OT臨收工先發現走唔出個office 仲要比野追殺點部署: #β423-0008【代號：老人與女孩】
朦朧既記憶入面，一個高大既滑梯，一個搖搖板凳，幾個事先完全唔認識既小朋友，已經足夠玩到忘記時間。
一開始係喺度玩捉，玩到後尾，就係你追我跑，大家完全唔知玩緊啲咩。
一個小朋友唔小心跌左落地下，膝頭都擦損曬，但係距望左個傷口一陣，連喊都無喊，就即刻爬左起身，join 番大家繼續跑繼續玩。
完全唔知好玩既點喺邊，但係真係好正，好淋漓盡致。
無由頭地，跑到成身濕曬，幾個癱喺地下喘曬氣，一句聲都出唔到。
就係呢啲咁既無意義小片段，卻係會係你人生之後既某一刻完全無來由咁pop up，喺你眼前閃過。
莫名地......意猶未盡。
「阿祥！咪玩啦！黎食野啦！」
聽到老母既召喚，我即刻拋低玩伴，頭都不回、傻下傻下咁跑左返去搵距。
我仲記得係個燒烤台，對於幾歲既細路黎講，個台同我個人差唔多高，係個巨型火爐。
啲溫度熱到好似要令我啲皮膚裂開咁。
我唔敢行到好近，只係匿喺燒烤台長凳上面老母既背後，用手指輕輕咁拉左幾下距既衫袖。
「拿！腸仔，睇熱啊！」老母直接叉起一舊腸仔，遞去我嘴邊。
我小心咁咬落去，熱辣辣，啲肉汁慢慢漏出黎，好正。
抬起頭見到我老母既笑容，好甜。
我諗嗰一次係我唯一一次咁切身感受到老母係愛我。
或者，曾經愛過我。
「喂喂，阿妹喊啊！」係我老豆把聲，好唔爭氣咁郁啲就搵老母幫手。
老母即刻放低手上既烤腸，接過手黎照顧啊妹。
而我就望住就咁擺左喺燒烤台邊既幾盤烤肉，啲燒肉......好香......好想食。
我攰啦，淨係想坐底好好食啲烤肉。
我聞到烤肉飄過黎陣陣愈來愈濃烈既香味，耐心咁等待，但係老母就只係忙住湊細妹。
媽，我好肚餓啊......
「喂其實呢個𡃁仔都幾犀利，呢種等級既怪物都可以一個人搞掂，如果喺lab入面起碼要三四個D級人員啦。」
「我唔識分，我搞掂通常係幾秒中內既事。」
「咁你做咩留住個𡃁仔？貪好玩？」
「你話呢？」
「咁我相信你無個𡃁仔都無問題既。」
「唔好同我廢話，偽君子。」
「但係話說啲肉又幾好食wor，就地取材都有咁既水準，就算唔想讚你都忍唔住。」
「係呢～？睇少我 is the last thing you should do。」
咩聲啊......唔好阻住我啦，我要食燒肉啊.....
