OT臨收工先發現走唔出個office 仲要比野追殺點部署: #β423-0006【代號：女孩與怪物】
我喺度木門度出黎，刪埋左道門。
呢個時候我考慮既第一個諗法係：我點樣翻翻黎呢度。
我睇左一睇周圍既環境：呢度係一個巨大既公共室內遊樂場，燈光有啲陰暗。
地板係軟墊，同時周圍都有好多類海綿質既巨大軟墊玩具。
我細個有去過類似既地方，但係呢度......地方大好多，足足至少有兩個足球場咁大。
同我記憶唔同既就係.....距多左幾個波波池同足足兩層樓高既遊繩格網。
相比起我記憶中既地方，更加似係我既記憶同喺internet見到既兒童遊樂場既印象結合埋一齊，然後變左一個成人既size。
空間既隨機轉換，唔通我要搵辦法返返黎呢間房？
我周圍望去搜索一下，然後比我搵到我想要既野：樓層標示牌。
37樓。
我本身喺43樓，避怪物既時候落左一層黎到42樓，跨入左呢度木門之後出返黎黎左37樓。
如果樓層係目前唯一既空間邏輯？如果物質可以帶離房間代表嗰啲空間係實質存在既話...... 呢啲理論仲需要認證。
點都好我無可能守喺呢間房前面，之後再搵辦法返黎。 我望住木門上面一個奇怪既符號：一個五角星中間有隻眼。
距同戶外空間入面嗰七條柱上邊既精緻既浮雕唔同，係比粗糙地刻畫喺道門度，用我估鈍刀之類既物體。而且數量唔只一個，目測都有十幾個散刻左喺門上既各處。
我直覺呢個係某種重要既線索，將距影低左。 拎轉頭我突然聽到一啲動靜，我即刻警覺咁搵掩體掩護。
呢度周圍都係人咁高既海綿方塊，要搵掩體唔難。 仔細聽，好似係一啲......低鳴聲。
我匿喺掩體後面，只係伸出手機，拍片拍周圍一周，然後播片睇下周圍有無睇啲咩威脅。 咁樣係更謹慎既做法。
要死可以，但係唔該唔好係啲咩奇怪既死法。
仔細聽：所謂既怪聲係某種低沈到好似一啲機器發動既低鳴聲，但係單薄好多。
確定左自己仲未接近任何可疑事物，我就盡量壓低身，即刻移動去附近既掩體。
我一邊重複搵掩體、錄片既過程，一邊移動到附近最近既大門，並且盡量維持自己喺房間中間既位置，遠離牆壁。
牆壁看似係會令你好有安全感既位置，實際上喺關鍵時候會限制左你既走位。 打機學返黎。
呢個步驟重複左幾次已經有啲累，而偏偏大門喺房間既另一邊。
但同時都有啲緊張，因為感覺已經距離怪聲愈來愈近。
到唔知邊次既錄影，我終於搵到怪聲既源頭。 當然啦，不意外，係怪物。
係一種新品種既怪物。 而且......一睇就好有威脅性。
放大條片，好朦，太遠。
只係見到一片暗紅既身體，人形既，好瘦削，好似樹枝咁。
一開始只係一團紅色既模糊東西，但係因為距係喺接近房間既正中央，我必須要經過距。
隨住離距愈來愈近，錄到既片愈來愈清晰，直到見到身體既輪廓、形狀、顏色，直到愈黎愈清晰，直到睇清楚左距既樣： 同樣係一副難以言喻既樣子，個頭係骷髏狀咁樣，皮膚薄薄一層好似紙一樣，緊緊咁貼喺骨骼上面，身體表面既神經血管全部都清晰可見。
再放大啲睇，皮膚表面仲有好多一噠噠既凝固左既血塊黏住喺度，啲頭髮又係一噠噠零零佘舍幾噠稀疏咁癡喺個頭度。
最大既感覺就係..... 好乾啊...... 就好似......距既身上無任何一點水分，係一隻半死活既乾屍。
不過比較得人驚既係，距隻手，係一隻有幾十釐米長既巨爪，岩岩潺潺咁。
比劃到幾重傷勢唔知，但係一定會破傷風。
距就咁樣呆滯咁樣企左喺度，咩反應都無。
呢度啲怪物真係有特色，唉。 我喺一個掩體移動到下一個掩體既時候慢慢兜開左隻怪物。
只要距唔亂郁，我就無事。 但係就喺距附近既時候，拍攝到既片段令我覺得違和感愈來愈強。
距好似係喺度......同緊啲咩對峙緊。 距既眼神唔係呆滯既，而係凝視住某啲野。
抵不住好奇，或者話我硬係有種奇怪既感覺覺得要知道事實既全部， 到底係咩一回事，好似係呢個空間一直喺度比唔同暗示我，暗中影響我做唔同事咁。
唔通......連個空間都係活既？ 唉痴線！
我不停穿梭不同既掩體轉換角度，終於，比我錄到我想要睇到既野。
同怪物對峙緊既係...... 一個10歲左右既細路女。 啱啱比一塊大膠墊遮住左視角。
個細路女，就背靠住膠墊，瑟縮住咁同隻怪物望住隻怪物，同距對峙住...... 我即刻縮返去掩體後面，盡力抑壓住自己大聲喘氣，不過呼吸都係好急促。
痴撚線架！將細路女都捲入黎！ 有無人性架！
點算好？我應該點算好？ 無理由抌低距架？係咪？ 唔係wor，定係其實......我可以。
我塊面開始露出左扭曲既笑容。
其實我同距三唔識七，關我咩事姐？
我自己都搞唔掂啦？仲理距啲咩？
不如.....走啦...... 係距唔好彩.......下世小心啲lor…… 死唔係重點啊，重點係嗰隻爪，睇到真係好寒啊大佬......
但係咁樣有人性咩？咁樣你同畜生有咩分別？出到去出面啲人會點睇你？
我唔講無人知既......同埋你都係知自己無人性先放棄做醫生屈喺個垃圾office 姐......
怪物既地盤黎架！理性啲啦！扮少陣好人會死咩！
「呢個時候扮好人只會顯得你可悲咋！記得你應承過我啲咩！你無資格去送死啊！」 個老妖公都爬左喺我身上喺我耳邊講。
好！ 我抓住自己隻手，止住左自己隻手既顫抖。
隻手一早已經凍到同舊冰差唔多。
我抹走前額既冷汗，下定決心微微企起身，面上面既笑容愈來愈詭譎猖狂。
…...
「碰！」一塊軟墊狠狠咁砸左落隻紅色怪物塊面度！
隻怪物失左重心跌左落地，而我就抱起個細路女即刻開始跑！
屌我做唔到啊仆街！