OT臨收工先發現走唔出個office 仲要比野追殺點部署: #β423-0012【代號：學生】
「個𡃁妹......咩來頭......」
比一輪噪音襲擊之後，我身後面嘅個叫「智哥」既𡃁仔幾番嘗試起身，但係掙扎一輪都係失敗，對腳好似不受控咁喺度微微咁震。
唔知點解我好似唔係好受影響，好快企翻起身。
望住地上既幾個人，我有啲意氣風發咁宣布：
「我好高興局勢穩定左落黎，睇黎我地可以好好傾下。首先......就講下你地既火力點黎啦！」
呢個時候卻係見到𡃁妹搖晃兩下，都準備跌落地下。
一個不忍，我衝上前接住左距，然後慢慢坐低，等距挨喺我心口好好攤喺度。
畢竟外表都只係個𡃁妹，難免會動惻隱之心。
而且有心定無意都好，都係距幫我解左圍。
兩行鼻血慢慢喺距個鼻度流左出黎，滴左落我件衫度。
『畢竟距仲係個𡃁妹。如果我唔對距進行壓制既話......』
『我需要分出力氣去制衡距......』
我個腦入邊浮現返老伯同我嘅對話。
恐怕係老伯既壓制令到𡃁妹用超能力有咁大既副作用，諗到呢度心入面竟然有幾分同情。
屌，幾時變得咁多愁善感。
我任由𡃁妹攤喺度，一邊端詳住眼前既人。
啱啱本身最大既威脅係挾持住𡃁妹、睇落唔太冷靜既嗰個揸刀既男仔。
我睇住距仲喺度不停r 個頭，好似想用咁嘅方法將啱啱𡃁妹尖叫帶來既暈眩感驅走咁。
我望向另一邊，嗰個叫智哥既男仔，佢幾番掙扎無果之後已經放棄左郁動，只係坐喺地下靜靜咁樣等待行動能力既恢復。
依家回想，或者其實最需要提防嘅並唔係嗰個攞刀嘅男仔，而係呢個智哥。
感覺攞刀嘅男仔諗住攞把刀對靚妹嘅行為只係一時衝動，或者自己都未load清楚。
但係啱啱同「智哥」對峙嘅時候、同佢雙目交投既時候，雖然感覺到佢嘅掙扎，但係有幾個瞬間，感受到佢係真係去下定殺人嘅決心。
嗰份深思熟慮嘅殺意先更加真實。
以佢咁嘅年紀，咁短嘅時間去下定一份殺心，諗起都有少少寒。
事情到底會演變成點...
「唉。」
...
「老母怪？老人？你講緊咩啊？邊有老人家有可能喺呢種環境生存啊？」
我地隨意坐左喺地下，圍成左一圈。
刀刀槍槍嗰d 暫時擺左落locker，盡量維持一個相對和平既氣氛。
當然我支鐵通都擺左埋一邊。（雖然距既用處都唔大）
「阿勇，冷靜d。」「智哥」出聲稍微制止左衝動男人既質問。
為左釋出善意，我主動話左比距地聽我手上握有或者最關鍵既訊息，亦即係老母怪同阿伯既事。
「等陣先，唔好隨便幫你遇到既人同事改名先，會有d 亂。你既意思即係有一隻巨型既綠色怪物同埋一個阿伯都比同一個instruction你，就係去達成離開既條件：集齊七個人一齊去巨型怪物所在既嗰間房？」「智哥」聽完之後主動喺度分析。
「你可以咁理解。」
「而隻綠色怪物係喺一個完全無邊際既室外空間？」
「至少我花費左我諗都有成半個鐘頭，都跑唔到去邊際。」
「半個鐘太短啦，證明唔到啲咩，只能證明嗰個室外空間可能遠比你想像中大。」距落左呢個結論。
呢個時候，啱啱仲一路將頭埋起來，成個人捲埋一舊喺一邊既女同學，慢慢爬左埋「智哥」身邊，喺距耳邊低語左幾句。
「無錯，呢個室外空間都可以係一個突破口：話唔定其實距就係現實世界既一個無人島之類。」個女同學啱啱講完之後，「智哥」就即刻拋出距既見解。
『的確有可能，但機會渺茫d lor。
依家呢個衛星時代，有d 咩地面地方係未被探索過架？
一個有古遺跡仲疑似有巨大怪物潛伏既地方，仲唔比軍方重點「保護」起黎，點會好似我睇到既咁樣萬里無人？』
呢個係我事後先諗到既。如果早d 諗到既話就唔使跑餐死啦。
「係架。到時如果用嗰兩隻野既方法無用既話，都可以從呢個方向嘗試拎個突破口。」
我無揭穿距，畢竟依家呢啲非常時期喺呢啲關頭希望總比失望好，尤其距地只係學生，抗壓能力好難摸索。
分分鐘一個小壞消息都可以成為壓垮距地心理既稻草。
我吊兒郎當亂咁黎姐，唔好連累到人。
「唔係啊智哥。我地入左黎咁耐，邊有見過啲咩開放式空間姐？仲要又超能力者又幾層樓高既怪物咁樣，就算喺呢個唔合邏輯既地方都超出常理啦！呢個阿叔想呃走我地啲武器咋！」嗰個叫阿勇既依然焦急，直接繞過我嘗試說服「智哥」。