我慢慢擘大對眼，對眼未睇清野已經比一陣濃烈既燒肉味吸引。
竟然發現個細路女同嗰個形象同上帝相近既老人喺度.....BBQ。
就咁樣係個遊樂場既中間，隨便拎幾塊海綿膠墊開始燒起黎，手上面拎住好似生牛肉咁既紅肉喺度燒，搞到呢個通風系統絕對唔良好既密閉空間充斥住煙霧。
「咳、咳！」好快我就比啲煙嗆親。
我個腦仲未清醒，就係遵從住本能喺度行動。
我睇住不遠處燒烤叉上面既烤肉，個口開始情不自禁咁分泌口水，食指大動。
我想行過去分一份，呆呆滯滯咁想企起身，卻係發現自己比條粗繩由頭到腳綁實左。
我一起身，就即刻向前仆左落地。
而喺我仆倒既嗰一下，一陣極為惡頂、聞落似腐肉溝渠水味既腐臭味即刻吉入我既鼻窿，直接衝入我既腦度，令我瞬間清醒。
我抬頭一睇，面前係嗰塊比我捅到面目全非、淨係睇得清一半既面：係嗰個比我捅死左既孱弱𡃁仔。
距就癱左係我面前，面上已經出現左大片既紫斑，僅餘既一隻眼正係空洞咁望向遠方，但係個瞳孔已經開始凹陷同混濁。
我瞬間relate到嗰兩個燒烤緊既人講緊既說話：「就地取材。」
一陣寒意好似一堆螞蟻咁樣開始迅速爬上我個腦。
我再次一陣暈，然後心口一陣異樣，忍唔住一大啖嘔左出黎。
「嘔......嘔......」
「咦？距醒囉lor？醒左唔講既？」
嗰兩個人終於發現我醒左，一前一後咁好快行左過黎。
「嘔......唔好埋黎......嘔......」勉強嘔完，有啲嘔吐物仲卡喺喉嚨度，我已經比個𡃁妹扯住頭髮秤起左個頭。
「做咩嘔啊？唔舒服？食塊肉先啦！」
距一下將一塊手上既紅肉塞入我既嘴入面，一臉戲謔。
我反應遲左幾秒，先load 到嘴入面既係咩黎。
我即刻將塊肉吐左出黎，啲眼水不停咁往外標。
「咳咳！我唔要啊！咳咳！」我用力咳，用力咳，好似咁樣就可以掩飾我既嘴入面已經掂過呢啲肉咁。
「做咩啊？你食齋架？咁好難服侍wor大佬！」條女仲喺度講，咳嗽聲並不能夠掩蓋距嗰把倀雞聲。
我滿臉憤恨咁樣望住眼前既屍體。
條女見到我既視線，瞬間明白左啲咩。
「啊哈哈哈哈！笑死我啦！你唔係以為呢啲係人肉啊嘛？人肉唔好味架傻仔！我唔會咁無品味！呢啲係個老野喺附近捉返黎既野牛黎架！」
距一邊講，一邊若無其事咁行去我身後面開始幫我解繩。
我有啲受驚過度，應急反應下不停掙扎。
「唔好郁黎郁去啦！咁樣我點幫你解！」
「你當我三歲小朋友啊？呢度邊度黎既牛啊？」我慢慢停止左掙扎，但係面上既眼淚未停，無力咁駁斥對方既荒謬。
「切！講呢啲！變隻牛出黎啊，對於阿伯甚至我黎講啊，有幾難啊？如果唔係要噤住我既能力？距滿漢全席都變到出黎啊！人地為你地好咋！」
「畢竟如果距唔咁做既話，只需要一秒鐘，你地全部都會死喺度。」
距解開左我既繩，卻係突然間走到我面前踎低，注視住我對眼講出呢句話。
從嗰個充滿蔑視與吞噬一切既邪氣眼神，我知道距係認真。
喺同距眼神對上既嗰一刻，我全身既肌肉甚至本能咁完全僵化。
我係咪救左個錯既人？
唔係。
依家先醒起，隻怪物一開始就無左一隻手，睇個傷口切面顯然係被硬生生打斷，話唔定就係距做.....距一開始並唔係瑟縮喺一邊，只係等緊機會出擊。
從一開始，距就唔需要我救。
或者，距故意引誘我殺死個細路？
一被解開，我即刻轉身將自己往後拖同距地拉開距離。
「咁你點解唔殺左我？」我摸住自己既心口。
心口上面嗰幾個大窿已經唔見左，身上既深紅都已經退去，顯然係距地落既手腳。
「因為.....我鐘意你，我要你接落黎做我既保鑣。」個𡃁妹雙手放背後，對眼好似狐狸一樣閃爍，嘴唇划起左狡黠既弧度。
「你知唔知你自己講緊咩啊......」呢一刻距講既野就係難聽過粗口。
「唔使急住拒絕我先，不如聽左阿伯講既野先啦？」細路女緩緩退後，嗰個著住古希臘長袍既男人緩步向前，臉上掛住極具感染力既慈祥笑容。
只係呢一刻，我感受到既只有虛偽。
但係距接落黎講既野，卻令我不得不正視。
「小朋友，接落黎我要話比你知既，係關於呢個空間既真相。」
！？