OT臨收工先發現走唔出個office 仲要比野追殺點部署: #β423-0007【代號：上帝】
我抱起個細路女就一野跑出去，直奔大門。
呢度我真係想抱怨一下： 其實呢，我真係唔係啲咩體育生。
我連gym 都唔做，狂跑呢啲野真係唔啱我架...... 唉......
個細路女呆左一陣，然後開始表情厭惡咁瘋狂掙扎。 。
我一面茫然但係都係捉實距，唔比距從我懷中跌落。
「放手啊！我唔需要你啊！」距極度抗拒咁大叫。
喂師兄啊！唔好良心當狗肺先得，我依家literally 救緊你啊！搵命搏架！
「點啊大聖人？人地都唔想你救啊！」個老妖公大腳跨喺我身上，雙手扯住我頭髮肆意咁嘲笑。
「收聲啊你地全部！」我忍唔住大叫。 咁混亂既狀況仲同我添亂，真係頂唔順。
就喺距離門口仲有幾米既距離，我突然感覺到背脊一涼，轉眼間已經化為劇痛。
我轉頭一睇，隻紅色怪物就喺我後面，已經完成左攻擊動作，並且舉起爪準備下一次攻擊，直直咁向我刺過黎。
「賤人竟然夠膽兇我，等我將你......」 個細路女話都未講完，我就因為劇痛身體一軟準備跌低，距都比嚇到收左聲。
喺跌低既前一刻，我使盡全力將個細路女拋左出去，一下抌咗落附近最近既波波池入面。
「碰！」「哺嚕哺嚕！」隨住個細路女撞左入個波波池入面，我都一下跌左落地下。
但係就係呢一下跌低，令到隻怪物攻擊落空。 距隻爪好似打樁咁，一下隊左入地板入面。
痴撚線，想將我整成串燒？
距掙扎住想將隻爪喺地板入面掹出黎，而我狼狽咁喺地下將自己拖遠離隻怪物，喺地下拖出左一條鮮明既血痕。
正當我喺度猶豫應該直接離開定係要爭取時間撈返個細路女出黎既時候，我睇住隻怪物瞬間將自己隻爪掹斷。
爪既前端好似焦糖脆餅咁碎裂左，啲碎屑甚至彈左落我塊面度。
都唔等我有所反應，隻怪物就好似個訓練有素既士兵咁即刻向我衝過黎揮爪。
我喺地下接連翻滾躲避，當然係......避唔開啦。身上即刻多左幾條明顯既血痕。
距掹斷左隻爪，隻爪短左幾cm，而且似乎有d 腳跛， 但係都唔係好影響距既攻擊速度。
我不斷翻滾，其實都只係將自己變成一個移動中既攻擊目標，等距既攻擊唔咁易命中，等自己唔咁容易中致命傷。
但係我一時無留意翻滾既方向，碌碌下竟然一個唔小心碌左入另一個波波池入面。
毫無防備，我既視野即刻變左全黑。
「撒！」聽到一聲清晰既塑膠波大噴發既聲，我知道隻怪物都跳左入黎。
我即刻用力耙用力耙，將自己埋入池底。
「煞！」「煞！」一下又一下清脆既爪擊聲，一批又一批直接碎裂既塑膠波，都清晰咁提醒緊我下一秒可能既下場，每一下都令人心寒。
個池底黑瞇擝，我喺一堆塑膠波既阻撓下艱難咁除底個背囊，摸索住打開距，喺背囊入面拎左我收埋既戈件目前最大攻擊性既武器出黎。
正當我思考攻擊方式既時候，我先發現......我已經黎唔切。
我心口一涼，直接喺波波池入面比抽左出黎。
距......真係當我係粒魚蛋一樣，叉左起黎...... 距手上既幾隻利爪......全部貫穿左我既胸口......
只係幾秒，我已經感覺到自己件恤衫迅速咁染紅緊。
係大量失血。 好快我個頭已經開始暈，思考有啲散漫。 失血？有無貫穿要害？
從我呢個角度睇有啲難判斷。
慢慢咁，隻怪物既樣都開始有啲模糊。
係咪我錯覺？隻怪物既身體......好似膨脹緊？
塊面......開始變得愈來愈有血色？
我舉起自己隻手，好似......有啲巢皮。
眼角餘光，見到啱啱喺波波池入面爬返出黎既細路女，我想擘大口叫距快啲走，卻係已經使唔上任何力氣，連呼吸都覺得痛。
應該係個肺都被貫穿左......
