OT臨收工先發現走唔出個office 仲要比野追殺點部署: #β423-0010【代號：違和】
點解？點解每次都係咁？
我既每一個行動，literally 每一個行動，都唔會能夠帶領我到我希望既結果。
只會一次、一次咁樣讓事情變得更差。
以前覺得係有一條無形既命運絲線不斷將我拉入深淵，無論我做d咩選擇。
入左黎呢度仲好笑，大佬真係直接不演了，實體化出呢一堆東西搞9我。
求生？唔放過你。求死？無呢個選擇。
想避開麻煩事？偏偏要你遇上。
想救人？你係比人杜左一波既殺人兇手咋仆街！
殺人兇手！殺！人！兇！手！
「你抵架！無人叫你咁多管閒事！唔係，係無人需要你既多管閒事啊！明知自己只係災星托世，仲搞咁多野！明明默默爛在一角就好啦垃圾！」
老妖公好似聽到曬我心入面既說話咁，喺側邊比出適時又極其富惡意既評價，一邊悠閒咁喺半空打滾。
呢隻野都係。自從嗰一日開始就陰魂不散，不斷不斷纏住我，每一日都無比我好過。
「你收爹啦！咁你又唔比我去死！折埋一邊？你估我無試過啊！結果咪喺呢度lor！」我即刻情緒失控咁鬧番返去。
「你喺度同邊個講野啊？呢度無人wor？」個𡃁妹喺我側邊，表情好驚恐咁問。
「關你咩事啊！」對個𡃁妹我都係毫不留情。
屌你老母個死老伯，就咁樣將個計時炸彈dum去我身邊。
打開左巨大遊樂場既大門，我地黎到左一個荒廢課室。
天花剝落，地下周地都係碎瓦碎礫，好似啲youtuber會去探險嗰啲廢墟咁樣，地下幾包檸檬茶飲曬比榨成左一舊，隔離幾支煙頭。
零丁幾張檯凳喺課室既中間，檯面佈滿塗鴉同埋一啲暗紅色既液體，側邊成排金屬locker生曬鏽，紅斑累累。
其中既個櫃門已經扭曲，勉強掛住係度搖搖欲墜，發出「依依呃呃」既刺耳金屬聲。
我隨手喺地下拎左支撬棍，開住手機電筒壓低身慢慢向前行。
呢間房一眼望曬，無任何屏蔽物，所以無任何探索視覺盲區既必要。
「玩完啦玩完啦......個阿伯撚9我既......比我跟左個傻既......」 個𡃁妹喺我身後面神神化化，我理都廢鬼事理距。
與其話費事理，不如話係心煩到極點。
我行去課室中間既檯面check下。
「死書蟲！」「垃圾！」「攞彩！」「高分低能！」 檯面一堆用小刀刻出黎既刻痕。而暗紅色既液體就傳一陣極度刺眼既腥臭味。
可惜嗰啲充滿無謂惡意既字眼更加刺眼。
Bully？唔係咁老套啊哇？
好似好撚慘，不過......唔關我事。
我又走去locker前面，個人重心盡量後壓，用撬棍輕輕逐個撩開locker 既門口。
慎防有d咩奇怪野走出黎。
已知怪物既體積至少係人咁既大細（個阿伯同𡃁妹當然都計算在內），但係難保之後會有其他體積形狀更難捉摸既怪物。
呢個空間每一刻都係度刷新我既認知。
我打開一個又一個locker，想搵下啲有用既物品使用。
可惜呢個唔係rpg，並無啲咩有用既道具出現，有既只係一啲無用既教科書、煙包、筆盒之類既雜物。
我打開一個又一個locker，同時心中違和感愈來愈強。
好似......計漏左啲乜嘢。
一種無形既威脅感喺我背後慢慢顯現。
我另轉頭，卻係咩都見唔到，如芒刺背。
到底係咩？
我不斷努力喺腦入面搜索，盡力將情報既碎片拼湊埋一齊，組成有用既資訊。
或者話，組成呢一刻最需要既關鍵資訊。
各種類型、或有理智或無既怪物，所有對呢個空間邏輯既觀察同推測，每一場對話、每一個現象得返黎既情報。
唔係，一定、一定有漏啲咩。 到底，到底係咩？
目前見到既每一個獨立空間，總好似......有啲咩奇怪既地方...... 係呢個空間，只係呢間房，有啲咩奇怪既地方。
我覺得我已經察覺左，甚至已經道出左重點，但係，我都係講唔出...... 我愈來愈焦急，甚至額頭開始出汗，手開始有啲震。
我感覺自己漏既呢樣野非常致命，如果我再唔快啲發現既話......
我再次另轉頭，拎住撬棍喺身前高度戒備，同時左右望，開始復盤呢度有既所有野：locker、檯凳、野飲盒、煙頭，無啦？
到底？到底係咩？
「卡！」身後突然傳來一聲金屬機關聲，我迅速打算回頭直接接上一棍！
「唔好郁。」身後傳來一聲陌生既叫喊聲，同時我feel到一支冰冷既金屬管督左落我既後腦。
我呆左喺原地，腦袋嗡嗡咁叫，冷汗直冒，同時終於打通左思路。
終於知道.....嗰份違和感喺邊度黎......
「鐵通做武器？係咪太睇小我哋？」
….
..
其實道理好簡單。
並不是尼個空間、或者話尼間房本身有啲咩問題，亦都唔係入面既任何物品、裝置、擺設有啲咩問題，而係......尼個房間既本質就同我之前見過既所有房間唔一樣。
距......係一個我完全無見過既房間。
Office、public library、gym room，甚至是方才嗰個兒童遊樂場，都係我去過，或者至少有過一面之緣既地方。
嗰個室外空間可以例外，感覺嗰度本身就完全係老母怪既地盤。
所以如果要講之前見到過既所有房間都係我記憶既具現化，雖然瘋狂，但其實係個合理既推論。
但係尼間廢墟課室......絕對係我無見過，或者至少係我無印象既地方。
阿叔我都係中學畢業左10年左右，未有記憶退化到連自己中學既課室咩樣都唔記得，絕對唔係尼個格局。
我亦都無睇咩廢墟探險片既習慣或者興趣，所以如果話係記憶影射既話都唔合理。
結合老母怪同個阿伯都有明示暗示過尼個異空間唔只我一個人，所以......如果呢個係屬於其他人嘅記憶空間？
最有力既證據，就係課室中間既學生檯面嗰一堆疑似欺凌事件縮影既尖銳訊息，我絕對冇經歷過或者目睹過類似嘅事情。
係呢種記憶具現化嘅空間入邊，我係好支持一個理論：腦入邊越深刻嘅執着嘅，就具現化得越鮮明。
換而言之，我係直接闖左入人地既地盤，咁人地盤據喺自己嘅地盤就係再合理不過嘅事啦？
咁人哋會防備我哋呢對不速之客都係最合理不過嘅事啦？
老嘢，尼個就係就係你搵到嘅適合我哋遇上嘅人？
一班擸架撐指住我哋嘅人？
「唔好郁啊！唔係我一刀鋸斷呢個𡃁妹條頸！」