我開始對佢有啲不爽，主要係佢叫我做阿叔嘅部份。
「你講得的確有道理。我覺得呢啲我哋冇經歷過嘅嘢，反而有機會係我哋嘅突破口？我想聽佢講埋先，如果係大話嘅話一定容易有破綻或者前後矛盾嘅地方。」「智哥」睇落沉思咗一陣，但係開口嘅說話卻係冇點樣比呢個阿勇動搖到。
佢一邊講，一邊拍住阿勇嘅膊頭安撫佢。
呢個「智哥」......以中學生嚟講比想像中更加冷靜理性，對佢幾有好感。
「我反而比較好奇基金會嘅部份。啱啱你提及嗰個阿伯，即係『雅威』，佢係會利用Number稱呼嗰隻綠色怪物，2317-K？」喺安撫完阿勇之後，「智哥」隨即繼續詢問。
「係，但係個阿伯唔肯透露所謂嘅基金會係咩嚟。不過我有留意到喺我哋入咗嚟之後外面有一件大型嘅私家實驗室爆炸事件，好難令人唔聯想到......」我喺解釋到最後一句嘅時候專登拖長個尾音，並且將對眼望向「智哥」。
「依家呢個空間係某一個秘密實驗室嘅事故......」佢好自然咁樣接過咗話茬，摸住下巴講出咗佢嘅推論。
「Bingo。」
「但係咁大型嘅涉及到空間扭曲嘅實驗事故，真係好天荒夜談......」
「事實似乎擺喺我哋眼前，都唔到我哋唔信。」我無奈咁話俾佢哋聽。
「講起呢個！我哋應該入到嚟之後都有一段奇怪嘅回憶閃回，似乎係關於我哋喺某個實驗室做咗某件事，進行咗某個交易，但係記憶好模糊。」「智哥」佢有啲激動咁樣同我分享，同時眼神有啲雀躍咁樣望向佢哋兩個同伴。
個女仔有啲遲疑咁點左點頭，而阿勇就只係敷衍咁樣輕點左一下頭，就另開左塊面。
「好高興話俾你哋聽，我都有同樣嘅記憶閃回。咁喺呢個共通點之下，都大機會我哋遭遇緊嘅事情就係呢個基金會嘅傑作。」我對佢提供嘅情報予以肯定。
講到呢度，我隱隱有啲不安。
如果一路所有嘅見聞都係呢個基金會嘅傑作，咁呢個基金會本身可以係幾咁神秘恐怖嘅存在。
感覺我哋面對緊嘅事情又多加咗一份重量。
我諗大家都感受到呢樣嘢，氣氛變得有啲沉重。
「同埋想講你講到嘅『雅威』，喺希伯來文入邊就係上帝嘅意思......」「智哥」率先打破沉默，但係拋出嘅又係一個新嘅重磅炸彈。
所有人再次沉默。大家都隱隱感受到喺呢件事件入邊大家係幾咁渺小嘅存在。
瑟縮喺呢個窄小嘅空間入邊，無力感又添加咗一分。
扭曲現實嘅能力者，的確你話佢係上帝嘅話......
不過如果佢真係上帝，就係一個仆街上帝！
「點都好啦！我哋而家整合咗資訊，思路清晰咗，可以離開嘅機會就多一分！」見到勢色唔對路，我即刻衝出嚟鼓舞吓大家。
冇錯！俾個雅威睇吓我哋凡人可以做到啲咩！
唔好俾佢以為可以掌控晒所有嘢！
「冇錯冇錯，起碼我哋而家唔係盲頭烏蠅，有前進嘅方向！」「智哥」連忙助攻。
一不做二不休，「智哥」直接企起身。
「我哋走！開始搜索其他生還者！任務目標：集齊七個人！」
我突然間發現不知不覺我好似已經帶咗節奏。
呢個「智哥」啱啱仲話要觀察我講嘅說話會唔會前後矛盾，依家就直接當左我係同伴？
似乎有啲天真。
反倒係阿勇，佢對我嘅敵意或者係警戒心係絲毫都冇消除，周不時就怒啤過嚟幾下。
依家聽到「智哥」直接將我納入佢哋嘅行動，直接就係一個對我怒目而視。
「唔係仲有一樣嘢要做咩？」正當我諗住講啲咩緩頰嘅時候，瑟縮咗喺一邊好耐既嗰個女仔終於出聲。
佢一講，可以感覺到轉瞬即逝間空氣再次凝結左幾秒。
「智哥」嘅面色瞬間變得有啲難睇。佢不易察覺地好快咁瞥咗去嗰個滿枱鮮血嘅課室枱幾眼，又好快望返返嚟。
「咁咪同時進行囉，冇問題嘅。」言語間「智哥」稍為回答咗嗰個女仔嘅問題，但係好明顯冇打算說明情況，而係生硬咁唐塞咗過去。
嗯......睇嚟佢哋都未必簡單，需要再留神一下。
喺我咁樣諗嘅時候，佢哋已經開始動身。我抱起仲係癱軟既𡃁妹，準備跟上。
「By the way 同你正式再介紹多次：我叫阿智。啱啱呢個男仔嘅名你應該都聽到，佢叫阿勇。女孩子叫阿彩。接落嚟嘅旅途多多指教。」
「我叫阿祥，多多指教。咁我哋而家係去......」
「武器庫。」