OT臨收工先發現走唔出個office 仲要比野追殺點部署: #β423-0009【代號：真相】
「呢個空間既真相？」
「係，係咪估唔到咁快就有出去既機會呢？」
距既笑容都係咁寬容，但係唔知點解可以睇到一絲戲謔。
「雖然我知你啱啱已經見過2317-K，我想同你好好討論下呢件事。」
距黎到我面前，泰然自若咁坐低。
我無出聲掘實距，意圖做少少威嚇。
但事實係，似乎暈倒前比變成怪物似乎有好大副作用。
我依家雙手雙腳都仲係好麻痹。
「唔需要對我咁警惕我wor，我唔係你既敵人。甚至話......我需要你既幫忙。」
「點解？你既能力比限制左？」
我既說話似乎對距黎講有啲猝不及防，距既眼神睇落有少少驚喜。
「啱啱個𡃁妹講架嘛？出於某啲原因你需要制衡個𡃁妹，你無得發揮你原本既能力。」
「照𡃁妹既講法，你地殺曬我地都可以係一瞬間既事。照原來既能力黎講，你地逃出呢個空間應該唔係啲咩難事啊？」
「你憑咩覺得我地講既都係真話，你唔怕我地大你？」
試我？
「因為無必要。以𡃁妹既口吻同距啲發自內心既厭惡嘲弄反應黎講，距根本就不屑利用我，利用我係你既主意。」
距呆左一陣，然後稍稍低頭，笑意變得更深。
「笑咩啊？我講中左？咁啱啱你地都係專登眼白白睇住我懟lum個細路架啦？事到如今過黎有咩意思？攞景定贈慶？憑咩覺得我會幫你？」
聽住我講既野，距意味深長咁望住我。
「睇你個眼神，似乎覺得我地係同班怪物係同一類既東西？」
「唔係咩？垃圾怪物。」
聽到我既挑釁，距無急住反駁，反而係稍微前傾，將隻手放喺我既膊頭上面。
「明既細路，我知你經歷左好多。唔只喺呢度，你一直都經歷左好多。」
「放手！」我厭惡咁即刻拍開距隻手。
距慢慢縮番隻手返去，放左喺自己心口。
「為表誠意，我介紹左我自己先。」
「你好，我只係一個隨和既老人。我並無姓名伴隨我既誕生，但係基金會既人都鐘意用『雅威』黎稱呼我，你都可以咁樣叫我。我係一個擁有一定程度『全能』能力既人，你都可以理解我係一個可以扭曲現實既能力者。」
一邊講，距一邊大手一揮，喺距手上幻化出左一杯暖水。
暖水冒住煙，距默默咁放左喺我身旁，伸手示意請飲，然後繼續講。
「本身可以走出呢個空間對我黎講當然係輕而易舉既事。但係正如你所講，我需要花費心神噤住呢個𡃁妹。」
一團金光突然喺距身周亮起，緊接著一股強勁既壓迫感撲面而來，連呢個空間都開始顫動，天花上面既灰塵不斷灑落。
緊接著，距身後既𡃁妹身上發出一陣更加刺眼不祥既紫光，對眼開始點起左焰團。
附近個𡃁仔條屍即刻被燒成左碳。
瞬息間，我覺得自己比壓迫到連肺都比極限擠壓，那埋一舊完全呼吸唔到，全身骨骼好似要碎裂咁。
做咩？講講下就要殺左我？？
我緊張咁抓實地板，但係其實我咩都做唔到。
連跑都做唔到。
但係下一秒，死亡既威脅感又突然消失，一切恢復正常。
「如你所見，能力者唔係只有我一個，亦都唔係每個能力者想妥善管理自己既能力。」
距既語氣仲係咁輕描淡寫，令我有啲火滾。喺距眼中我簡直連螻蟻都不如。
「畢竟距仲係個𡃁妹。如果我唔對距進行壓制既話......」 距停頓左一陣。
「距選擇離開既方法大概係直接拆左呢個地方，完全唔顧你地任何人既生死。」
啱啱既所有暴走畫面，令我確信眼前既呢個人，至少呢句話，絕對唔係講緊大話。
「我需要分出力氣去制衡距，但係如此一來我就無辦法鋪設離開既路，所以呢個重責大任只能交比你地。」
距出手搭住我既膊頭，今次我無推開。
「方法？」
「好似2317-K，亦即係你見到既嗰隻巨大綠色異獸咁講，搵齊七個人，返到去嗰個地方，進行七人七柱既儀式。尼七個人唔包括我地兩個。」
「點解？」
「你地同2317-K有特別既聯繫，但唔係我地兩個。」
「咩聯繫？」
「你唔需要知。」
「基金會係咩？」
「你唔需要知。」
「咁我需要知啲咩？」
「帶埋個𡃁妹。有我噤住距既能力，距會變得同一般人差唔多，我唔放心。」
「咁你負責做咩？」
「我負責感知呢個空間既結構，盡量用剩餘既能力去令你遇上正確既人。」
「我無得揀？」
距無回答，但係距既笑容變得更加深邃。
我垂低個頭，淡笑左幾聲。
「咁呢個都係一個局黎㗎啦？從我踏出嗰道門開始，我就注定喺呢度，注定會遇上你地，注定會親手殺左個𡃁仔，注定會同你地有呢段對話。注定會....比你地擺佈，係咪呀？」
「死老野，距講既係咪真架！」後面既𡃁妹聽到我講既野異常激動，即刻厲聲質問老人。
「我只係一個能力者，我唔係命運。」
「哼哼，所以我先會喺踏出門口嗰下直接換左樓層。」
啱啱講完，一把燒烤叉已經飛速刺左去老人腦後，卻又喺接觸到距既幾釐米前停低，跌左落地下。
「死老野！夠膽撚化我？」 我無理到距地既衝突，自顧自咁起左起身。
「走啦𡃁妹，我唔會等你架。」 我同個阿伯擦身而過，一眼都無望到距，行去條屍隔離，執番自己個背囊，拎起地上既一道護身符。
道護身符係喺𡃁仔條屍個褲袋道跣出黎，亦都係距存在過既唯一證據。
我一拐一拐，走向陰暗既大門口。
門口依舊遙遠，但係我今次希望距一直都永遠都咁遙遠。