我鬆底左手，睇住眼前既怪物越來越恢復人形，慢慢化為一般人該有既面容；而我就感受住自己既身體變得愈來愈乾癟，感受住好似有啲咩慢慢喺自己身體流走緊咁。
「你睇下？逞咩英雄？當初救唔到我，依家又救唔到呢個𡃁妹，你做既野有咩意義？」
個妖公企喺個隻怪物隔離，目無表情咁望住我。
「個𡃁妹，咪又係要死。你咩都改變唔到。」
個𡃁妹爬起身，開始劇烈咁向個門口衝，重重既腳踏聲喺個遊樂場入面迴盪。
「阿帆呢？你無咁遲鈍係咪就有辦法救到距阿？或者至少同距一齊死？唔使咁羞家。」
隻怪物開始比個𡃁妹吸引注意力，慢慢咁另向距。
「你條命係我執返黎架。係應該要不停用黎幫人架。結果呢？你做左啲咩？」
隻怪物開始一跛一跛咁邁出左一步。
「我以你為恥。」 唔要......唔要......唔要阿！！！！！
我強制驅動呢副乾枯既身體，用本來唔應該存在既力氣，趁住隻怪物被吸引左注意力既間隙，我舉起左手，將手上戈件武器狠狠咁捅落怪物隻眼度！
係我之前收埋嗰片大玻璃碎！
奇怪既係，咁樣一捅，隻怪物好似恢復左自我意識咁，反應從一隻戰鬥怪物，化為左一個活生生既人。
「好痛阿！好痛阿！我喺邊啊！咩事啊！」
無盡既鮮血喺距既眼窩入面流出，染到我成手都係。
「你係邊個啊？怪物啊！！！怪物啊！！！！」
怪物？我？你要吾要睇下依家係邊個叉住邊個？
隻怪物塊面恢復左血色之後我先睇清：距竟然係個十幾歲既𡃁仔。
眼細細，皮膚暗黃，就係會係課室角落自己一個自閉讀書嗰啲。顯得笨拙既一隻缺失既門牙尤其顯眼。
如今卻係比我捅到血肉模糊......不停慘叫......
「咩事啊！走開啊！」
距嘗試將我fing走，但我知道呢件事唔可以發生，所以......我把握意識最後清醒既時刻，變本加厲咁抓住個𡃁仔個頭，將塊玻璃片愈插愈入......
為左個𡃁妹。
個細路不停掙扎，最後重重咁跌左落地下，但我依然無鬆手..... 人死前既意志，竟然咁強大..... 我感受到手中既生命慢慢流逝，慢慢......慢慢......個𡃁仔既掙扎幅度愈來愈細......
「我唔要......我要死喺度啊......我要返去見距地啊......」
我見到距眼中出現最後一絲淚花，然後，距就無再郁到...... 睇住呢一幕，我好似定左格咁久久無郁動......
好似應激機制咁樣，事情已經完結，但我既身體仲係放鬆唔到......
我係咪......殺左人..... 我倒喺一潭血泊入面，腦袋一片混亂。
我明明係想救人......距明明上一秒仲係隻怪物，捅到我重傷，下一秒卻係講出啲咁既野......
點解會咁.....
我面如死灰，望住個天花，無視自己既身體已經變成同隻怪物一樣乾枯通紅，亦都無視左旁邊已經比我捅到半邊面毀容，癱軟喺一邊既屍體。
「哇！睇下你個慘樣？」
一個老人，出現喺我既視線入面。
距俯下腰，彎低身望住癱喺地下既我。
距係咁樣憑空出現？定係距啱啱入左黎我唔知。
距一臉白鬍鬚滿頭白髮直落腰間，著住過時既古希臘長袍。塊面啲皺紋多過我指紋，過重既魚尾紋，但係笑容無比慈祥。
個形象就好似聖經描述既......
「上帝？」
就喺我未黎得切細想既時候，我兩眼一翻，就失去左意識......