住距指既方向睇，係一個Pantry，隔離係洗手間。 

Nice。 

我順手去左個廁所，出門隨手刪埋門。

然後我走到去pantry 飲水機前面，喺附近隨意拎左條毛巾，沾左啲熱水。

「窸窸窣窣」 出返廳，我折左幾下條毛巾，將距放左落靚妹個頭度。

阿勇瞄左我一眼，然後瞄左廁所一眼。 

呢個時候阿智都放低左槍行左過黎，示意我坐低。 

我望左兩望呢個座位分佈，直接席地而坐，坐左喺靚妹身前。 

阿智似乎對我呢個選擇有d意外。距猶豫左幾秒，然後行去阿彩身邊。 

「唔使擔心，我地會搵到距。」距雙手搭左落阿彩既膊頭到安撫。 

「放手，呢個係你地欠距架！」阿彩厭惡咁樣fing開阿智對手。 





阿智睇落有d失落，黎到我身邊，陪我一齊坐喺地下，坐左喺我隔離。 

而阿勇，就好似望住仇家咁樣掘實阿彩。 

我看在眼裡，但係無出聲。 

「Pantry 有d 零食喺度，使唔使拎比你？」阿智坐低之後友善咁問。 

「呢度係咩一回事？」我無理會距既發問，直入主題。 

「拎你既手機比我睇下？」距伸出手。 

「關我手機咩事？」我有啲將信將疑，但係都係將手機拎左出黎。 





「拎黎啦！唔通害你咩！」距有啲調皮咁搶走左我部手機。 

距只係簡單咁睇左一眼，就將部手機還返比我。 

「窸窸窣窣」 

「幾多號入黎既？」 

「應該係四號左右？」 

「我地都係。」距一邊講，一邊拎出左手機，將個主畫面展示比我睇。 

「點......點解會咁？」我好自然望向顯示時間既地方，然後就見到吊詭之處。 

我部手機顯示既係五號既下午十二點幾。 

而距手機顯示既，係八號既晚上八點幾...... 

我摸摸下巴稍稍思考左一下。 

「原來係咁......」 

「無錯。」距相信我已經明白。 

「呢度同出面既時間係唔同步。同樣係四號入黎，我地已經喺度逗留左三日幾四日。」 

「我地經歷既事情無你既咁緊湊，所以可以私下摸索多d呢度既規則。最明顯既一條就係唔只時間唔同步，呢度既時間流速都同外面唔同。」 

的確，超過十二個鐘頭，到依家我都未肚餓。 

「似乎係呢度既時間流速比外面更慢，咁樣最大既好處就是大大降低糧食既損耗，增加生存率。」 

嗯，而鐘錶既移動速度不變，唔係既話我早就發現時間流速古怪之處。 

咁樣都不錯，至少可以客觀咁知道自己已經喺度逗留左幾耐。 

「你都係無回答我最好奇既問題wor？」我戚起眉，耐人尋味咁望住距。 

「唔好急，唔係打算隱瞞。」阿智淡笑幾聲回應，倒是坦然。 

「我諗你都有少少頭緒，就係.....  呢個空間既構造好大程度同我地既心理活動有關。」 

果然！ 

「除非下一個房間早已定左型，唔係既話我地愈強愈具體去想像，下一個房間就越容易出現我地希望既房間。」 

「定型？」我皺左皺眉頭。 

「係阿，點講呢？」 

「唉。」見阿智有啲苦惱，阿勇接過話茬。 

「即係咁，我地試過有啲房間用啱啱既方法work，而有啲房間唔work。得出既結論就係唔work 嗰d 房多數都搵到有人黎過既痕跡，咁就係所謂既定左型無得轉啦。」 

「細佬表達得好清晰wor。」我轉頭比左個like 距。 

「唔使擦鞋，阿叔。」距擺左兩下手。 

「窸窸窣窣」 

「咁睇落呢間房都定左型，咁有左呢間房做後援，我地都可以放心咁搜索其他房間。」

 「無錯！所以其實我地依家已經可以出發！首先就係分發埋武器比你！」

 「唔得！」一聲厲聲喝止。一諗都估到係邊個 – 阿勇。 

「呢個人太可疑。帶住一個有超能力既靚妹，而且啱啱講既全部都係距既一面之詞，完全無辦法證實，萬一距其實係怪物既同黨呢？」 

「咁你想我點證明？」早就料到距對我既敵意。我有d 無奈，都只能咁樣反問。 

「帶我地去你所講既開放式房間。」距既眼神無比堅定。 

「好....」本打算無可不可，正打算答應。 

「唔得！」我及時改口，出左一身冷汗。 

個𡃁仔條屍就前往開放式房間既必經之路。

啱啱先令距地放低戒心，若然比距地見到屍體就真係百口莫辯。 

雖然話有特殊召喚房間既方法，但畢竟啱啱得知，如果唔夠熟練既話，話唔定短時間內根本無辦法咁得心應手召喚房間，到頭來都係要沿路折返。 

而且我總覺得困住咁樣巨型怪物既房間會係特例，無辦法話召喚就召喚。 

但我咁樣大反應咁拒絕，反而顯得我心中有鬼。現場氣氛再次變得詭異。 

「拿！智哥！話左架啦！呢個人信唔過架！」阿勇再次發難。 

「唔係！你比我諗諗其他方法證明！」我個腦開始飛速運算。 

「唔使啦！我依家就幫智哥永絕後患！」但係阿勇無比我思考既機會，講完就開始衝向槍枱搶槍。 

「阿勇！冷靜d！」阿智慌亂咁拉住阿勇。 

眼睇情況就黎再次失控，我焦急咁諗要吾要即刻抱起靚妹走佬。 

「窸窸窣窣」 

「唔好嘈！」呢個時候，良久無出聲既阿彩突然喝止左大家。 

「你又搗咩亂阿！」阿勇聽到即刻忍唔住斥喝阿彩。 

「你地聽唔聽到有怪聲阿？」距有d 後怕咁樣拋出左呢條問題，所有人聽到都有d愕然。 

「咩怪聲......等陣先，啱啱廁所門係打開既咩？」 阿勇一講，所有人既目光頓時被吸引左去廁所既位置。 

「智哥你啱啱有無鎖門！」 

「好似唔記得左.....」 

「拎槍！」阿勇一聲令下，全部人即刻衝向槍枱既位置。 

「碰！碰！」「吱！」已經太遲，一隻怪物喺廁所橫衝直撞咁衝出黎，發出毛骨悚然既高頻尖叫。 

嗰個近兩米高既體型，全身斑白既身軀，一身既蠻力，正正係吞食左阿帆，久仰既雞怪！